Битарты Вячеслав: “Сымах уæ фæллойæ кад кæнут республикæйæн”

0
44

 

Ивгъуыд æртыццæджы республикæйы Сæргълæууæг БИТАРТЫ Вячеслав бабæрæг кодта республикæйы районтæ.

Мæздæджы, Кировы æмæ Рахизфарсы районты цы кадджын æмбырдтæ арæзт æрцыд, уыдоны рæстæг Битары-фырт Ног азы арфæтæ ракодта районты алы къабæзты кусджытæн æмæ сын радта паддзахадон хæрзиуджытæ.

Уый тыххæй фехъусын кодта РЦИ-Аланийы Сæргълæууæджы æмæ РЦИ-Аланийы Хицауады пресс-службæ. Мæздæджы цы æмбырд сарæзтæуыд, уырдæм æрбахуыдтой, ахуырады, муниципалон службæйы, хъæууон хæдзарады, культурæ æмæ иннæ къабæзты бирæ азты дæргъы зæрдиаг куыст чи кæны, уыцы адæмы. Фембæлд байгом кæнгæйæ, Битары-фырт бæрæгбоны арфæтæ ракодта.

«Æхсызгон мын у сымахимæ абоны фембæлд. Сымах уæ фæллойæ кад кæнут республикæйæн. Уæ архайды фæрцы рæзынц ахуырад, хъæууон хæдзарад, культурæ æмæ нæ цардарæзты иннæ къабæзтæ. Сымах хуызæн фæлтæрдджын æмæ хъæппæрисджын адæмы фæрцы рæзы республикæ. Ног азы хорзæх уæ уæд», — фæнысан кодта республикæйы разамонæг.

Уый фæстæ æмбырды архайджытæ Цæгат Ирыстоны Сæргълæууæджы къухæй райстой сæ хæрзиуджытæ. «Республикæ Цæгат Ирыстон-Аланийы культурæйы сгуыхт кусæджы» кадджын ном лæвæрд æрцыд Луковскы сывæллæтты аивæдты скъолайы директор Михаил Царевæн.

Республикæ Цæгат Ирыстон-Аланийы Кады грамотæтæ райстой Мæздæджы районы бынæттон хиуынаффæйады администрацийы консультант Людмилæ Бабич, Тельманы номыл поселочы астæуккаг скъолайы физикæ æмæ математикæйы ахуыргæнæг Маринæ Ермолина, Мæздæджы зылды чырыстон аргъуанты архайдмæ цæстдарæг Артем Пономаренко æмæ Мæздæджы информацион-рауагъдадон центры сæйраг редактор Сергей Телевной.

Республикæйы Сæргълæууæджы Арфæйы фыстæджытæ саккаг кодтой фæдагурæн къорд «Поиск»-ы разамонæг Махмади Даулетовæн, Мæздæджы районы Центрон рынчындоны дохтыр-хирург Дзираты Вадимæн, æнæххæст бæрнондзинады æхсæнад «Дружба»-йы сæйраг агроном Галинæ Михайленкойæн, æнæххæст бæрнондзинады æхсæнад «Чистый город»-ы шофыр Николай Почип æмæ Мæздæджы районы Культурæйы галуаны патриотон хъомылады хайады хицау Вячеслав Хабитовæн.

Ахæм æхсызгон æмбырд сарæзтæуыд Кировы районы дæр.

«Цæгат Ирыстон йæ районтæй хъомысджын у. Уыцы æууæл зæрдыл даргæйæ, мæнæн æхсызгон у Ног азы агъоммæ алкæцы муниципалитет дæр бабæрæг æмæ фæллойгæнæг адæммæ бæрæгбоны арфæтæ фæхæццæ кæнын. Кировы район аккаг бавæрæн хæссы республикæйы дарддæры размæцыдмæ», — йæ арфæйы ныхасы фæбæрæг кодта Битарты Вячеслав.

«Республикæ Цæгат Ирыстон-Аланийы ахуырады сгуыхт кусæджы» кадджын ном лæвæрд æрцыд Елхоты бирæкъабазджын колледжы директоры хæдивæг Бигъаты Жаннæйæн. «Республикæ Цæгат Ирыстон-Аланийы хъæууон хæдзарады сгуыхт кусæджы» кадджын ном саккаг кодтой амалхъом Гуырцъыты Русланæн.

Республикæ Цæгат Ирыстон-Аланийы Кады грамотæтæ райстой Кировы районы Культурæйы хæдзары директор Хъазиты Дианæ, Кировы районы бынæттон хиуынаффæйады администрацийы ахуырады управленийы хицауы хæдивæг Тæлынты Фатимæ æмæ Кировы районы Центрон рынчындоны дохтыр Тотыккаты Фатимæ.

Цæгат Ирыстоны Сæргълæууæджы Арфæйы фыстæджытæ радтой Кировы районы адæмæн социалон лæггæдтæ кæныны комплексон центры кусæг Болататы Алинæйæн, Елхоты 1-æм астæуккаг скъолайы физикæйы ахуыргæнæг Гæдиаты Земфирæйæн, Кировы районы бынæттон хиуынаффæйады администрацийы адæмы социалон хъахъхъæнынады управленийы хайады хицау Дзгойты Фатимæйæн, Кæрдзыны Культурæйы хæдзары аивадон разамонæг Плиты Альбинæ æмæ Зæхкусæг-фермерон хæдзарæдтæ æмæ хъæууонхæдзарадон кооперативты ассоциацийы разамонæг Фидараты Хасанбегæн.

Уырдыгæй Битарты Вячеслав йæ фæндаг акодта Беслæнмæ.

«Республикæйы иннæ муниципалитетты æмрæнхъ Рахизфарсы район дæр рæзы, кусы, ахуыр кæны. Цалцæггонд цæуынц уынгтæ æмæ фæзтæ, аивдæр кæнынц парктæ æмæ сквертæ, куыст цæуы цæрæн хæдзæртты, культурæ æмæ спорты объектты арæзтæдты. Фидарæй мæ уырны, район дарддæр дæр рæзты фæндагыл æнтыстджынæй кæй цæудзæн, уый», — бафиппайдта республикæйы разамонæг.

«Республикæ Цæгат Ирыстон-Аланийы промышленносты сгуыхт кусæджы» кадджын ном лæвæрд æрцыд æнæххæст бæрнондзинады æхсæнад «Бесланспецсервис»-ы кусæг Дзуццаты Эльбрус æмæ æнæххæст бæрнондзинады æхсæнад «Бесланэнерго»- йы сæйраг инженер Токаты Максимæн.

Республикæ Цæгат Ирыстон-Аланийы Кады грамотæтæ райстой Рахизфарсы районы бынæттон хиуынаффæйады администрацийы цæрæнуæтты политикæйы фарстаты фæдыл управленийы хицауы хæдивæг Айларты Зæринæ, Рахизфарсы районы донуадзæнты-канализацион хæдзарады сæйраг инженер Хъараты Владимир æмæ Рахизфарсы районы бынæттон хиуынаффæйады администрацийы финансон управленийы хайады хицау Гусаты Фатимæ.

РЦИ-Аланийы Сæргълæууæджы Арфæйы фыстæджытæ саккаг кодтой Рахизфарсы районы адæмæн социалон лæггæдтæ кæныны комплексон центры кусæг Айларты Марияйæн, Рахизфарсы районы адæмæн социалон лæггæдтæ кæныны комплексон центры хайады хицау Дзуццаты Фатимæйæн, æнæххæст бæрнондзинады æхсæнад «Бесланэнерго»-йы хайады инженер Мамыкъаты Русланæн, Беслæны 6- æм рæвдауæндоны хицауы хæдивæг Наталья Пучкова æмæ Рахизфарсы районы бынæттон хиуынаффæйады администрацийы адæмы социалон хъахъхъæнынады управленийы хицауы хæдивæг Цоколаты Бертæйæн.

 

ОСТАВЬТЕ ОТВЕТ

Please enter your comment!
Please enter your name here