«Нæ хъæздыгдзинад — Ирыстоны цы бирæ адæмыхæттытæ цæры, уыдон»

0
40

 

Цæгат Ирыстоны пысылмæтты удварны управленийы советы знон уыд уæрæх æмбырд. Йæ куысты архайдтой бирæ уазджытæ, уыдонимæ РЦИ-Аланийы Сæргълæууæг БИТАРТЫ Вячеслав, РЦИ-Аланийы нациты ахастдзинæдты фарстаты министр ЦУЦИТЫ Аслан, районты сæргълæуджытæ, хицауиуæггæнæг оргæнты минæвæрттæ, пысылмон æхсæнæдты сæрдартæ Ирыстоны алы рæттæй.

Æмбырды дзуапдæттæн доклад скодта РЦИ-Аланийы муфти Гуæцæлты Хадзы-Мурат.

Ивгъуыд аз пысылмæтты удварны управлени куыд бакуыста, цы сæм ис бафæзминагæй, стæй фидæны сæ размæ цавæр нысантæ æвæрынц, ууыл кодта бæстон ныхас. Фыццаджыдæр, æмбырды архайджытæ бакастысты цыбыр кинонывмæ. Ныхас дзы цыд, Хæзныдоны хъæуы æртæ азмæ кæй сарæзтой, уыцы нырыккон аив мæзджытыл, 200 адæймаджы бон дзы у бакувын, дыккаг уæладзыджы та хицæн бæстыхай ис сылгоймæгтæн.

— Æдæппæт нæ управленийы хъæппæрисæй арæзт æрцыд 220 алыхуызон мадзалы, лекцитæ, конкурстæ, викторинæтæ, рацыдыстæм-иу зиутæм, кодтам бирæ хæрзаудæн куыст, сæ ахадындзинад бæлвырд у. Нæ архайд иууылдæр баст у адæмты иудзинадимæ, удварны культурæимæ. Мæзджыт æрмæст бакувынæн нæу, фæлæ ма у зонындзинæдты куырдадз дæр. Хъуамæ уа, нациты ‘хсæн хæлардзинадыл æрыгæтты кæм ахуыр кæной, ахæм бынат, — загъта Гуæцæлты Хадзы-Мурат æмæ æхсызгонæй фехъусын кодта, Мæздæджы районы, Хъызлары хъæуы диссаджы дыргъдон кæй ныссагътой, йæ дыргътæй фæхайджын кодтой фæкæсинаг бинонты. Ирыстоны муфти арфæ ракодта республикæйы Сæргълæууæгæн, министрадтæн, æхсæнадон организацитæн сæ æмгуыстады тыххæй.

— Нæ хъæздыгдзинадыл æз нымайын, Ирыстоны цы бирæ адæмыхæттытæ цæры, уыдоны. Алы диныл хæст кæд стæм, уæддæр нæ иу кæны нæ райгуырæн бæстæмæ уарзондзинад, — загъта Битарты Вячеслав. — Алы дин дæр йæ бындуры хæссы сабырдзинад, фидыддзинад æмæ фарн. Фæлæ кæстæрты сæры раст зонындзинæдтæ куы нæ уа, уæд æхсæнад змæстмæ цæуы. Алывæрсыг куыст кæнын хъæуы, цæмæй макуыуал бавзарæм нациты ‘хсæн уæззау тугкалæн хæст. Нæ лæппуты Сирийы ницы хъуыддаг ис, кусут сæ удварныл. Уый æппæты ахсджиагдæр фарста у. Дарддæр та нæ республикæйы социалон-экономикон уавæрыл æнæмæнг кусдзыстæм. Адæмты ‘хсæн ныхас, иумæйаг æнгом куыст, абоны хуызæн фембæлдтытæ хъæугæ кæнынц. Не стыр хæс уыд æмæ уыдзæн адæмты ‘хсæн хæлардзинады нæмгуытæ тауын.

Республикæйы Сæргълæууæг дзуапп радта районты пысылмон æхсæнæдты минæвæртты фæрстытæн.

ГУГКАТЫ Жаннæ Къам систа ЦÆГÆРАТЫ Дауыт

 

ОСТАВЬТЕ ОТВЕТ

Please enter your comment!
Please enter your name here