БИТАРТЫ Вячеслав: “Ӕз дӕн социалон дихдзинӕдты ныхмӕ, ӕз дӕн социалон рӕстдзинады фарс”

0
53

 

Ивгъуыд къуыри РЦИ-Аланийы Сӕргълӕууӕг БИТАРТЫ Вячеславӕн уыд афӕдзы кӕроны хатдзӕгты фӕдыл ӕргом ныхас республикӕйы дзыллон хабархӕссӕг фӕрӕзты сӕйраг редактортимӕ. Мадзал Сӕргълӕууӕджы хъӕппӕрисӕй арӕзт ӕрцыд дыккаг хатт. Афӕдзы дӕргъы республикӕйы уыд бирӕ нысанхӕссӕг ахсджиаг мадзӕлттӕ, уыдонӕй кӕцыдӕртӕ систы нӕ республикӕйы цӕрджытӕ рагӕй кӕмӕ бӕллыдысты, ахӕм историон цаутӕ

Афӕдзы сӕйрагдӕр цаутӕ— Мӕнӕн ӕппӕты сӕйрагдӕр у адӕмы сӕрибар цард, хызт уыдыстӕм змӕстытӕ ӕмӕ гӕрзифтонг фыдракӕндтӕй. Ӕмӕ уымӕй — Хуыцауӕн табу! Афӕдзӕн хатдзӕгтӕ кӕнгӕйӕ республикӕйы царды ахсджиаг у, Уӕрӕсейы Федерацийы Президентимӕ фембӕлды рӕстӕг кӕрӕдзи ныхасӕн аргъ кӕй скодтам, бирӕ фарстатӕ лыггонд кӕй ӕрцыдысты. Сфидар кодтам мӕ курдиатмӕ гӕсгӕ, ног азӕй Дзӕуджыхъӕуӕй Мӕздӕгмӕ комкоммӕ фӕндаг аразын кӕй райдайдзыстӕм, уыцы хъуыддаг. Нӕ сыхӕгты уылты нӕ Мӕздӕгмӕ цӕ- уыны кӕй нал хъӕудзӕн, уымӕй бирӕ хъуыддӕгтӕ фӕрогдӕр уыдзысты, фӕкъаддӕр уыдзӕн Мӕздӕгмӕ цыды рӕстӕг, сахаддзӕн районы социалон-экономикон уавӕрыл дӕр.

Иннӕ ахсджиаг хъуыддаг та у, Ольгӕ Голодец Аланийыл саргъуыды 1100 азы юбилей кадджын уавӕры сбӕрӕг кӕныны тыххӕй Дзӕуджыхъӕуы оргкомитеты уӕнгтимӕ цы цӕлхӕмбырд сарӕзта, уый. Уӕд республикӕмӕ ӕрцыдысты федералон министртӕ, сӕ хӕдивджытӕ. Ӕрныхас кодтой республикӕйы алы къабӕзты фарстатыл, рахастой стыр пайда нын чи фӕуыдзӕн ахӕм уынаффӕтӕ. Уыдонимӕ аргъуанты арӕзтад ӕмӕ цалцӕггӕнӕн куыстытӕ, фӕндӕгты арӕзтад, коммуникацитӕ, доны хӕтӕлтӕ бауадзын. Республикӕйы Хицауады размӕ ӕххӕстгӕнинаг куыстыты ӕрфыст цалдӕр азмӕ развӕлгъауӕй у цӕттӕ.

Стыр ӕнтыстыл нымайын, завод «Электроцинк» сӕхгӕнын нӕ къухы кӕй бафтыд, уый дӕр. Уыцы фарста канд нӕ республикӕйы цӕрджыты нӕ тыхсын кодта бирӕ азты, фӕлӕ нӕ алыварс цӕрджыты дӕр. Заводы куыст ӕвзӕрӕрдӕм ахадыдта уӕлдӕфы сыгъдӕгдзинад ӕмӕ цӕрджыты ӕнӕниздзинадыл.

Хицауады ӕмбырды сфидар кодтам республикӕйы социалон-экономикон рӕзты стратеги 2030 азмӕ. Бацӕттӕ кодтам йӕ фӕлгӕты сӕрмагонд программӕтӕ. Уыдон сӕххӕст кӕныныл алкӕцыйыл дӕр дзуапп дӕттынц, комкоммӕ кӕмӕ хауынц, дзуапп сыл чи дӕтдзӕн, уыцы министрадтӕ. Фӕлӕ ууыл не ‘рлӕууыдыстӕм, дарддӕр дӕр куыст цӕуы, царды рауадзын кӕй хъӕуы, ахӕм ӕндӕр ахсджиаг программӕтыл дӕр.

 

Завод «Электроцинк» ӕхгӕд ӕрцыд!

— Нӕ фӕстаг фембӕлд УГМК-йы директор Искандар Махмудовимӕ уыд ивгъуыд къуыри. Ӕргом аныхас кӕнгӕйӕ кӕрӕдзи бамбӕрстам, иу хъуыдымӕ ӕрцыдыстӕм. Бацӕттӕ кодтам разыйы гӕххӕтт завод нӕ республикӕйы сӕхгӕнынӕн ӕмӕ сӕвӕрдтам стъӕлф йӕ куыстӕн. Заводы консервацийы тыххӕй бахъӕудзӕн къӕпхӕнгай бакусын, чи дзы куыста, уыдоны дарддӕры хъысмӕтыл ахъуыды кӕнын. Уалдзӕгмӕ сын ссардзыстӕм куыст. Амалхъомтӕм барвыстам нӕ курдиат, цӕмӕй нын уыдон дӕр баххуыс кӕной куысты бынӕттӕй. Уыцы хъуыддӕгтӕ домынц рӕстӕг. Чи зоны, ӕмӕ йӕ бынаты ӕндӕр завод дӕр байгом кӕнӕм. Зӕгъӕм, машинӕтӕ ӕмбырдгӕнӕн завод, йе та ӕндӕр исты, республикӕйӕн пайда чи хӕсса, ахӕм. Уый уын мӕ фӕндон. Заводы цы ӕппарӕццӕгтӕ ис, уыдонӕй йӕ ссӕрибар кӕнынӕн агурӕм мадзӕлттӕ, бахъӕудзӕн нӕ федералон прогаммӕтӕй спайда кӕнын дӕр.

 

Районты цӕрджытимӕ фембӕлдтыты ахадындзинад

— Хъӕуты цӕрджытимӕ фембӕлдтытӕ арӕзт сты мӕ хъӕппӕрисӕй, уымӕн ӕмӕ мӕ фӕнды сӕ социалон фарстатӕ хи цӕстӕй фенын, сӕ фарсмӕ балӕууын ӕмӕ комкоммӕ бафӕрсын цӕмӕй тыхсынц, цы сӕ риссы, уымӕй. Уыцы фарстатӕй бирӕтӕ лыггонд цӕуынц Сӕргълӕууӕджы фондӕй, Федералон программӕты ӕххуысӕй, иннӕтӕн та мадзӕлттӕ ссарӕм фӕрсӕрдыгӕй, зӕгъӕм, амалхъомты дзыппы бӕркадӕй. Мӕ уынаффӕтӕ куыд ӕххӕстгонд цӕуынц, уымӕ мӕ хъус дарын мӕхӕдӕг. Республикӕйы цӕрджытӕн хуымӕтӕджы нӕ радтон мӕ телефоны номыртӕ. Районты ӕмӕ хъӕуты сӕргълӕуджытӕ сӕ хӕстӕ кӕм не ‘ххӕст кӕнынц, цӕрджыты фарсмӕ кӕм нӕ балӕууынц, уым цӕрджытӕн сӕ бон у комкоммӕ ӕрбадзурын. Йӕ домӕнтӕ сӕ рӕстмӕ чи не ‘ххӕст кӕна, уыдоны та исдзыстӕм сӕ куыстӕй. ӕз ӕнхъӕлмӕ кӕсын хуыздӕр ивддзинӕдтӕм. Иу ран бадгӕйӕ, цоппаймӕ нӕ, фӕлӕ.

 

Комкоммӕ бастдзинады телефон

— Телефонӕй чи ӕрбадзуры, уыдонӕн дзуапп фӕдӕтты ме ‘ххуысгӕнӕг. Изӕры та ӕркӕсын, чи цавӕр фарстайы фӕдыл ӕрбадзырдта, уыдонмӕ ӕмӕ сын сӕ фарстатӕ равзарын бахӕс кӕнын бӕрнон адӕмӕн. Фылдӕр ӕххуыс фӕагурынц сывӕллӕтты ӕнӕниздзинад фӕхуыздӕр кӕныны тыххӕй. ӕппӕт фарстатӕ лыггонд ӕрцӕуынц, ӕххуысагурджытӕн та ӕмбӕлгӕ сӕ фарсмӕ балӕууӕм. Цӕмӕй хицӕн кӕндзӕн 2019 азы бюджет ацы азы бюджетӕй?

— Республикӕйы Хицауад бацархайдта бюджет, гӕнӕн цас уыд, уыйбӕрц пайдайагӕй барӕвдз кӕныныл. Ӕхсызгонӕй зӕгъын республикӕйы хи ӕфтиӕгтӕ афӕдзӕй-афӕдзмӕ кӕй кӕнынц фылдӕр. 2018 азы бюджетмӕ бахастам ивддзинӕдтӕ, уымӕн ӕмӕ нӕ ӕфтиӕгтӕ 300 миллуаны сомы бӕрц рауадысты фылдӕр, ӕнхъӕл куыд уыдыстӕм, уыцы нымӕцтӕй. Кӕд 2015 азы республикӕйы хи ӕфтиӕгтӕ бюджетмӕ 7, 5 миллиарды уыдысты, уӕд ацы аз та — 12 миллиарды. Паддзахады раз нын цы хӕстӕ ис, уыдон дзӕвгар фӕкъаддӕр сты. Ацы аз дзы бафыстам 370 милуан сомы.

Ӕртӕ азмӕ куыд ӕнтыстджынӕй бакуыстам, афтӕ дарддӕр дӕр куыст куы ацӕуа, уӕд 2030 азмӕ республикӕ йӕхи ӕфтиӕгты руаджы йӕхи дарынхъом уыдзӕн. Уыдон нын фадат дӕттынц, социалон фиддонтӕй уӕлдай цы стыр объекттӕ аразӕм ӕмӕ араздзыстӕм фидӕны УФ-ы программӕты архайыны фӕрцы, уыдонӕй республикӕмӕ цы ӕхцайы процент хауы бафидынӕн, уыдон ӕххӕст кӕнын бадзырдмӕ гӕсгӕ.

Федералон программӕты архайын дӕр нӕ къухы ӕнцонтӕй нӕ бафтыд. Республикӕйы ӕхца кӕй нӕ уыд, уый аххосӕй программӕты архайын, пайда сӕ кӕнын нӕ къух нӕ амыдта. Хъуыдис 10 процентӕй 30 проценты онг иумӕйаг хӕрдзтӕй бафидын. Фӕлӕ хъуыддагыл афтӕ бакуыстам ӕмӕ нын уыцы проценттӕ нӕ паддзахад 7 процентмӕ ӕрӕппӕрста. Афтӕмӕй арӕзт цӕуынц фӕндӕгтӕ, ног социалон объекттӕ, скъолатӕ, рӕвдауӕндӕттӕ, культурӕйы галуантӕ ӕмӕ афтӕ дарддӕр.

Фидӕны дӕр нӕ куыст араздзыстӕм уыцы уагыл, гом кӕндзыстӕм ног куыстуӕттӕ. Майы мӕйы уынаффӕты тыххӕй Федералон ӕхцатӕй фаг ӕрвыст не ‘рцыдис ӕмӕ уыдон дӕр бафыстам нӕхи республикӕйы бюджетӕй. Кусын хъӕуы экономикӕйы рӕзтыл. Саразын ӕппӕт мадзӕлттӕ дӕр, цӕмӕй нӕм инвестортӕ сӕ хъус ӕрдарой. Ног азы бюджеты хъӕууонхӕдзарадон къабазӕн республикӕйы бюджеты бавӕрдтам дыууӕ хатты фылдӕр ӕхца.

Ӕрӕфы районмӕ хъусдард

— Бирӕ азты дӕргъы ацы районы сӕмбырд бирӕ лыггӕнинаг фарстатӕ, ӕмӕ сӕ сабыргай иумӕ хынцдзыстӕм. Фыццаг къахдзӕфтӕ уал акодтам. Ӕрӕджы дзы ӕвзӕрстытӕ хорз уагыл ацыдысты. Цӕрджыты 70 проценты рацыдысты хъӕлӕс кӕнынмӕ. Цы ныфсытӕ бавӕрдтон цӕрджытӕн, уыдон та ӕнӕмӕнг сӕххӕст кӕндзыстӕм. Сырх-Дыгурӕй нӕм уымӕй размӕ ӕрбадзырдтой Культурӕйы хӕдзар сцалцӕг кӕныны курдиатимӕ. Хъуыддаг ӕххӕстгонд ӕрцыд, Ног азы размӕ дзы куыстытӕ кӕронмӕ фӕуыдзысты. Ныртӕккӕ рахызтысты йӕ алфамблайы фӕз ын саив кӕнынмӕ. Фарон дзы байгом кодтам, нырыккон домӕнтӕн дзуапп чи дӕтты, ахӕм скъола. Фарстатӕй бирӕтӕ бахастам республикӕйы инвестицион программӕмӕ. Подрядон организацитӕ тагъд бавналдзысты Сечеры ног хид саразыны куыстытӕм дӕр.

Агропромышленон рӕзтӕн уавӕртӕ

Республикӕйы Хицауады уӕнгтӕ, республикӕйы рӕзты агентад ӕмӕ хъӕууон хӕдзарады министрадӕн хӕслӕвӕрд уыд иумӕ хъӕууон хӕдзарады рӕзты программӕйӕ уӕлдай, бацӕттӕ кӕнын программӕ «Развитие горных территорий». Программӕйы фӕрцы фарстатӕ лыггонд цӕудзысты комплексон ӕгъдауӕй. Ома канд социалон кӕнӕ экономикон объекттыл нӕ цӕуы ныхас, фӕлӕ амалхъомады рӕзтыл, ӕппӕт инженерон инфрастуктурӕйы рӕзтыл, саразын кӕй хъӕуы уавӕртӕ хӕхбӕсты фос дарынӕн. Фыццаджыдӕр уал, уыцы бынӕттӕм саразын хъӕуы фӕндӕгтӕ, фосдарӕн бынӕттӕ, рухс ӕмӕ ӕрдзон газ бауадзын ӕмӕ бирӕ ӕндӕр уавӕртӕ, цӕмӕй дзы кусынӕн гӕнӕгтӕ уа, уый тыххӕй. Нӕ зӕрды ис, хӕхбӕсты дӕр горӕты цӕрджытӕн цы уавӕртӕ ис, ахӕмтӕ скӕнын.

Хӕхбӕсты зӕххытӕ

— Уый у нӕ риссагдӕр фарстатӕй иу. Сӕрмагондӕй куыст цӕуы хӕхбӕсты зӕххытӕ сӕхимӕ чи ӕрбассывта, уыдонимӕ дӕр. Фыццаг къахдзӕфтӕ уал акодтам. Уалдзӕджы республикӕйы Хицауад уынаффӕ рахаста, цӕмӕй хӕхбӕсты зӕххытыл фос чи дары, уыдонӕн гектары арендӕ фӕкъаддӕр кӕной 40 сомы онг гектарӕн. Сӕдӕгай гектартӕ йӕхи чи бакодта, мӕ фыдӕлты зӕххытӕ сты, зӕгъгӕ, ӕмӕ сӕ фидӕны йӕ зӕрдӕ йӕ кӕстӕртӕн ныууадздзынӕн кӕмӕн ис, зӕгъгӕ, уыдон та гектарӕн фиддзысты мин сомы. Кӕд сӕ зӕххы куыст кӕнын кӕй фӕнды, уыдонӕн нӕ дӕттынц, уӕд уадз, ӕмӕ республикӕйы бюджетмӕ пайда хӕссой. Уыцы-иу рӕстӕг та тӕрхондонимӕ архайдзыстӕм, сӕ зӕххытӕ сын закъонмӕ гӕсгӕ райсынмӕ ӕмӕ йӕ зӕрды зӕххы куыст, кӕмӕн ис кӕнын, уыдонӕн сӕ ратдзыстӕм. Бирӕтӕ сӕ зӕххытӕ уый фӕстӕ суӕгъд кодтой. Уымӕн ӕмӕ кӕд раздӕр афӕдзмӕ мин гектарӕн сӕдӕ мин сомы фыстой, уӕд сӕ ныр та милуан сомы хъӕудзӕн фидын. Хӕдзарӕдтӕн сӕ бон уыдзӕн программӕтӕ «Семейная ферма», «Начинающий фермер»-ы архайын дӕр. Уым фыццаджыдӕр, ӕххуыс кӕндзыстӕм, хӕххон бынӕтты чи кусдзӕн, уыдонӕн.

Мӕхӕдӕг районты хицӕуттӕн дӕр кӕндзынӕн ӕххуыс, цы ныфсытӕ сын бавӕрдтон, уыдон кӕронмӕ ахӕццӕ кӕныны тыххӕй.

 

Джызӕлы зӕххытӕй 250 гектарӕй фылдӕр лӕвӕрд ӕрцыд Дзӕуджыхъӕуӕн

— Рӕстӕджы домӕнтӕ, демографион уавӕр домынц горӕты рӕзт. Хъӕуы ног хӕдзӕрттӕ аразын. Горӕты зӕххытӕ нал ис, йӕ арӕнтӕ йын фӕуӕрӕхдӕр кӕнӕн уыдис ӕрмӕст Джызӕлы ‘рдӕм. Фидӕны нӕ аразын хъӕуы ног социалон ӕмӕ культурон объекттӕ дӕр. Зӕгъӕм, хъӕуы нӕ ног стадион горӕтгӕрон саразын. Йӕ бынаты та сараздзыстӕм хӕдзӕрттӕ. Цӕлыккаты Русланы руаджы нын фадат фӕцис, нырыккон домӕнтӕн дзуапп чи дӕтдзӕн, ахӕм ног суворовон училище, бассейн ӕмӕ ӕндӕр хъӕугӕ уавӕртимӕ саразын 200 нӕ, фӕлӕ 500 ахуырдзауӕн. Уымӕн дӕр хъӕуы 16 гектары зӕхх. Хъӕуы нӕ ног культурон ӕмӕ социалон объекттӕ саразын дӕр. Уыдон царды рауадзынӕн та нӕ уынаффӕмӕ гӕсгӕ зӕххытӕ рахай кодтам Джызӕлӕй.

 

УФ-йы хъӕууон хӕдзарады министр Дмитрий Патрушев ныфс бавӕрдта республикӕйӕн 1 миллиард 500 милуан сомӕй.

— Уый уыд мӕ курдиат министрмӕ ӕмӕ дзы райстон разыйы дзуапп. Бирӕ нӕу, фӕлӕ 2018 азы кӕй радих кодтой, уымӕй у дыууӕ хатты фылдӕр. Уыдон хардз ӕрцӕудзысты программӕ «Устойчивое развитие сельских территорий»-ы фӕлгӕты нӕ размӕ цы хӕстӕ сӕвӕрдтам, фылдӕр уыдон сӕххӕст кӕныныл. Сараздзыстӕм ног фӕндӕгтӕ хӕхбӕстӕ ӕмӕ хъӕутӕм, ног амбулаторитӕ, донцъирӕнтӕ ӕмӕ афтӕ дарддӕр.

Фидарӕй зӕгъӕн ис, республикӕ ӕнтыстджынӕй кӕй кусы Федералон центримӕ. Алы федералон министрадимӕ дӕр Мӕскуыйы кусы республикон профилон министрады минӕварад. Цы гӕххӕттытӕ арвитӕм федералон программӕты архайынмӕ, уыдонмӕ бӕрнон адӕймаг фӕдары йӕ хъус, цӕмӕй иу кабинетӕй иннӕйы ‘хсӕн ма фесӕфой, хъӕугӕ къухтӕм фӕхӕццӕ уой, уый тыххӕй. Уыцы ӕмвӕзадыл куыст хорзӕрдӕм фӕзынд хъуыддӕгтӕ хъӕугӕ уагыл ӕххӕст кӕныныл.

 

 Горӕты транспортон фӕрӕзты уавӕр

— Фылдӕр ныхас фӕцӕуы, маршрутон транспортыл кусджыты куысты хӕрзхъӕддзинад хъӕугӕ уагыл кӕй нӕу, ууыл. Цалдӕр хатты мӕхӕдӕг дӕр бахастон курдиӕттӕ, цӕмӕй рахизӕм ног уавӕртӕм. Фӕлӕ уӕд бирӕтӕ ӕнӕ куыстӕй баззайдзысты, кусгӕ та сыл кӕны 3000 адӕймагӕй фылдӕр. Уыцы куыстӕй дарынц сӕ бинонты, фӕлӕ уыцы-иу рӕстӕг сӕ фылдӕр барад халынц, ӕмӕ семӕ кусдзыстӕм ӕндӕр хуызы.

Хъӕуты уынгты рухсытӕ

— Алы уынджы дӕр хъуамӕ уа рухс. Уый у — хъӕуыхицӕутты сӕйрагдӕр хӕстӕй иу.

Доны уавӕр

— Хъыгагӕн, канд хъӕуты нӕ, фӕлӕ Дзӕуджыхъӕуы дӕр доны фарста у лӕмбынӕг ӕркӕсинаг. Алы ран дӕр хӕтӕлтӕ сты зӕронд ӕмӕ хӕссынц стыр къуылымпытӕ, уӕлдайдӕр сӕрдыгон. Араздзыстӕм комплексон пълан сӕ раивынӕн. Кӕй зӕгъын ӕй хъӕуы, уымӕн хъӕуы стыр ӕхцатӕ. Хи хъарутӕй ӕнцон нӕ уыдзӕн, Федералон программӕты ӕхсӕн та нын ӕххуыс чи фӕуа, ахӕм нӕй. УФ-йы Президентмӕ балӕвӕрдтон мӕ курдиат. Бафыста республикӕйы социалон-экономикон рӕзты программӕ. Уымӕ гӕсгӕ ныридӕгӕн арӕзт цӕуынц бирӕ объекттӕ, цалцӕггонд цӕуы ӕрыдоны рынчындон ӕмӕ афтӕ дарддӕр. Къӕпхӕнгай кусдзыстӕм районты доны фарстатыл. Иннӕ аз нӕ ӕрӕфы районы донцъирӕнты хъӕугӕ куыстытӕ сӕххӕст кӕнынӕн бахъӕудзӕн 120 милуаны. Дарддӕр та уал бакусдзыстӕм Алагиры районы доны фарстатыл.

Ӕнӕниздзинады къабаз. Ног министр.

— Медицинӕйы фарстатӕм мӕ хъус рагӕй дарын, суанг Сӕргълӕууӕгӕй куы нӕма куыстон, уӕд дӕр мӕ агайдтой, куыд нӕ республикӕйы иннӕ цӕрджыты, мӕн дӕр афтӕ. ӕз ма хорз хъуыды кӕнын Центрон рынчындоны реанимацийы суан шприцтӕ дӕр рынчынты хиуӕттӕ сӕхӕдӕг куы ӕлхӕдтой, уыцы рӕстӕджытӕ. Ныр куы бацӕуын, уӕд мӕ фӕрстытӕн раттынц дзуапп, рынчынтӕ сӕхӕдӕг кӕй не ‘лхӕнынц хостӕ. Нӕ сӕйраг хӕс у, цӕмӕй рынчынтӕ афойнадыл исой хӕрзхъӕд медицинон лӕггӕдтӕ. Арӕх изӕрыгӕтты мӕ фӕндаг ӕнӕнхъӕлӕджы акӕнын рынчындӕттыл, цӕмӕй фенон уавӕры ӕцӕгдзинад. Баззайын разыйӕ.

Цалдӕр азы размӕ дӕр ма рынчындӕттӕм бацӕуӕнтӕ нӕ уыд сӕ антисанитарон уавӕрӕй. Абон та зӕрдӕ райы. Кӕй зӕгъын ӕй хъӕуы, ӕркӕсинаг фарстатӕ нырма бирӕ ис, фӕлӕ ӕнӕ уый дӕр гӕнӕн нӕй. Алцы ӕххӕст медицинӕйы къабаз никӕд уыд. Уый тыххӕй та уал медицинон ахуыргӕнӕндӕттӕ хъуамӕ цӕттӕ кӕной хорз специалисттӕ, хъӕуы гӕртам исыныл къух сисын. Ӕрыгон специалисттӕн саразын хъӕуы ӕппӕт уавӕртӕ дӕр сӕ профессионалон рӕзтӕн. Уый канд медицинӕйы нӕ, фӕлӕ алы къабазы дӕр.

Ног федералон программӕтӕ

— Мах архайдзыстӕм, гӕнӕн кӕм уа, уыцы ӕппӕт федералон программӕты ӕмӕ уыдонӕй уӕлдай Национ проектты прогаммӕты дӕр, сӕрмагонд конкурсты. Президенты бардзырдмӕ гӕсгӕ арӕзт ӕрцӕудзысты социалон объекттӕ. Ног аз 510 милуан сомы рахай кодтам Тагъд ӕххуысы клиникон рынчындоны бӕстыхӕйттӕй 1992 азӕй арӕзтадон куыстытӕ чи домы, уымӕн, ӕмӕ ма цалдӕр рӕвдауӕндоны, амбулаторийы арӕзтадӕн дӕр.

Нӕ сӕйрагдӕр хъуыдытӕ сты нӕ республикӕйы цӕрджыты мызд куыд фӕфылдӕр кӕныныл. Уый тыххӕй та нӕ кусын хъӕуы нӕ экономикӕйы уавӕрыл.

Ахуырад

— Ӕз дӕн элитон скъолаты ныхмӕ, сывӕллӕтты сӕ курдиӕттӕм гӕсгӕ нӕ, фӕлӕ, сӕ ныййарджыты дзыппы бӕркадмӕ гӕсгӕ кӕдӕм исынц ахуыр кӕнынмӕ, ахӕмты. Кӕд ӕмӕ сӕрмагонд скъолатӕм хъуамӕ сывӕллӕтты исой конкурсон ӕвзӕрстытӕм гӕсгӕ. Ӕз дӕн социалон дихдзинӕдты ныхмӕ, ӕз дӕн социалон рӕстдзинады фарс. Дӕн сывӕллӕттӕн телефонтӕ дӕттыны ныхмӕ. Уымӕн ӕмӕ иутӕм «айфонтӕ» ис, иннӕтӕм хуымӕтӕг телефонтӕ. Ӕмӕ уый ӕвзӕрын кӕны сывӕллӕтты ‘хсӕн хӕлӕгдзинад, кӕнынц къордтӕ райдайӕн кълӕсты. Ӕз дӕн сывӕллӕтты скъоламӕ райсыны тыххӕй кӕцыдӕр директортӕ ӕхца кӕй домынц, уыцы ӕбуалгъ хъуыддӕгты ныхмӕ. Мӕ бӕллиц та у, цӕмӕй сывӕллӕттӕ скъоламӕ цӕуой иу хуызы уӕлӕдарӕсы.

ӕрмӕг бацӕттӕ кодта ХЕТӔГКАТЫ Оксанӕ

 

 

 

ОСТАВЬТЕ ОТВЕТ

Please enter your comment!
Please enter your name here