Хъахъхъæнут уæхи цæстфæлдахджытæй!

0
70

 

Фæстаг рæстæг Уæрæсейы Федерацийы æмæ уыимæ, Республикæ Цæгат Ирыстон-Аланийы дæр, сарæх сты чырæг бастдзинад æмæ Интернеты гæнæнтæй пайдагæнæг цæстфæлдахджыты митæ.

Зæгъæм, банчы кусæджы хуызы уын фехъусын кодтой (СМС-хъусынгæнинаджы фæрцы, кæнæ та телефонæй æрбадзургæйæ) уæ банчы картæ æхгæд æрцыд, æмæ йæ байгом кæныны тыххæй хъуамæ фехъусын кæнат йæ номыр æмæ йæ пароль, кæнæ та банкоматы фелхъивут уæ сусæг нымæцтæ (иу банк дæр, цалынмæ офисмæ æрбацæуат æд паспорт, уæдмæ уын иунæг операци дæр нæ сараздзæн, нæдæр картæ байгом кæнынæн, нæдæр æй ногæй баивынæн æмæ афтæ дарддæр). Ахæм хабар фехъусгæйæ, йæ уæлвæд бадзурут банкмæ, чи уæм дзура, уыдоны курдиæттæй мацы æххæст кæнут, телефонæй сын мацы хъусын кæнут.

Æрбадзырдтой уæм компанийы кусæджы хуызы, фехъусын уын кодтой, рамбылдтай лотерейæ, фæдзæхсты фиддон дæм æрбацыд, тæрхондоны уынаффæмæ гæсгæ уæм æрхауд, кæнæ уын уæ фыдæлтæй баззад исбонад, фæлæ уыцы исбонад æмæ фиддонтæ райсыны тыххæй бафидын хъæуы сымахмæ сæ фæхæццæ кæныны тыххæй (иунæг æууæнккаг коммерцион организаци, кæнæ паддзахадон структурæ дæр ахæм хуызы нæ хъусын кæндзæн æвиппайды æфтиаджы тыххæй, сбæлвырд кæнут хъусынгæнинаг, кæнæ Интернеты фæрцы, кæнæ та компанийы офисы).

Сфæнд кодтат æлхæнын (уæй кæнын) исты исбонад (автомашинæ, цардыуаджы техникæ, уæлæдарæс, медицинон хостæ æмæ афтæ дарддæр, кæнæ агурут истыхуызон лæггæдтæ (куыст ссарыны, ахуыры, цардыуаджы лæггæдтæ æмæ афтæ дарддæр) Интернеты. Ссардтат бæллиццаг аргъæй исты товар кæнæ лæггад, фæлæ уæ уæйгæнæг, кæнæ æлхæнæг домы рагагъоммæ бафидын. Товарæн кæнæ лæггадæн мацы хуызы бафидут нæдæр æнæхъæнæй, нæдæр йæ иу хай, цалынмæ лæггад кæнæ товар уæхимæ бахауа, уæдмæ! Бацархайут лæгæй-лæгмæ фембæлыныл æмæ лæмбынæг сбæлвырд кæнут информаци! Интернеты фæрцы уæ исбонад куы уæй кæнат, уæд макуы макæмæн хъусын кæнут уæ банчы картæйы сусæгдзинæдтæ æлхæнæгæн рагагъоммæ фиддон райсыны тыххæй!

Æрбадзырдтой æмæ сæхи схуыдтой паддзахадон службæгæнæг, тыхы структурæйы кусæг æмæ уын заказ кæнынц уæ лæггæдтæй спайда кæныны фæнд, уыимæ бадзырд сфидар кæныны тыххæй курынц, сæхи цы ведомствойæ схуыдтой, уыцы агъуысты цурмæ æрбацæуын. Фæстæдæр уæм æрбадзырдтой æмæ курынц, цæмæй сын, фæндагыл цæугæйæ, сæ телефоны æхца сæвæрат, сæхицæн куыстæй фезмæлæн кæй нæй, уымæ гæсгæ куы фембæлат, уæд уын уыцы æхца фæстæмæ раттынæй зæрдæ бавæргæйæ. Ма сыл æууæндут! Паддзахадон службæ æмæ тыхы структурæйы минæвæрттæ ахæм финансон лæггæдтæ никуы фæкурынц адæмæй. Цырддзаст ут, ма басæттут сæ ныхæстæн.

Интернеты фæрæзты фæрцы уæм æрбацыд кредит райсыны курдиаты гæххæттытæ бацæттæ кæныны фæндон, фæстæдæр уæм телефонæй æрбадзырдтой æмæ сæхи схуыдтой банчы, кæнæ финансон организацийы кусæг. Курынц фиддонтæ гæххæттытæ бацæттæ кæныны тыххæй (кредиты фæдзæхстадæн, гæххæттытæ дæрддзæфмæ цæттæгонд кæй цæуынц, курьеры лæггæдтæ æмæ афтæ дарддæр). Мацы бафидут! Официалон банкты, стæй микрофинансон организациты гæххæттытæ дæрддзæфмæ цæттæ кæныны тыххæй лæггæдтæн ницы фидын хъæуы, цалынмæ кредитон бадзырд цæттæгонд æрцæуа, уæдмæ.

Телефонæй уæм дзурынц барадхъахъхъæнæг оргæнты, кæнæ бынаты кусæджы хуызы. Хъусын уын кæнынц, уæ хæстæг фæндаггон фыдбылызы бахауд, фыдракæнд ракодта, хуыссы рынчындоны æмæ афтæ дарддæр, æмæ йын бафидын хъæуы ивар, хъалон, балхæнын æй хъæуы. Сабыр, цырддзастдæр ут, ма фæтæрсут! Чи уæм дзура, уый бæлвырд æрфæрсут, бæллæхы чи бахауд, уыцы хæстæгæй! Бафæлварут уæ хæстæгæн йемæ аныхас кæнын! Уе ‘хца макуы дæттут æнæзонгæ адæймæгтæм, уæлдайдæр та сæ ма æрвитут æнæзонгæ телефонты номыртæм, кæнæ банкты картæтæм.

Социалон хызты «Контакты» кæнæ «Одноклассникты» уæ сæрмагонд фарсмæ æрбацыд хъусынгæнинаг уæ зонгæйæ æхца æфстау курыны тыххæй. Макуы æрвитут æхца æнæзонгæ телефоны номыртæ æмæ банкты картæтæм. Æппæты растдæр у, бадзурут уæ зонгæмæ æмæ сбæлвырд кæнут, уыцы хъусынгæнинаг уый æрбарвыста æви нæ, уый.

Кæй нæ зонут, ахæм абонентæй райстат СМС кæнæ ММС ахæм фæндонимæ, цæмæй байгом кæнат хуызист, открыткæ, кæнæ музыкæ.

Уыцы хъусынгæнинæгты фæдыл ма фидар кæнут, зонгæ уын цы фæрæзтæ не сты, уыдоны уæлæмхасæнтæ.

Федтат рекламæ экстрасенсты лæггады тыххæй, æппæт низтæй дæр чи дзæбæх кæны, ахæм медицинон прибортæ, бадзырдтат, рекламæйы цы телефонты номыртæ æвдыст цæуы, уыдонмæ, æмæ уын зæрдæ бавæрдтой дæрддзæфмæ баххуысæй. Ма сыл æууæндут! Дæрддзæфмæ диагноз сæвæрæн нæй.

Кæд цæстфæлдахджыты азары бахаудыстут, уæд æвæстиатæй бадзурут пъæлицæйы радхæссæг хайадмæ: 02 (чырæг телефонæй та — 102) кæнæ РЦИ-Аланийы Мидхъуыддæгты министрады «æууæнчы телефон»-мæ (йæ номыр — 8(8672) 59-46-99).

ОСТАВЬТЕ ОТВЕТ

Please enter your comment!
Please enter your name here