Ног аз райдыдтой уæлахизæй

0
40

 

Ног азы каникулты рæстæг æвзонг футболисттæн Ессентукийы цы «Цыппурсы турнир» арæзт æрцыд, уым сæ арæхстдзинад æвдыстой Дзæуджыхъæуы футболон скъола «Юность»-ы 2006 азы гуырд ахуыргæнинæгтæ дæр

Турниры ма хъазыдысты: Стъараполы, Ессентукийы, Кисловодскы, Махачкала æмæ Волгограды æрыгон футболистты 8 командæйы.

Ирыстойнаг лæппутæ сæ дæлкъорды рамбылдтой сæ æртæ ныхмæлæууæгæй дæр æмæ бацахстой фыццаг бынат. «Юность» фыццаг фæуæлахиз Стъараполы «ДЮСШ-2»-ыл 3:0 хыгъдæй. Уый фæстæ фембæлд Махачкалайы командæимæ, æмæ та ам дæр нæ лæппутæ рамбылдтой 3:0 хыгъдæй. Дæлкъорды «Юность» йæ фæстаг хъазт акодта Ессентукийы командæимæ, æмæ та ацы фембæлды дæр нæ лæппутæ фæуæлахиз сты 1:0 хыгъдæй.

Афтæмæй, дæлкъорды хъазгæйæ, дзæуджыхъæуккæгтæ æртæ хъазтæн сæ ныхмæлæуджыты кулдуæртты бакъуырдтой 7 пуртийы, сæхи хызы та иу пурти дæр нæ бауагътой. Æрдæгкæронбæттæны нæ командæ фембæлд дæлкъорд «Б»-йы 2-аг бынат бацахсæг “Кисловодск»-имæ. Сæ хъазуатон ныхмæлæуд ахицæн 0:0 хыгъдæй, æмæ хъазты хъысмæт лыггонд æрцыд 11-метрон цæфты фæрцы. Ацы ран нæ лæппутæ равдыстой хуыздæр арæхстдзинад æмæ фæуæлахиз сты 4:3 хыгъдæй.

Кæронбæттæны нæ футболистты ныхмæлæууæг уыдис Стъараполы 2-аг командæ. Сæ фембæлд рауад тынг цымыдисаг æмæ ахицæн 1:1 хыгъдæй. Хъазты хъысмæт та ам дæр бæрæггонд æрцыд 11-метрон цæфты ‘руаджы. Нæ лæппутæ та ацы хатт дæр разындысты рæстдзæвиндæр æмæ фæуæлахиз сты 4:3 хыгъдæй. «Юность» ссис турниры уæлахиздзау æмæ йын лæвæрд æрцыд сæйраг хæрзиуæг — «Цыппурсы турнир”-ы Кубок.

Уымæй уæлдай ма нæ хъазджытæ Лелаты Ацæмæз æмæ Хуыбецты Давид сæрмагонд лæвæрттæ райстой куыд «Хуыздæр дуаргæс» (Лелаты Ацæмæз) æмæ «Хуыздæр хъазæг» (Хуыбецты Давид).

Нæ командæйы тренер Хъæцмæзты Алан, йæ хъомылгæнинæгтæ сæхи куыд равдыстой, уый тыххæй зæгъы: «Нæ лæппуты хъазт тынг фæцыд спортуарзджыты зæрдæмæ. Лелаты Ацæмæз æмæ Хуыбецты Давидæй уæлдай ма спортуарзджытæ æмæ специалистты зæрдæмæ фæцыди Черчесты Эрик, Цхуырбаты Олег æмæ нæ иннæ лæппуты хъазт. Æз стыр бузныг зæгъын нæ хъомылгæнинæгты ныййарджытæн. Уыдоны фæрцы нын бантыст ахæм хъæугæ турниры архайын. Хъыгагæн, ахæм турнирты архайынæн нын фаг гæнæнтæ нæ вæййы, æмæ уый хорзæрдæм нæ зыны нæ хъомылгæнинæгты рæзтыл. Иу хатт ма стыр бузныг ныййарджытæн. Мæнмæ гæсгæ сын сæ кæстæртæ сæ хъазтæй хорз дзуапп радтой!»

БАСКАТЫ Уырызмæг

ОСТАВЬТЕ ОТВЕТ

Please enter your comment!
Please enter your name here