Турнирæй ссардтой Галазты Æхсарбеджы рухс ном

0
22

 

Футболон скъола «Юность»-ы разамонджыты хъæппæрисæй 3-10 январы цыдысты Цæгат Ирыстоны фыццаг Президент Галазты Æхсарбеджы номарæн турниры ерыстæ æвзонг футболистты ‘хсæн

Турнир аразджытæй иу, футболон скъола «Юность»-ы директоры хæдивæг Кацанты Сослан зæгъы: «Галазты Æхсарбег бирæ хæрзты бацыд нæ республикæйы цæрæг адæмæн. Уый кæд зын рæстæг æвзæрст æрцыд Цæгат Ирыстоны Президентæй, уæддæр ын бирæ бантыст. Архайдта, нæ республикæйы культурæ æмæ спорты рæзт цæмæй ма фæцуда, ууыл. Уый нæ, фæлæ ма уыцы азты нæ командæ Уæрæсейы чемпион дæр ссис. Æз уæд сывæллон уыдтæн, фæлæ хорз хъуыды кæнын, нæ сæйраг стадионы-иу цы бирæ адæм уыди алы хъазты дæр, уый. Æхсарбег бирæ баххуыс кодта нæ футболы райрæзтæн, æмæ уый мах хъуамæ рох ма кæнæм. Уымæ гæсгæ нæ бафæндыд йæ номарæн турнир саразын.

Турниры хъазынц 7-8-аздзыд футболисттæ. Мах фæнды, цæмæй нæ хъомылгæнинæгтæ сæ зæрдыл бадарой, Ирыстоны стыр лæгтæй иу — Галазты Æхсарбег кæстæр фæсивæдæн цас хæрзты бацыд, уый». Турниры хъазыдысты: спортивон скъола «Юность»-ы æртæ командæйы, «Спартак-Алания» æмæ Октябрыхъæуы командæ.

Æвзонг футболистты хъазтмæ чи касти, уыдонимæ уыдысты нæ номдзыд футболисттæ, 1995 азы «Спартак-Алани» Уæрæсейы чемпион куы ссис, уæд уыцы командæйы фидар цæджындзтæ — Джиоты Инал æмæ Пагæты Артур.

«Махæн тынг æхсызгон уыди, Галазты Æхсарбеджы номарæн турнир саразыны хабар нын куы фехъусын кодтой, уæд. Ахæм стыр лæгты ном хъуамæ нæ кæстæртæ зоной фæлтæрæйфæлтæрмæ, æмæ бузныг зæгъæм футболон скъола «Юность»-ы разамонджытæн сæ хорз æрхъуыдыйы тыххæй», — загъта Джиоты Инал.

Ацы ныхæстæм ма Пагæты Артур бафтыдта: «Махæй рох нæу, Æхсарбег нæм-иу куыд æрбацыд нæхи цæттæ кæнгæйæ æмæ-иу нын ныфсытæ куыд авæрдта, уый. Уæдæ футболуарзджытæ хорз хъуыды кæнынц, нæ стадионы цавæр фæсарæйнаг зындгонд командæтæ æмæ футболисттæ хъазыди, уый дæр. Кæй зæгъын æй хъæуы, уыдон иууылдæр баст уыдысты Галазты Æхсарбеджы номимæ. Ныр бацархайын хъæудзæн, цæмæй ацы турнир суа æрвылазон, æмæ дзы канд Ирыстоны нæ, фæлæ æндæр регионты футболон командæтæ дæр хъазой. Æз дæр зæрдиаг арфæ кæнын, турнир кæй зондæй арæзт æрцыд, уыдонæн».Турниры 1-аг бынатмæ рацыди «Юность-1», 2-аг бынат бацахста «Юность-2», 3- аг та ссис «Юность-2010».Бæрæггонд æрцыдысты хуыздæр хъазджытæ дæр, æмæ сын радтой сæрмагонд призтæ.

«Хуыздæр дуаргæс»-ыл нымад æрцыд Къуымæриттаты Аслан («Юность-2»), «Хуыздæр хъахъхъæнæг» сси Хъуылымбегты Артур («Юность-1»), «Хуыздæр æрдæгхъахъхъæнæг» — Тадеты Омар («Спартак-Алани»), «Хуыздæр размæбырсæг» — Багаты Аслан («Юность-1»), «Æппæты фылдæр бакъуырæг» —Бахъаты Хетæг («Юность-2»), «Æппæты хуыздæр техникон цæттæдзинад равдисæг» — Мырыкаты Алыксандр («СпартакАлани»), «Æппæты хуыздæр хъазæг» — Цхуырбаты Алан («Спартак-Алани»).

Хæрзиуджытæ æмæ лæвæрттæ сын радтой РЦИАланийы физикон культурæ æмæ спорты министр Гæбулты Владимир, Джиоты Инал, Пагæты Артур, Уарзиаты Тамерлан (иууылдæр — «Спартак-Алани»-йы раздæры зындгонд хъазджытæ), футболон скъола «Юность”-ы директор Гаджиты Инал æмæ Галазты Æхсарбеджы фырт, кинорежиссер Галазты Аслан. Галазты Аслан йæ арфæйы ныхасы загъта: «Æз зæрдиаг арфæ кæнын турнир саразджытæн. Мæ фыд тынг æнувыд уыд кæстæртыл. Æвæццæгæн, ахуыргæнæджы дæсныйад дæр уымæн райста. Æз хорз хъуыды кæнын, куыд сагъæс кодта нæ республикæйы кæстæрты фидæныл æмæ-иу куыд цин кодта, нæ фæсивæдæйиу исчи искуы куы фесгуыхти, уæд. Æз бузныг зæгъын нæ æвзонг кæстæрты хъомылгæнджытæн. Сæ ахуыргæнинæгты стыр сгуыхтдзинæдтæн сæхæдæг æмæ æгас Ирыстон дæр æвдисæн куыд уой, уый сын мæ зæрдæ зæгъы, æмæ сын æй Хуыцауы цæст дæр бауарзæд!» БАСКАТЫ Уырызмæг

ОСТАВЬТЕ ОТВЕТ

Please enter your comment!
Please enter your name here