Куыд хардз кæнынц ныййарæджы капитал

0
51

 

Ныййарæджы капиталæй чи спайда кодта, уыцы цæгатирыстойнаг бинонты фылдæр хай се ‘хца бахардз кодтой цæрæнуаты уавæртæ фæнывыл кæныны хъуыддагыл. Паддзахадон æххуысы амынд мадзалы фæрцы 27 мин цæгатирыстойнаг бинонтæй фылдæр сæ цæрæнуæттæ фæхуыздæр кодтой. Пенсион фонд ацы хъуыддагыл бахардз кодта, æмткæй райсгæйæ, 10,8 миллиард сомæй фылдæр

Æппæт Уæрæсейы куыд у, афтæ Цæгат Ирыстоны дæр адæм ныййарæджы капитал арæхдæр хардз кæнынц цæрæнуат балхæныны, науæд æй саразыны хъуыддагыл. Ныййарæджы капиталы программæ архайын цы бон райдыдта, уыцы бонæй фæстæмæ дзы спайдагæнæг бинонтæй 95 проценты банывыл кодтой сæ цæрæнуаты уавæртæ. Зæгъæм, 10,4 мин бинонтæн уыд 4 миллиард сомæй фылдæры бæрц сæ цæрæнуатон æфстæуттæ æххæстæй, кæнæ сын сæ хай бафидыны фадат, ноджыдæр ма 17,4 мин бинонтæ, 6,8 миллиард сомы бæрц æфстæуттæ нæ райсгæйæ, цæрæнуæттæ балхæдтой.

Уымæй уæлдай, бæстæйы Пенсион фонды цæгатирыстойнаг хайад райста сывæллæтты ахуырады фæдыл 98,2 милуан сомы бæрц 1,3 мин курдиаты æмæ æхсæнадыл инвалид-сывæллæтты социалон уагæй сахуыр кæнынæн 430 мин сомы бæрц дзаумæттæ сын балхæныны фæдыл 8 курдиаты.

Мады æмбырдгæнæн пенсийыл ныййарæджы капитал бахардз кæныны фæдыл курдиæттæ Пенсион фонды цæгатирыстойнаг хайадмæ не ‘рбафтыдысты.

Ныййарæджы капитал бахардз кæнæн ис мæнæ ахæм хъуыддæгтыл: цæрæнуаты уавæртæ фæхуыздæр кæныныл, сывæллæтты ахуырадыл, мады æмбырдгæнæн пенсийыл, стæй инвалид-сывæллæттæ æхсæнадыл социалон уагæй цæмæй сахуыр уой, уый тыххæй сын дзаумæттæ æмæ лæггæдтæ балхæныны фæдыл хæрдзтæ бафидыныл. 2018 азы программæмæ бахастой къорд ахсджиаг бафтауинаджы.

Пенсион фонд чысыл æфтиæгтимæ бинонтæй исын райдыдта ныййарæджы капиталы фæрæзтæй æрвылмæйон фиддонтæ исыны фæдыл курдиæттæ. Ныридæгæн закъоны ацы нормæйæ спайда кодтой 98 цæгатирыстойнаг бинонтæ (фиддонты иумæйаг бæрц у 7,1 милуан сомы). Фарон Цæгат Ирыстоны æрвылмæйон фиддоны бæрц уыд 9372 сомы.

Сывæллæтты скъолайы агъоммæ ахуырадыл ныййарæджы капиталæй пайда кæныны фæдыл моратори аивтой. Рæвдауæндоны æмæ яслийы цотæй кæцыфæндыйы дарыны хæрдзтæ ныййарæджы капиталы фæрæзтæй бафидыны фадат амæй размæ дæр уыд, фæлæ сывæллоныл цалынмæ æртæ азы сæххæст уа, бинонты хæс уыд уымæ банхъæлмæ кæсын.

Сывæллонмæ кæм зилынц, уыцы кусæндонмæ æмбæлгæ лæггæдтæ кæныны фæдыл лицензи цæмæй уа, ныртæккæ уый нымад у сæйраг æууæлыл.

Ныййарæджы капиталы программæмæ бацæуыны фадаты æмгъуыдыл 2021 азы 31 декабры онг бафтыдтой (ома, ныййарæджы капиталы сертификат райсыны бардæттæг сывæллон хъуамæ райгуыра, кæнæ йæ хъомыл кæнынмæ хъуамæ райсой 2021 азы 31 декабрæй раздæр; уыимæ сертификат райсынæн æмæ йын йæ фæрæзтæй спайда кæнынæн гæрæнтæ не ‘вæрынц).

Æдæппæт Цæгат Ирыстоны ныййарæджы капиталы сертификаты хицæуттæ сты 53,3 мин бинонтæ

 

ОСТАВЬТЕ ОТВЕТ

Please enter your comment!
Please enter your name here