Ныхас — нацийы ӕнӕниздзинадыл

0
63

 

Лӕвар медицинон ӕххуысы хӕрзхъӕддзинад ӕмӕ ӕнӕниздзинад хъахъхъӕнынады кусӕндӕтты материалон-техникон уавӕр ӕмӕ дзӕбӕхгӕнӕн хостӕй сӕ ифтонг кӕныны фарстатыл рауад ныхас, Грознайы цы уӕрӕхгонд ӕмбырд уыдис, уым. Конд ӕрцыд Уӕрӕсейы Федерацийы Президенты Цӕгат Кавказы федералон зылды ӕххӕстбарджын минӕвары цур Советы хъӕппӕрисӕй. Архайдтой дзы зылды ӕххӕстбарджын Александр МАТОВНИКОВ, Цӕгат Кавказы республикӕты ӕмӕ крайты разамонджытӕ, федералон ӕмӕ регионалон министрадты, парламентты, ӕхсӕнадон организациты минӕвӕрттӕ, регионты федералон инспектортӕ.

Александр Матовников йӕ раныхасы куыд бафиппайдта, афтӕмӕй Уӕрӕсейы Федерацийы Президент Владимир Путин майы ист Указты фӕлгӕты сӕвӕрдта медицинон ӕххуыс адӕммӕ фӕхӕстӕгдӕр кӕныны, йӕ хӕрзхъӕддзинад ын фӕбӕрзонддӕр кӕныны хӕс. Уымӕй дарддӕр, фӕбӕрӕг кодта, хӕстӕгдӕр рӕстӕг ацы куысты ахадындзинадӕн аргъ цы бӕрӕггӕнӕнтӕм гӕсгӕ кӕндзӕн, уыдон. «Сӕйрагдӕр у ӕнӕниздзинад хъахъхъӕнынады рӕзт, нӕ нацийы ӕнӕниздзинад фидар кӕнын. Уымӕ гӕсгӕ хъуамӕ бацархайӕм бӕрӕггонд тӕссагдзинӕдты нымӕц фӕкъаддӕр кӕныныл, уыимӕ, хицаудзинады ӕппӕт оргӕнтӕ дӕр ацы ахсджиаг фарстайыл кусой федералон центримӕ иумӕ», — загъта федералон зылды ӕххӕстбарджын минӕвар.

Уӕрӕсейы Федерацийы ӕнӕниздзинад хъахъхъӕнынады министры фыццаг хӕдивӕг Татьянӕ Яковлева йӕ раныхасы куыд фӕбӕрӕг кодта, афтӕмӕй Цӕгат Кавказы федералон зылды субъектты адӕм цӕрынц фылдӕр Уӕрӕсейы иннӕ регионтимӕ абаргӕйӕ. Цӕрджыты ‘хсӕн мӕлыны иумӕйаг бӕрӕггӕнӕн та Цӕгат Кавказы ныллӕгдӕр у суанг Европӕйы иуӕй-иу бӕстӕтӕй дӕр. Йӕ ныхасмӕ гӕсгӕ, уыцы бӕрӕггӕнӕн ноджы къаддӕр куы фӕуа, уӕд цӕрыны ӕмгъуыдыл бафтдзӕн, уымӕй Уӕрӕсейы Федерацийы Президент 2018 азы 7 майы цы ног Указ сфидар кодта, ома, 2024 азмӕ конд «Уӕрӕсейы Федерацийы рӕзты национ нысантӕ ӕмӕ стратегион хӕслӕвӕрдты тыххӕй», уый ӕххӕстгонд ӕрцӕудзӕн.

Федералон чиновник ӕргом аздӕхта, Цӕгат Кавказы федералон зылды регионты фӕндаггонтранспортон фыдбылызты тынг бирӕ адӕм кӕй мӕлы (ӕппӕтуӕрӕсеон бӕрӕггӕнӕнтимӕ баргӕйӕ), ӕмӕ ноггуырдты ‘хсӕн амӕлыны цаутӕ дӕр бирӕ кӕй сты, уымӕ. «Уӕрӕсейы ноггуырдтӕ амӕлыны бӕрӕггӕнӕн у 5,0, Цӕгат Кавказы та — 7,2. Раздӕр тынг бӕрзонд уыд уыцы бӕрӕггӕнӕн — 14,20, фӕлӕ, ӕмбӕлгӕ мадзӕлттӕй кӕй пайда кӕнынц, уый фӕрцы уавӕр фӕхуыздӕр. Нырма нӕ уӕддӕр тынг бирӕ бакусын хъӕуы, цӕмӕй амӕлыны цаутӕ уой бынтон гыццыл», — загъта Татьянӕ Яковлева. Куыд ма бафиппайдта, афтӕмӕй национ проект «ӕнӕниздзинад хъахъхъӕнынад»-ӕн федералон бюджетӕй лӕвӕрд цӕуы 1,3 триллион сомы. ӕмбырды сӕйраг фарстайыл ӕрдзургӕйӕ, Александр Матовников регионты разамонджыты размӕ сӕвӕрдта, федералон ӕххӕстгӕнӕг хицаудзинадимӕ ацы вазыгджындӕр хъуыддӕгты тыххӕй бӕлвырд мадзӕлттӕ фӕнысан кӕныны хӕс. Зындгонд куыд у, афтӕмӕй Цӕгат Ирыстоны медицинон ӕххуысы хӕрзхъӕддзинад фӕбӕрзонддӕр кӕныны нысанимӕ, ӕнӕниздзинад хъахъхъӕнынады кусӕндӕтты материалон-техникон уавӕр ӕмӕ дзӕбӕхгӕнӕн хостӕй ифтонгад фӕхуыздӕр кӕныны охыл конд цӕуынц цалдӕр программӕйы федералон проектты фӕрцы.

Нысантӕм гӕсгӕ онкологион низтимӕ рынчынтӕн лӕвӕрд цӕудзӕн ядерон медицинӕйы бындурыл медицинон ӕххуыс, уыцы раззагдӕр мадзӕлтты фӕрцы низ уыдзӕн ӕнцондӕр раиртасӕн ӕмӕ дзӕбӕх кӕнӕн. Уымӕй дарддӕр Дадзинты центр, сывӕллӕтты ӕмӕ иннӕ поликлиникӕтӕ ифтонггонд ӕрцӕудзысты хъӕугӕ аппаратурӕйӕ. Дихгонд сын ӕрцӕудзӕн 65 милуан сомы. Республикӕйы бындуронӕй рацараздзысты ӕмӕ сцалцӕг кӕндзысты, бирӕ рӕстӕг заууаты уавӕры цы медицинон объекттӕ ис, уыдон.

Ӕмбырды ма фӕбӕрӕг кодтой, ӕрдӕгарӕзтӕй цы объекттӕ лӕууы, уыдоны нымӕц фӕкъаддӕр кӕныны фарста дӕр. Цӕгат Кавказы хъуыддӕгты министры фыццаг хӕдивӕг Одес Байсултанов куыд загъта, афтӕмӕй 2018 азы райдайӕны ахӕм объекттӕ уыдысты 12 мины бӕрц, уыимӕ сӕ куы арӕзтой, уӕд пайда кодтой паддзахадон ӕхцайӕ. Цӕгат Кавказы ахӕм объекттӕ ис 4 мины бӕрц. «Сӕ фылдӕр хай сты социалон ахадындзинадимӕ объекттӕ, семӕ — скъолатӕ дӕр. Уымӕ гӕсгӕ сӕ кӕронмӕ ахӕццӕ кӕнын хъӕуы. Цӕгат Кавказы регионты разамонджытӕн хъуамӕ уый суа ахсджиаг нысан, социалон къабазы зылд ӕвзары зындзинӕдтӕ», — загъта Одес Байсултанов.

Ныртӕккӕ федералон министрады цӕттӕ кӕнынц сӕрмагонд пълан, уым фӕбӕрӕг кӕндзысты ӕппӕт ӕрдӕгарӕзт объекттӕ ӕмӕ сӕ цы хуызы, цӕй фӕрцы саразӕн ис, уыцы мадзӕлттӕ. Цӕгат Кавказы хъуыддӕгты министрадӕй дарддӕр ууыл архайдзысты Уӕрӕсейы Экономикон рӕзты ӕмӕ Финансты министрадтӕ.

РЦИ-Аланийы Сӕргълӕууӕджы ӕмӕ РЦИ-Аланийы Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here