Республикæйы Сæргълæууæджы арфæтæ — Мæздæджы сывæллæтты хæдзары хъомылгæнинæгтæн

0
15

 

Мæздæджы районы кусæг балцы уæвгæйæ, знон Цæгат Ирыстоны Сæргълæууæг БИТАРТЫ Вячеслав бабæрæг кодта Мæздæджы сидзæр сывæллæтты хæдзар. Уый тыххæй фехъусын кодта РЦИАланийы Сæргълæууæджы æмæ РЦИ-Аланийы Хицауады пресс-службæ.

Республикæйы разамонæг æрзылд кусæндоны бæстыхæйттыл, бæстон æркаст, сывæллæттæ сæ фæллад кæм суадзынц, хойраг кæм хæрынц, уыцы бынæттæм. Стæй базонгæ ахуырадон æмæ хъазæн уæтты уавæримæ.

Кусæндоны хъомылгæнджыты бæрны чи ис, уыцы 15 сывæллонимæ Битарты Вячеславæн рауад зæрдæмæдзæугæ фембæлд. Республикæйы разамонæг сывæллæттæн ракодта Ног азы арфæтæ æмæ лæвæрттæ.

«Нæ къæсæрыл та æрлæууыд æппæты рухсдæр æмæ цымыдисагдæр бæрæгбон — Ног аз. Уый фæдыл уын æз арфæ кæнын! Мæ зæрдæ зæгъы, цæмæй сымахæй алкæмæн дæр фидæн аз æрхæсса бирæ ног æхсызгон хабæрттæ, цæмæй уæ цæсгæмттыл алкæддæр хъаза амондджын мидбылхудт», — фæнысан кодта Битарты Вячеслав.

Сывæллæтты хæдзары хъомылгæнинæгтæ дæр æдзæттæйæ нæ сæмбæлдысты сæ уазджытыл — бацæттæ кодтой цыбыр зæрдæмæдзæугæ концерт, стæй республикæйы Сæргълæууæгæн радзырдтой, ахуыр æмæ алыхуызон ерысты сæ къухы цавæр æнтыстдзинæдтæ бафтыд, уый тыххæй.

Цæгат Кавказы федералон зылды Уæрæсейы Федерацийы Президенты Æххæстбарджын минæвары номæй сывæллæтты хæдзары хъомылгæнинæгтæн арфæ ракодта РЦИАланийы сæйраг федералон инспектор Челæхсаты Владимир.

«Махæн, хистæртæн, нæ царды сæйрагдæр хæзна сымах, сывæллæттæ, стут. Уæрæсейы Федерацийы Президенты Æххæстбарджын минæвар Цæгат Кавказы федералон зылды Александр Матовниковы номæй уын Ног азы фæдыл арфæ кæнын! Мах уынæм, хъомылгæнинæгтæ æмæ иннæ специалисттæ сымах хъомылад æмæ ахуырадыл куыд зæрдиагæй архайынц, уый. Нæ зæрдæ уын зæгъы фидар æнæниздзинад, æнтыстдзинæдтæ ахуырады», — загъта Челæхсаты Владимир.

Фембæлды архайдтой Цæгат Ирыстоны Хицауады Сæрдары хæдивæг Иринæ Азимова, ахуырад æмæ министры хæстæ æххæстгæнæг Людмилæ Башарина, РЦИ-Аланийы Сæргълæууæджы цур Сывæллæтты барты фæдыл æххæстбарджын Кокайты Артур æмæ Мæздæджы районы разамынд.

Нæ уацхæссæг

ОСТАВЬТЕ ОТВЕТ

Please enter your comment!
Please enter your name here