Уæздан æмæ цæстуарзон

0
30

 

Йæ царды фылдæр хай ирон чиныг æмæ дзырдаивады хæрзæбонæн чи снывонд кодта, уыцы кусджыты хистæр фæлтæрæй иу у ЛАГКУТЫ-ЧЪЕРДЖИАТЫ Ольгæ. Ивгъуыд æнусы 60-æм азты уый фыццаг хатт æрбахызт рауагъдад «Ир»-ы къæсæрæй, куыд корректор. Фæстæдæр та йæ раивтой секретары бынатмæ. Æхсызгонæй æрымысы, кусынмæ фыццаг бон куы рацыд, æмæ йыл рауагъдады коллектив хистæрæй-кæстæрмæ куыд зæрдиагæй сæмбæлдысты, уый. Æмæ сын Ольгæ дæр йæ лæггадæй, æгъдауæй, аккаг æмæ арфæйаг дзуапп лæвæрдта. Рауагъдады алы кары фæлтæр дæр æм каст узæлгæ цæстæй. Дардтой йæм чызг æмæ хойы зæрдæ.

Абон дæр Ольгæйы зæрдыл лæууынц рауагъдадмæ кусынмæ куы æрбацыд, уæд дзы кæй æрæййæфта уыдон: Зæнджиаты Дæкка, Дойаты Никъала, Мыртазты Барис, Цæрукъаты Алыксандр (зындгонд поэт суанг Ольгæйы фыд Елхъаны дæр зыдта, иумæ ахуыр кодтой Цæгат Ирыстоны паддзахадон педагогон институты, ныры университеты филологон факультеты), Богазты Умар, Тлаттаты Аннæ, Валентинæ Ларина Беккуызарты Тинæ, Голиаты Ася, Асмик Манукян… Уыдон æрыгон чызгмæ куыд рæдау цæстæй кастысты, ахæм зæрдæ дардтой сæ кæрæдзимæ дæр.

Ахæм уарзæгой ахасты фæрцы, Ольгæ йæ миднымæры фидарæй скарста, йæ цард ирон чиныджы авдæн — рауагъдад «Ир»- имæ баст кæй уыдзæн, уый. Мæскуыйы райста уæлдæр ахуырад. Каст фæци полиграфион институт. Æмæ ног зонындзинæдтимæ, ноджы разæнгарддæр тыхтимæ бавнæлдта йæ хæстæ æххæст кæнынмæ. Куыста республикæйы типографийы технологæй, фæстæдæр та — куыстады разамонæгæй. Æмæ уыцы къæпхæнтыл кад æмæ радимæ цæугæйæ Ольгæ нысангонд æрцыд рауагъдады экономистæй. Советон цардарæзты рæстæг чиныг куыд кадджын уыди адæмы цæсты, ахæм бæрзонд аргъ ын кодта хицауад дæр. Уыцы ахаст та хорзæй зынд рауагъдады алы специалисты куыстыл дæр.

Ольгæ куыд зæгъы, афтæмæй сæ алчидæр йæ куыст кодта зæрдиагæй æмæ зиуцæдисæй. Уыцы равг рауагъдадæн фадат лæвæрдта йæ хæстæ бæлвырд, æнæ рæдыдæй афоныл æххæст кæнынæн. Ахæм уæхскуæз архайдыл Ольгæ сахуыр йæ куысты фыццаг бонтæй фæстæмæ. Ныр дæр йæ куыстмæ бæрнон ахасты уаг нæ ивы. Ууыл дзурæг сты республикæйы æмæ раздæры куыстуат «Цæдисмыхуыры» (нæ бæстæйы æппæт чиныгуадзæнтæ дæр ацы куыстуаты бæрны уыдысты), разамындæй цы бирæ Арфæйы гæххæттытæ, Кады грамотæтæ, нысантæ фæиста, уыдон. Саккаг ын кодтой Цæгат Ирыстоны культурæйы сгуыхт кусæджы кадджын ном. Йе ‘мкусæджы, хистæр хæлары тыххæй зæрдиаг ныхæстæ зæгъы рауагъдады редактор, фыссæг Будайты Милуся:

— Ольгæйы хуызæн хистæртæ сты, канд нæ рауагъдады нæ, фæлæ алы куыстуатæн дæр йæ фидыц. Æз æй мæ куысты фыццаг бонæй куыд фæзминаг, æгъдауджын хистæрæй, сыгъдæгзæрдæ адæймагæй базыдтон, уыцы фарнæй, йæ зæрдæйы рухсæй хайджын дæн ныр дæр. Ныхасæй, зондæй æмæ куыстмæ арæхстдзинадæй, зæрдæйыхаттæй Ольгæ у бафæзминаг, дæнцæгæн хæссинаг. Уæдæ музыкæ, аивад куыд уарзы æмæ йæ куыд зоны, уымæй дæр у иттæг тæхудиаг. Æз дзы кæддæриддæр бузныг дæн ме ‘мкусæг, мæ хистæр хæлар кæй у, уымæй.

Чиныгуадзæн «Ир»-ы ветерантæй иу, ЛагкутыЧъерджиаты Ольгæ дзы цы зæрдиаг фæллой кæны, афтæ рухс æмæ амондджын уæд йæ цард!

 ГАСАНТЫ Валери

ОСТАВЬТЕ ОТВЕТ

Please enter your comment!
Please enter your name here