Ивгъуыд азы бæрæггæнæнтæ æмæ фидæны нысантæ

0
41

 

Цæгат Ирыстоны Сæргълæууæг БИТАРТЫ Вячеславæн знон кусæг фембæлд уыд Дзæуджыхъæуы бынæттон хиуынаффæйады администрацийы разамонæг ÆЛБЕГАТЫ Барисимæ. Ныхасы рæстæг æркастæуыд Дзæуджыхъæуы 2018 азы социалон-экономикон архайды бæрæггæнæнтæ æмæ фидæны нысантæм. Уый тыххæй фехъусын кодта РЦИ-Аланийы Сæргълæууæджы æмæ РЦИ-Аланийы Хицауады пресс-службæ.

Фембæлды райдайæны Æлбегаты Барис фехъусын кодта æхсызгон хабар: æппæтуæрæсеон конкурсы бæрæггæнæнтæм гæсгæ, Дзæуджыхъæу нымад æрцыд конкурс «Город России — национальный выбор»-ы уæлахиздзауыл.

— 2018 азы Цæгат Ирыстоны сæйраг горæт архайдта сæрмагонд проект «Город России — национальный выбор»-ы. Уыцы конкурсы нысан уыд, историон æмæ культурон хæзнатæй хъæздыг чи у, уыцы уæрæсейаг горæтты ‘хсæн хуыздæры равзарын. Интернет-хъæлæскæнынады фæрцы Дзæуджыхъæу (нæ республикæйы сæйраг горæтыл радтæуыд 400 мин хъæлæсæй фылдæр) нымад æрцыд конкурсы уæлахиздзауыл. Æмткæй райсгæйæ та, конкурсы архайæг горæттыл схъæлæс кодтой 6 милуан адæймагæй фылдæр. Уыцы конкурсы бæрæггæнæнтæ хынцгæйæ, горæты разамынд фылдæр æргом аздахдзæн туризмы къабазы райрæзтмæ, сæрмагонд цæстдард уыдзæн горæты фæлгонцад æмæ инфраструктурæйы объектты нывылдзинадмæ, — йæ ныхасы фæбæрæг кодта Æлбегаты Барис.

Ивгъуыд азы бæрæггæнæнтыл дзургæйæ, горæты администрацийы сæргълæууæг куыд фæнысан кодта, афтæмæй къухы бирæ хъуыддæгтæ саразын бафтыд. Зæгъæм, азы дæргъы бындуронæй рацарæзтой 36 бирæфатерон хæдзары кæртытæ. Алкæцыйы дæр дзы сæвæрдтой бандæттæ, раивтой рухсы цырæгътæ, хæдзæрттæм бахизæнтæ æрæмбæрзтой ног асфальтæй… Цалцæггæнæн куыстытæ кæм цыд, уыцы объекттæй иу уыд Хетæгкаты Къостайы номыл фæлладуадзæн Центрон парк дæр. Парчы фæлгонцадон куыстытæн ивгъуыд аз дихгонд æрцыд 70 милуан сомы. Куыстыты фыццаг къæпхæн ахицæн декабры. Куыддæр фæхъарм уа, афтæ аразджытæ бавналдзысты парчы рацарæзты дыккаг къæпхæнмæ. Уыцы куыстытæ та хъуамæ ахицæн уой ацы азы 1 ноябрмæ. Куыстыты дыккаг къæпхæнæн федералон бюджетæй дихгонд æрцæудзæн 70 милуан сомы бæрц. Ивгъуыд аз бæстон цæстдард цыд горæты фæндæгты уавæрмæ дæр. Фæндæгты арæзтад æмæ цалцæгæн азы дæргъы дихгонд æрцыд 500 милуан сомы бæрц.

— Ацы аз та Дзæуджыхъæуы фæндæгты хæдзарадæн дихгонд æрцæудзæн 600 милуан сомы. Æппæт мадзæлттæ дæр саразын хъæудзæн, цæмæй уыцы фæрæзтæй хæдзардзинæй пайдагонд æрцæуа. Ацы азы кæронмæ горæты сæйрагдæр уынгтæ хъуамæ зынгæ фæнывылдæр уой. Курæг дæ дæн, цæмæй сæрмагонд æргом аздахат тротуартæм дæр. Не ‘ппæт дæр уынæм, тротуарты уавæр зæрдæзæгъгæ кæй нæу, уый. Уыцы æууæл хынцгæйæ, рагацау снысан кæнын хъæуы тендертæ, цæмæй рагагъоммæ бæрæггонд æрцæуой подрядон организацитæ. Уый фадат ратдзæн, цæмæй уалдзæджы райдайæнмæ куыстыты фæтк бæлвырдгонд æрцæуа, — ахæм ныстуан Битарты Вячеслав радта горæты администрацийы разамонæгæн.

Ацы аз адарддæр уыдзæн трамвайты фæндæгтæ ивыны куыст дæр. Куыд нысангонд цæуы, афтæмæй Къостайы проспекты раивдзысты трамвайты фæндæгты 2 километры бæрц.

Нæ уацхæссæ

ОСТАВЬТЕ ОТВЕТ

Please enter your comment!
Please enter your name here