Дзуарыхъæу æмæ Майрæмададжы донæфсисады фарста — иумæйаг республикон программæйы

0
37

 

Нуазыны доны сыгъдæгдзинады фарста у Дзуарыхъæу æмæ Майрæмададжы цæрджыты тыхстагдæр хъуыддаг. Фæлæ йæ алыг кæнын домы стыр фæрæзтæ æмæ архайд. Ацы æмæ æндæр хъуыддæгты тыххæй нæ республикæйы Сæргълæууæг БИТАРТЫ Вячеслав æрныхас кодта бынæттон цæрджытимæ фембæлдтыты рæстæг. Ныхасы ма архайдтой Хицауады Сæрдары хæдивæг, æнæниздзинад хъахъхъæнынады министр ГОДЖЫЦАТЫ Тамерлан, Сывæллоны барты тыххæй æххæстбарджын КОКАЙТЫ Артур, министрадтæ æмæ ведомствоты разамонджытæ, районы сæргълæууæг БУТАТЫ Арсен.

«Донæфсисады фарста рæгъмæ хæссынц алы хъæу æмæ горæты дæр, нæхи бюджеты фæрцы фарста алыггæнæн нæй. Уымæ гæсгæ бабар кодтон нæ Хицауадæн, комкоммæ — Цæрæнуæтты-коммуналон хæдзарад, артаг æмæ энергетикæйы министрадæн, цæмæй цæрджытимæ фембæлдтыты хатдзæгтæм гæсгæ бацæттæ кæной архайды иумæйаг пълан. Донæфсисады æмæ дон бауадзыны проектон-хæрдзты документ дæр хъуамæ цæттæгонд æрцæуа. Дарддæр æппæт уыцы документтимæ нæ курдиат барвитдзыстæм федералон центрмæ, цæмæй нын фарста алыг кæныны охыл æхца радих кæной. Фарста хъуамæ хуызæнæн æмæ иумæйагæй конд æрцæуа», — загъта Битарты Вячеслав.

Куыд ма бафиппайдта, афтæмæй Алагиры цалдæр уынджы ныридæгæн баивтой донуадзæн хызтæ. Кæронмæ фæхæццæ кæнынц Рамоновы хъæуы хызтæ Æрыдоны канализацион коллекторимæ баиу кæныны куыстытæ. Фембæлды рæстæг цæрджытæ республикæйы разамонæджы æргом аздæхтой Дзуарыхъæу æмæ Майрæмададжы сæйраг уынгтæ сцалцæг кæнынмæ æмæ базилынмæ. Уымæй дарддæр куырдтой, цæмæй сывæллæттæн радих кæной сæрмагонд автобус скъоламæ сæ ласынмæ. Битарты Вячеслав бабар кодта ахуырад æмæ наукæйы министры хæстæ рæстæгмæ æххæстгæнæг Людмилæ Башаринайæн, цæмæй фарста æвæстиатæй лыггонд æрцæуа. Йæхи ‘рдыгæй Людмилæ Башаринæ зæрдæ бавæрдта, къуырийы дæргъы сыл транспорт кæй сæмбæлдзæн, уымæй.

Адæмы тыхсын кæны хъæуты культурæйы артдзæстыты уавæр дæр, уæдæ, рæзгæ сабитæ æмæ фæсивæд спортæй кæм архайой, ахæм фæзуæттæ дæр сын нæй. Уымæ гæсгæ республикæйы Сæргълæууæг фæндаггон хæдзарады комитеты сæрдары хæдивæг Атараты Георги, культурæйы министры хæстæ æххæстгæнæг Къубалты Эльбрус æмæ физкультурæ æмæ спорты министр Гæбулаты Владимиры размæ сæвæрдта æппæт уыцы фарстатыл бакусыны хæс.

Ныхас цыд зæххы фарстайыл дæр. Дзуарыхъæуккæгтæ куырдтой, цæмæй ма сын сæ хизæнуæттæм бафтауой. Ныртæккæ пайда кæнынц 70 гектарæй. Паддзахадон исбонад æмæ зæххы ахастдзинæдты министрады бæрны ма ис 25 гектары æмæ, чи зоны, уыцы нысанæн дихгонд æрцæудзысты. Уый тыххæй та хъуамæ бынæттон хицаудзинад фарстайыл бакуса.

Ахсджиаг у Фыййагдоны былгæрæттæ сфидар кæныны хъуыддаг дæр. Æрдзон фæрæзтæ æмæ экологийы министрад 2017 азы уыцы нысанимæ бацæттæ кодта проект æмæ хæрдзты документаци. Ныртæккæ æппæт æрмæджытæ дæр рæвдз кæнынц æмæ сæ бадæтдзысты Ныгуылæн-Хъаспиаг доны управлени æмæ Уæрæсейы Доны фæрæзты агентадмæ, цæмæй хъуыддаг 2020 азы федералон нысанмæарæзт программæмæ бахæссой.

Фембæлды рæстæг цы бирæ фæрстытæ райхъуыстис, уымæй уæлдай ма республикæйы Сæргълæууæджы номыл балæвæрдтой 30 алыхуызон фыстæджы- курдиаты. Битарты Вячеслав зæрдæ бавæрдта, æппæт курдиæттæ дæр æвзæрст кæй æрцæудзысты, уымæй.

РЦИ-Аланийы Сæргълæууæджы æмæ РЦИ-Аланийы Хицауады пресс-службæ

 

ОСТАВЬТЕ ОТВЕТ

Please enter your comment!
Please enter your name here