Фарны фæндагыл

0
34

 

Ног азы къæсæрыл Ирыстоны рагондæр хъæутæй иу Хуымæллæджы цæрджытæ кадджын уавæры сбæрæг кодтой сæ адæмон театры 55 азы юбилей. Уый кадæн йæ аивадон разамонæг æмæ режиссер, РЦИ-Аланийы адæмон артист, драматург АЙЛАРТЫ Асæхмæт театры хæдахуыр артисттимæ бацæттæ кодтой ног спектакль «Æрæджиауы хорзæх».

Премьерæмæ æрбамбырд сты хъæубæсты цæрджытæ хистæрæйкæстæрмæ, РЦИ-Аланийы Культурæйы министрад æмæ Рахизфарсы районы бынæттон хиуынаффæйады администрацийы куль- турæйы управленийы минæвæрттæ, Ирон академион театры артисттæ, республикæйы адæмон сфæлдыстады хæдзары директор Цæриаты Валери, республикæйы адæмон сфæлдыстады хæдзары традицион куль- турæйы хайады сæргълæууæг Битарты Ларисæ, адæмон кæфтыты хайады сæргълæууæг Цориты Мæдинæ, дзыллон хабархæссæг фæрæзтæ æмæ æхсызгонæй бакастысты хуымæлæггаг хæдахуыр артистты сфæлдыстадон æнтыстытыл дзурæг спектакльмæ.

— Хуымæллæджы адæмон театры разамонæгæй кусын цыппар азы. Уыцы рæстæгмæ сæвæрдтам цыппар спектаклы. Ис нæм сывæллæтты театралон студи дæр. Спектаклы хъуыды у, адæймаг йæ хъысмæты ныхмæ куы цæуа, цасфæнды дзы куы лидза, уæддæр Хуыцау цы зæгъа, уымæн æнæ æрцæугæ нæй. Хæдахуыр артисттимæ у æнцон кусæн, уымæн æмæ уарзынц аивад. Сты фылдæр хистæр кары минæвæрттæ. Æппæты хистæр Хъуылаты Акимыл цæуы 79 азы, Дзгойты Сергей у гыццыл кæстæр. Уыдонæй уæлдай ма спектаклы хъазынц Дулаты Альбинæ æмæ Куыдзиаты Владислав. Репетицитæ вæййынц къуыри дыууæ хатты, премьерæйы размæ та ноджы арæхдæр.

Мæ размæ ацы театры куыстой аивады зындгонд адæм: Цæлыккаты Мæирбег, Макгæты Арсен, Мæхъиты Валодя, Гайты Михал, Галазты Земфирæ, Дзудтæгаты Хъазыбег, Бекмæрзты Æхсар, Цæлойты Федя, Цæриаты Валери æмæ иннæтæ. Ферохгæнæн нæй Дзудтæгаты Хъазыбеджы удуæлдай лæггæдтæн. Уавæртæм гæсгæ уыцы-иу рæстæг куыста Кæсæг-Балхъары республикæйы дæр. Уæд Хуымæллæджы адæмон театр фæкæсынхъуаг уыд режиссеры хъуыддæгтæй æмæ-иу къæвда уа, хурбон, йæ фæндаг Налцыккæй ракодта, цæмæй ацы адæмон театр фæстæмæ йæ къæхтыл слæууын кæна.

Алы рæстæджыты дзы сценæйы архайдтой Ирыстоны фыццаг Президент Галазты Æхсарбег, ирон адæмон зарæджы дæсны Кæсæбиты Митя, фæллойы ветерантæ Беруаты Ирбег, Куыдзиаты Коля, Æгкацаты Батрадз, Аслæнбег, Хасанбег æмæ Эльбрус, Дулаты Земфирæ, Акъуаты Людæ, Икъоты Людæ, Наниты Ленæ, Дзудтæгаты Эльмæ æмæ Эльзæ, Æлбегаты Таймураз, Эльзæ æмæ æндæртæ. Премьерæйы фæстæ нæ зæрды ис районы хъæутæ бабæрæг кæнын. Республикæйы æддæ нæма уыдыстæм, фæлæ нын Хуымæллæджы колхозы сæрдар Кæсæбиты Барис зæрдæ бавæрдта, адæмон театрты фестивальмæ нын нæ къух кæй сараздзæн, цæмæй нæ аивад иннæ адæмыхæттытæн дæр равдисæм. Къуырттон карк йæ цъиуты йæ базырты бын куыд бакæны, афтæ нын æххуыс кæны æмæ йæ цæрæнбон бирæ. Хуымæллæджы тынг бирæ курдиатджын адæм ис, — загъта Айларты Асæхмæт.

Хуымæллæджы Культурæйы хæдзары ис æппæт мадзæлттæ дæр культурон программæттæ аразынæн, уæлæмхасæн къордты архайынæн, куыд хистæр кары цæрджытæн, афтæ кæстæртæн дæр. У хорз цалцæггонд. Зæрдæ йæ уындæй райы. Культурæйы хæдзары директор Цæболты Заремæ йе ‘мкусджытимæ ацы хъуыддаджы сты арфæйаг. Сæвæрдтой ма спектакльтæ Айларты Асæхмæты «Æз дæр дæ куы уарзын», Фларид Бульяковы «Уарзыс нæ уарзыс», Хуыгаты Георы «Сæтти æмæ Бæтти» æмæ афтæ æндæртæ. Фидæны та сæ зæрды сæвæрын ис, фылдæр ар- хайджытæ кæм ис, ахæм спектакль. Æдæппæтæй театры артисттæ сты дыууадæс, кæстæр къорд та — фынддæс.

— Алы æртæ азы фæстæ дæр махæн нæ размæ вæййы хæс, нæ республикæйы адæмон театртыл æрзилын, фенын сын сæ куысты хæрзхъæддзинад æмæ сбæрæг кæнын, адæмон театры ном хæссыны аккаг сты æви нæ, уый. Театрты размæ вæййы ном бахъахъхъæныны хæс. Адæмон театртæ республикæйы ис 16. Мæздæджы адæмон театры фæстæ æппæты рагондæр у Хуымæллæджы театр. Фидарæй мæ бон зæгъын у, Хуымæллæджы адæмон театр кæй у республикæйы адæмон театртæн сæ хуыздæр. 55 азы дæргъы йæ фæндаг нывæзт у алы хуызы æнкъарæнтæй. Театры кадимæ фæкуыстой ирон профессионалон сценæйы дæснытæй дæр бирæтæ. Хъæубæсты цæрджытæй Галазты Æхсарбегæй райдай æмæ хуымæтæг колхозонтæй фæу. Абоны спектакль канд республикæйы нæ, фæлæ йæ ныфсджынæй равдисæн ис иннæ регионты дæр. Бузныг режиссерæн! «Браво!», — загъта Битарты Ларисæ.

Айларты Асæхмæт арфæ ракодта, премьерæйæн йæ уды фарн æмæ бæркадæй чи балæггад кодта, уыдонæн. Хъæубæсты цæрджыты номæй арфæтæ ракодта Куыдзиаты Таймураз.

— Адæмон театры æнцон бакусæн нæу, — загъ- та Таймураз. Хъæу фидауы рæсугъддзинадæй, культурон мадзæлттæй, хорз хъуыддæгтæй æмæ уæ къухы фылдæр бафтæд!

«Тагъд адæмон къордтæ профессионалонтæй зын раиртасæн уыдзысты»— загъта Цæриаты Валери театры архайджытæн æмæ Кады гæххæттытæй схорзæхджын кодта артистты, æмæ сæрмагондæй, Культурæйы хæдзар, театралон аивад хъæубæсты цæрджыты æхсæн кæй парахат кæнынц, сæ аивадæй кæстæртимæ хъомыладон куыст кæй кæнынц, уый тыххæй.

Хуымæллæджы адæмон театрæн лæвæрд æрцыд режиссер Дзудтæгаты Хъазыбеджы ном. Фидарæй нæ уырны, хъæубæсты цæрджытæ йæ кадимæ кæй хæсдзысты.

ХЕТÆГКАТЫ Оксанæ Авторы ист къамтæ

ОСТАВЬТЕ ОТВЕТ

Please enter your comment!
Please enter your name here