Адæмæн хорзы куы цæуай…

0
29

 

Уæздандзинад, зонд æмæ зæрдæхæлардзинад адæймаджы уды бæстон бынат куы æрцахсой, уæд уый басгуыхы йæ дзыллæйæн æцæг хъæбул, сæ æнувыд лæггадгæнæг. Æмæ Ирыстоны ахæм сæрæнгуырдтæй иу у РЦИ-Аланийы Парламенты Сæрдары хæдивæг КУЧИТЫ Гари. Уый йæ бинонтæй рахаста лæгау-лæджы æппæт фæзминаг миниуджытæ. Райгуырд Садоны поселочы. Йæ мад Зинæ æмæ фыд Юри уыдысты уазæгуарзон, бæркадарм хистæртæ, кæддæриддæр зæрдиагæй æххуыс кодтой хиуæттæн, сыхбæстæн. Уæдæ сын се ‘мкусджыты æхсæн дæр уыд кад æмæ рад. Гъе, ахæм æгъдауылхæст хистæрты æхсæн рæзтысты Гарийы хо Фатимæ æмæ æфсымæр Эльбрус дæр. Куыд хъомылдæр кодта Гари, афтæ хуыздæр æмбарын райдыдта, цард адæмы фарныл, сæ хорзæхыл кæй æнцайы, уый. Цæмæй дæ сæ хорзæх уа, уый тыххæй та сæм бæрзондæй кæсын нæ, фæлæ се ‘вварс цæуын хъæуы. Адæмы цæст уынаг у, æмæ сын иу хатт хорзы куы бацæуай, уæд дын æй цæрæнбонты дæр сæ зæрдыл дардзысты. Ахæм хъуыдыйыл хæст у Кучийы-фырт абон. Æмæ йæ бæрнон бынаты та йæ уавæртæм гæсгæ искæмæн хорзы бацæуын, йæ зын ын фæрогдæр кæнын — йæ уд, йæ цæст.

Гари Садоны скъола каст куы фæци, уæд йæ фæллойадон фæндаг райдыдта, Мæскуыйаг завод «Мосэлектрон комплекс»-æн Дзæуджыхъæуы цы хайад уыд, уым. Куыста дзы механизаторæй. Фыццаг бонтæй фæстæмæ æрыгон, цæхæрцæст, æвзыгъд лæппу йæхи бауарзын кодта заводы разамындæн, хистæр æмæ кæстæр кары æмкусджытæн. 1980 азы Гаримæ фæсидтысты Советон æфсады рæнхъытæм. Службæ кодта Хабаровскы крайы. Йæ æфсæддон хайы разамынд æй кæддæриддæр дæнцæгæн хастой, куыд æгъдауæй, афтæ политикон-æфсæддон цæттæдзинадæй йе ‘мслужбæгæнæг фæсивæдæн. Йæ службæ хорз кæй цæуы, уымæн та æвдисæн уыдысты, йе ‘фсæддон хайы разамынд Гарийы ныййарджытæм цы арфæйы фыстæджытæ æрвыстой, уыдон. Постхæссæг сæ-иу Кучиты бинонтыл куы сæмбæлын кодта, уæд сæиу суанг ма сæ сыхæгтæ æмæ хæстæджытæ дæр æхсызгонæй кастысты. Æмæ-иу сæ зæрдæтыл, уæларвæй зæд æртæхæгау, сæмбæлд стыр цин, удæнцойдзинад. Фæстæдæр, Гари æфсадæй куы ссыд, уæд ыл куыннæ цин кодтаиккой сыхбæстæ, къабæзтæ æмæ бинонтæ. Уæдæ йæ номыл цы арфæйы фыстæджытæ фæцыд йæ хистæртæм, уыдон дæр ын æнæ равдисгæ кæм фесты. Сагартæн лæппу сæ куы федта, уæд йæ мад Зинæйы йæ хъæбысы æрбакодта æмæ фæлмæн, æфсæрмдзаст мидбылхудтимæ афтæ зæгъы: «Уыдон мæ арфæтæ не сты, мæ дзæбæх мад, уыдон дæ арфæтæ сты. Царды æмæ æхсæнады мæн æмæ мæ дзæбæх хо æмæ æфсымæры раст фæндагыл сæвæрдтат. Æмæ ныл уæ разы цы хæс ис, уый æххæст кæныныл зæрдиагæй архайдзыстæм кæддæриддæр» Уыцы ныхæстæй мад ноджы фæциндзастдæр æмæ йæ цæстытæ доны разылдта. Гари æцæгæйдæр бамбæрста уæд, йæ ныййарæг мады зæрдæйыл хур кæй ракаст йæ фендæй æмæ йæ æфсæддон хæс фæзминагæй кæй ахицæн кодта, уымæй.

1989 азы Гари æнтыстджынæй каст фæци Хъæууонхæдзарадон институты (ныр Хæххон паддзахадон аграрон университет) зоотехникон факультет, райста дзы зооинженеры дæсныйад. Уый фæстæ та ма сахуыр кодта МарксизмЛенинизмы университеты партион хæдзарадон хайады.

Гари уæлдæр ахуырад райсыны фæстæ фидарæй æрлæууыд фæллойадон æмæ æхсæнадон куысты фæндагыл. 1983-1991 куыста æфсæн-бетонаразæн заводы. Фыццаг уыд цехы хицау, фæстæдæр та сæйраг механик. Ам ноджы хуыздæр рабæрæг сты йæ зонды æмæ зæрдæйы фæзминагдæр миниуджытæ, куыд дæсны специалист æмæ куыстады организатор. Фæстæдæр та йæ снысан кодтой нæ горæты куыстадон базæтæй иуы директорæй. 1997-2013 азты та уыд акционерон æхсæнад «ТПП-1»-ы коммерцион директор. Уыцы рæстæг райдыдта Гарийы æхсæнадонполитикон архайд. 2007- 2012 азты æвзæрст æрцыд РЦИ-Аланийы 5 æрсидты Парламенты Сæрдары хæдивæгæй. Уæд æй снысан кодтой парти «Рæстаг Уæрæсе»-йы республикон хайады сæрдарæй дæр. Уæд сæрысуангæй аныгъуылд республикæйы политикон, æхсæнадон царды. Куыд Парламенты Сæрдары хæдивæг æмæ партион разамонæг, афтæ Гарийæн йæ куыст у нæ республикæйы иумæйаг рухс сомбоны сæраппонд, нæ адæмы бæллиццаг æмæ фæрнджын цардыл. Йæ æппæт хæстæ æмæ нысантæ кæддæриддæр фæзминагæй æмæ бæрнонæй кæй æххæст кæны Гари, уый тыххæй йæ дыккаг хатт 2017 азы 22 сентябры снысан кодтой РЦИ-Аланийы 6 æрсидты Парламенты Сæрдары хæ- дивæгæй. Уый та ма ноджыдæр иу хатт нысан кæны, Гари цы ахсджиаг æмæ бæрнон куысты бацыд, уым никуы фæсайдта нæдæр РЦИ-Аланийы Сæргълæууæг Битарты Вячеславы æмæ нæ республикæйы Хицауады, стæй йе ‘взарджыты æууæнк. Цины уа, хъыджы, бахъуыды æппæт рæстæджыты вæййы йæ адæмы фарсмæ. Куыд Парламенты бæрнон кусæг, афтæ Гари йе ‘ргом цы фарстатæм фылдæр здахы, уыдон баст сты экономикæйы, туризмы, хъæууон хæдзарады рæзтæн гæнæнтæ æмæ æппæтвæрсыг фадæттæ саразынимæ. Гари куыд нымайы, уымæ гæсгæ нæ республикæйы иуыл ахсджиагдæр сты ацы къабæзтæ. Сæ фæрцы хъæздыг уыдзæн Ирыстоны къазна, бæркадджын — нæ фынгтæ. Уымæй уæлдай, Кучийы-фырт зоны ныфс бавæрын, уый фæстæ та бæлвырд хъуыддæгтæ аразын. Уымæн æмæ йæ зæрдæ æххæст у ирондзинады, фарн æмæ намысы миниуджытæй. Уыдон та кæддæриддæр арæхстджынæй тауы нæ дзыллæйыл. Æмæ сæ арфæйæ хайджын у.

Гарийы зæрдиаг архайд республикæйы царды архайды къабæзты рæзтыл æнæ бафиппайгæ нæ фесты Хицауад дæр. Саккаг ын кодтой майдан «Ирыстоны намысæн». Уымæй уæлдай ма у политикон парти «Рæстаг Уæрæсе»-йы центрон советы уæнг. Ацы партийы разамындæй дæр æм ис цалдæр кадджын хорзæхы.

Ацы бонты Ирыстоны æцæг патриот, РЦИ-Аланийы Парламенты Сæрдары хæдивæг Кучиты Гари бæрæг кæны йæ юбилей. Уый фæдыл ын мах, газет «Рæстдзинад»-ы редакцийы кусджытæ, кæнæм зæрдиаг арфæ. Йæ бæрнон куысты нæ адæмы рухс фидæныл йæ архайд бæллиццаг æмæ æнтыстджын уæд!

ГАСАНТЫ Валерии

 

ОСТАВЬТЕ ОТВЕТ

Please enter your comment!
Please enter your name here