Ирон дзырдаивады фидиуæг

0
57

 

Нæ рагфыдæлтæ нын стыр хæзнатæ ныууагътой: дурæй амад фидæрттæ, сæ миддунейы арф философи, сæ æвидигæ культурæ, сæ диссаджы уæздандзинад, фæлæ уыдонæн сæ сæйраджы сæйрагдæр у мадæлон æвзаг

Нæ дуджы та уыдон бахъахъхъæныныл кусы Къостайы номыл паддзахадон премийы лауреат газет «Рæстдзинад». Ныр 96-æм аз ацы газет алы ирон къонайы дæр уалдзыгон хъарм хуры тынтау рæвдауы йæ фарны ныхасæй.

Фæуд кæны газет «Рæстдзинад»-ы рафыссыны рæстæг. Нæ ирон мадæлон æвзагыл æнувыд чи у, уый развæлгъау катай кæны, йæхи дзыхæй ирон чи хоны, йæ риу тымбыл къухæй чи хойы, уыдонæн та лæгъстæ кæнын куы хъæуа, рафыссут газет «Рæстдзинад», зæгъгæ. Ирон æвзаг рагон кæй у, уый алчидæр зоны. Хæххон донау йæхи цæгъдгæ фæцыди йæ дард фæндæгтыл æмæ нæм 95 азы дæргъы нæ ирон адæмон газет «Рæстдзинад»-ы фæрстыл æнцойгæнгæ йæ рæууон улæфт æмæ йæ удрæвдауæг азæлд фарнимæ æрхаста.

Ацы аз нæ адæмон газет йæ 95 азы юбилей куы бæрæг кодта, уæд мæ йæ историон царды фæндæгтæ дисыл бафтыдтой. Цас цæлхдуртæ ‘взæрд йæ разы, цас фыдæбæттæ бавзæрста йæ фæзындæй фæстæмæ, фæлæ уæддæр нæ буц куырыхон хистæрты руаджы бахъахъхъæдта æнусон хæзнадон, дзырдаивады фарнæй хурзæрины тынтау ирд тæмæнтæ калдта. Дæргъвæтин азты нын не уæнгты уадзы ныфс æмæ хъару, йе ‘рмæджытæй нын аив кæны нæ миддуне, разæнгард нæ кæны нæ фидæны рæсугъд цардмæ. Нæ мадæлон æвзаджы хъысмæт нæхицæй аразгæ у, æмæ нæ рох ма уæд, газет «Рæстдзинад» йæ рæбинагдæр цæджындз кæй у, уый. Ма йæ бауадзæм фæцудын, ма фесафæм нæ фидæн, нæ сомбон.

Нæ рухс дзæнæты бадинаг хистæртæ дзырдтой сæрыстырæй: «Æгъдау, æфсарм æмæ мадæлон æвзаджы бардуæгтæ сты бинонтæ, ахуыргæнæг, скъола æмæ чиныг». Мадæлон æвзаг сабитæн амоны фыдæлтыккон хæрзæгъдæуттæ, сæ сусæг æвæрæнтæ, æмæ уыдон та раргом кæнæн ис сабиты ныййарджытæ, скъола æмæ ахуыргæнджыты ‘хсæн иумæйаг зондахастæй.

Мах не скъолайы ахуыргæнджытæй стыр бузныг стæм, хурау нæ кæй тавынц, нæ сомбоны цардвæндагыл нæ зонды бæрзæндтæм кæй разæнгард кæнынц, сæ зонындзинæдтæ нын кæй не ‘вгъау кæныц, уый тыххæй. Иууыл æхсызгон та нын уый у, сæ урокты кæй пайда кæнынц газет «Рæстдзинад»-ы фæрстыл фыст уацхъуыдтæй. Уымæй нын нæ зæрдæты гуырын кæнынц фылдæр уарзондзинад нæ адæмон газетмæ, нæ мадæлон æвзагмæ. Рæзгæ фæлтæры разæнгард кæнынц сæ хъарутæ сфæлдыстадон куыстмæ фæлварыныл.

Арæх газет «Рæстдзинад»-ы фæрстыл бакæсæн вæййы нæ гимназы ахуырдзаутæ Бестауты Линæйы (10-æм къласы ахуырдзау) æмæ Тотраты Зауыры (11-æм къласы ахуырдзау) æмдзæвгæтæ, чысыл уацхъуыдтæ. Хорз уаид, Ирыстоны алы скъолаты дæр куы пайда кæниккой ахæм куысты хуызтæй, хатын куы никæмæн хъæуид, рафыссут ирон газет «Рæстдзинад», зæгъæ.

Бауарзæм нæхи, цæмæй ма фæуæм кæйдæрты фæндиаг. Уæлдай æнæзæрдæмæ цæуинаг та уый у, ныййарджытæй бирæтæ мадæлон æвзагыл сæ къух кæй систой, скъолайы ахуыргæнгæйæ, сæ сабиты ирон къордтæй кæй ракæнынц, ирон æвзаг дыккаг кæмæн у (иронау чи нæ зоны), уыцы къордтæм. Сæ ныхас вæййы цыбыр æмæ æлгъаг: «Кæм нæ бахъæудзæн ирон æвзаг?» Ахæм ныййарджытæ сæхиуыл худинаджы гакк æвæрынц. Алчидæр хъуамæ зона царды æцæгдзинад: йæхи чи нæ уарзы, уый никæй уарзы, йæхи чи нæ зоны, уый никæй зоны, ничийы ном ыл бады. Ирон лæг хъуамæ баззайа иронæй. Не ‘взаджы хъысмæт аразгæ у не ‘ппæтæй дæр, æмæ йыл хъуамæ иумæ зæрдиагæй кусæм.

Зынаргъ газеткæсджытæ, Ирыстоны интеллигенци, патриоттæ, скъолаты директортæ, ирон æвзаджы ахуыргæнджытæ æмæ хистæр кълæсты ахуырдзаутæ! Ма бауадзæм нæ фарн æмæ хæлардзинад тауæг фидиуæджы зынг ахуыссын, фæлæ йæ сæууон стъалыйау тæмæнтæ калгæ ноджы бæрзонддæр сисæм!

Рафыссæм нæ царды рухстауæг — газет «Рæстдзинад», цæмæй ирон дзырдаивады рæсугъд зæлтæ хъуысой нæ алы фæрныг хæдзарæй дæр.

ДРИАТЫ Дианæ, Дзæуджыхъæуы 4-æм гимназы 11-æм къласы ахуырдзау

 

ОСТАВЬТЕ ОТВЕТ

Please enter your comment!
Please enter your name here