Завод «Бином»-ы куыстадон фæзуæттæй спайда кæндзысты

0
59

 

РЦИ-Аланийы Сæргълæууæг БИТАРТЫ Вячеслав промышленность æмæ транспорты министр Хайдарбек БУТОВИМÆ æрныхас кодта завод «Бином»-ы куыстадон фæзуæттæй спайда кæныныл. Зындгонд куыд у, афтæмæй республикæ бацæттæ кодта сæрмагонд инвестицион проекттæ, баст сты хæстон машинæтæ «КамАЗ»-тæ цалцæг кæнынимæ æмæ рухсдæттæг техникон ифтонггæрзтæ уадзынимæ.

Министр куыд фехъусын кодта, афтæмæй январы кæрон Дзæуджыхъæумæ схæццæ уыдзысты цалцæггæнинаг «КамАЗ»-тæ. Уæдæ рухсдæттæг техникон ифтонггæрзтæ уадзыны ног куыстадыл дæр ахсджиагæй архайд цæуы. Ацы ран республикæ æмгуыстад кæндзæн тольятийаг куыстуат «Луч»-имæ. Продукцийы фыццаг хуызтæ уадзын райдайдзысты январы кæрон. Хъуамæ байгом кæной 150 кусæн бынаты. Битарты Вячеслав бафæдзæхста, цæмæй инвестортæн алывæрсыг æххуыс лæвæрд цæуа, нæ республикæйы цы закъонтæ ис, уыдонæй парахатæй пайда кæной.

Уымæй дарддæр, республикæйы Сæргълæууæг бахæс кодта Хайдарбек Бутовæн, цæмæй йе ‘ргом аздаха Алагиры сопротивлениты заводмæ. Æрæджы Битарты Вячеславæн фембæлдтытæ уыдис Алагиры цæрджытимæ, æмæ уыдон рæгъмæ рахастой заводы хъысмæтимæ баст фарста. Раздæр уым куыстой æртæ мин адæймагæй фылдæр. Цæгат Ирыстоны разамынды зæрды ис куыстуат йæ къæхтыл слæууын кæнын. Уый тыххæй та хъуамæ æппынæдзух ныхас кæной паддзахадон корпораци «Ростех»-имæ. «Мах хъуамæ арф ахъуыды кæнæм заводы дарддæры хъысмæтыл, «Ростехнологи»-йы разамынды хъуамæ базонгæ кæнæм нæ нысантимæ, завод цы хуызы рацаразынмæ хъавæм, уыдæттимæ. Хъæуынц инвестицитæ, хъуамæ æппæт куыстадон бынæттæ банывыл кæнæм, сифтонг сæ кæнæм хъæугæ гæрзтæй, уый фæстæ та завод йæ архайд стынг кæндзæн, фæфылдæр уыдзæн йæ куыстады бæрц», — ахæм нысан сæвæрдта министры размæ республикæйы Сæргълæууæг.

Дарддæр ныхас бацахста завод «Электроцинчы» кусджытæн бынæттæ ссарыны охыл сæрмагонд кусæг къорд саразыны фарста. Битарты Вячеслав куыд бафиппайдта, афтæмæй хъуамæ фæбæрæг кæной хицæн мадзæлттæ, куыстæй чи суæгъд уа, уыцы адæмы дарддæры цардыл хъæуы бамæт кæнын æмæ бацархайын. Кусæг къорд хъуамæ æппæт фарстатыл дæр архайа «Электроцинчы» хицæуттимæ. Разамынд ын дæтдзæн Хицауады Сæрдары хæдивæг Икъаты Русланбег, йæ хæдивæг та уыдзæн Хайдарбек Бутов. Республикæйы Сæргълæууæг куыд фæбæрæг кодта, афтæмæй кусæг къорд хъуамæ æвзара социалон объектты дарддæры архайд дæр. «Мах хъуамæ зонæм, цы фæуыдзысты, кæмæ сæ ратдзысты кæнæ сæ уæй акæндзысты. Мæ зæрдæ дарын, æхгæд кæй не ‘рцæудзысты æмæ республикæйæн дарддæр дæр пайда кæй хæсдзысты, ууыл», — загъта Битарты Вячеслав.

ОСТАВЬТЕ ОТВЕТ

Please enter your comment!
Please enter your name here