Нæ уыдзысты рох Викторы лæггæдтæ

0
79

 

 

Дыууæ азы размæ æвирхъау бæллæхы фæмард æвæджиауы хорз адæймаг, зындгонд спортивон уацхæссæг æмæ историк Тедеты Аполлоны фырт Виктор.

Тедеты Виктор уыди курдиатджын аразæг. Йæ куыстуаты нымад уыд æппæты дæсныдæр сисамайæгыл. Цал æмæ цал хæдзары арæзты ис Викторы къухты фæллой. Йæ куыст кæдфæндыдæр кодта лæмбынæг æмæ бæрнонæй. Уый тыххæй йæ агуырдтой алы рæттæй. Аразæджы дæсныйадмæ уарзондзинад цыма гуырдзæй рахаста, афтæ æнæаипп уыди кæдфæндыдæр йе ‘рмдзæф.

Виктор къаддæр дисы не ‘фтыдта йæ иннæ курдиатæй. Цæвиттон, хæрзæрыгонæй бауарзта футбол, æмæ уый йæ зæрдæйы æрцахста фидар бынат. Йæхæдæг куыд дзырдта, афтæмæй футболмæ кæсын куыд уарзта, афтæ йæ фæндыд ноджы фылдæр базонын футболы историйы тыххæй.

«Уæлдай тынгдæр ме ‘ргом аздæхтон, Ирыстоны футбол кæд æмæ куыдæй равзæрд, чи уыдысты нæ фыццаг футболисттæ, цавæр командæтæ уыдысты нæ республикæйы чемпионтæ æнусы дæргъы, чи уыдысты нæ футболистты фыццаг ахуыргæнджытæ æмæ кæй фæрцы схызт Ирыстоны футбол йе стырдæр уæлахизтæм? Уый тыххæй æз дыууиссæдз азы дæргъы агуырдтон æрмæджытæ канд Ирыстоны нæ, фæлæ Мæскуы æмæ ма бирæ æндæр рæтты», — фыста Виктор йæ чиныг «От «Унитаса» до «Алании», зæгъгæ, 2014 азы кæй рауагъта, уым.

Ацы чиныг у æвæджиауы цымыдисаг куыст. Ахæм стыр фыдæбонæн, мæнмæ гæсгæ, æмбæлгæ аргъ йæ рæстæджы конд не ‘рцыд. Абон ацы историкон фæллой лæг йæ къухмæ куы райсы, уæд дисы бафты, куыд бантыст Тедейы-фыртæн уыйбæрц æрмæг æрæмбырд кæнын?! Цас уарзондзинад уыди йæ зæрдæйы Викторæн, цæмæй йæ сæйраг куыстæй уæлдай, уыйбæрц рæстæг æмæ хъарутæ бахардз кæнай, æфтиаг дæр кæцæй нæ райсдзынæ, ахæм хъуыддагыл?!

Гъе, ахæм Хуыцауысконд адæймаг уыди Тедеты Виктор. Æвиппайды цардæй кæй фæхъуыд, уый йæ уарзон бинонтæй уæлдай стыр хъыджы бафтыдта, хæстæг æй чи зыдта, уыдоны дæр. Виктор бирæ азты дæргъы мыхуыры йæ уацхъуыдты спортуарзджыты зонгæ кодта, Ирыстоны цы футболон ерыстæ цыди стырæй-чысылмæ, уыдонимæ. Арæх фыста нæ футболон скъолаты хъомылгæнинæгты тыххæй дæр. Уæлдай аргъ ын кодтой æрыгон футболистты хъомылгæнджытæ æмæ, цардæй куы фæхицæн, уæд йæ номарынæн сарæзтой футболон турнир. Ивгъуыд къуыри Тедеты Викторы номарæн турнир цыди дыккаг хатт футболон скъола «Юность»-ы.

Ацы турнир æппæты разæй арæзт æрцыд футболон скъола «Юность»-ы директор Гаджиты Иналы хъæппæрисæй, æмæ уый зæгъы: «Викторы хуызæн адæймæгтæ уæлдай кады аккаг сты. Диссаг дæр куыннæ у, уый йæ сæйраг куыстæй уæлдай футболы сæраппонд цас фыдæбон кодта, уый. Йæ фæрцы бирæ рох хъазджытæ æмæ цаутæ мах базыдтам йæ чиныгæй. Уæдæ нæ кæстæрты рæзтмæ дæр куыд лæмбынæгæй касти, куыд зыдта, чи дзы кæдæм ацыди йæ дарддæры фæндагыл, кæмæн дзы куыд рауад йæ спортивон хъысмæт, уыдæттæ! Мах нæхицæн хæсыл банымадтам ахæм лæджы номыл æрвылазон ерыстæ кæнын, æмæ ныр дыккаг хатт уый нæ къухы бафтыд. Æз арфæ кæнын, чи нæм фæкаст, уыцы æххуысгæнджытæ Цыбырты Кахабер æмæ Гусойты Неляйæн».

Ерыстæ цыдысты дыууæ кары æвзонг футболистты ‘хсæн. 2009 æмæ 2010 азты гуырд лæппутæ ерыс кодтой хицæнтæй. Æдæппæт цы 16 командæйы ерыс кодтой турниры. Уыдоны хъазыд 180 æвзонг футболисты æмæ дзы алчидæр тырныдта йæхи хъомысджындæрæй равдисынмæ.

Æнæмæнг, ерыстæ рауадысты тынг зæрдæмæдзæугæ. Ногæй та федтам, курдиатджын кæстæртæ нæм кæй рæзы, уый.

Кæстæр кары (2010 азы гуырд) футболистты ерысы 1-аг бынат рамбылдта «Спартак» (йæ тренер Беппиты Гари), 2-аг æмæ 3-аг бынæттæ бацахстой «Юность-1» (тренер Хуыгаты Ренат) æмæ «Юность-2» (тренер Гамæонты Олег).

2009 азы гуырд футболистты ерысты 1-аг бынатмæ рацыди «Барс» (тренер Барсег Киракосян), 2-аг æмæ 3-аг та уыдысты «Юность-1» (тренер Цопанаты Ирлан) æмæ «Беслæн» (тренер Гæбæраты Спартак).

Уæлахиздзаутæ æмæ призертæн хæрзиуджытæ æмæ кубоктæ радтой нæ зындгонд раздæры футболисттæ: Джиоты Инал, Пагæты Артур, Реуазты Хъазыбег, Джиоты Георги, Гогниты Спартак, Айларты Амзор, Анатолий Кочетов.

Тедеты Викторы фырт Зауыр зæрдиаг арфæ ракодта турнир саразджытæн: «Æз нæ бинонты номæй стыр бузныг зæгъын Гаджиты Инал æмæ йе ‘мкусджытæн, футболон скъола «Юность»-ы тренертæ æмæ сæ хъомылгæнинæгтæн. Нæ арфæтæ, ерысты чи архайдта, уыцы командæтæ æмæ сæ разамонджытæн. Нæ фыд бирæ уарзта æрыгон футболистты хъазтмæ кæсын, æмæ-иу уыдоны ‘хсæн курдиатджын лæппутæ куы федта, уæд-иу йæ цинæн кæрон нал уыд. Мæнмæ гæсгæ, абон кæмæ кастыстæм, уыцы кæстæрты архайдæй йæ зæрдæ барухс уыдаид. Иу хатт ма стыр бузныг турнир саразджытæн».

БАСКАТЫ Уырызмæг

ОСТАВЬТЕ ОТВЕТ

Please enter your comment!
Please enter your name here