Разæй — стырдæр хæстæ

0
68

 

«Нæ зæрдæ ивгъуыд азыл цæмæй фæхуда, ахæмæй нæм ницы ис. Цы уыд афæдзы, уымæй — нысантæ, хъуыддæгтæ, ахсджиаг фембæлдтытæ, размæвæрд хæстыл æнæрынцойæ куыст. Стыр æргом аздæхтам хи æфтиæгтæ фæфылдæр кæнынмæ. 2018 азмæ нысангонд хъуыддæгтæ æвзæр нæ рауадысты», — афтæ райдыдта йæ ныхас Уæрæсейы хъæууонхæдзарадон центры цæгатирыстойнаг филиалы разамонæг ТОТРАТЫ Олег дзуапдæттæн конференцийы рæстæг

 

Æмбырды размæ уазджытæ æмæ журналисттæн скодтой чысыл экскурси куыстуаты бæстыхайыл. Филиалы разамонæг куыд загъта, афтæмæй сæ куыст аразынц паддзахадон хæслæвæрдтæм гæсгæ. Афтæмæй бæрæггонд æрцыд 64,3 тоннæйы бæрц тауинæгтæн сæ хæрзхъæддзинад.

Нæ республикæйы фитосанитарон уавæр сбæлвырд кæныны, комкоммæ та, знаггадгæнæг зайæгойтæ, сасктæ, æхсынæгтæ сбæрæг кæнын æмæ сæ ныхмæ наукæйы бындурыл тох кæныны охыл филиалы специалисттæ скодтой фитосанитарон иртасæн куыстытæ. Уæлæмхасæн ма æрзылдысты 720200 гектарыл, уый паддзахадон хæслæвæрдæй у æртæ хатты фылдæр. Зайæгойты 5 хуызы сбæлвырд кодтой, ГМО кæй хонынц, уыцы буаргъæд дзы ис æви нæй, уымæй.

— Паддзахадон хæслæвæрдтæ сæххæст кодтам, уымæй уæлдай ма республикæйы цæрджытæн цы лæггад бакодтам, уымæй æфтиаг райстам 6,4 милуан сомы. Ивгъуыд азтимæ абаргæйæ, бирæ фылдæр фæрæзтæ хардзгонд æрцыд куыстуаты райрæзтыл. Уый фæрцы нæ лабораториты фæзынд ног нырыккон ифтонггæрзтæ. Цалцæггонд æрцыд нæ бæстыхай. Æвддæс хуызы алывæрсыг лæггæдтæ кæнынц нæ филиалы фæлтæрдджын специалисттæ, — бынаты аразæм хъæугæ биопрепараттæ, хъæууонхæдзарадон куыстуæттæн цæттæ кæнæм сертификаттæ, тауинæгты хæрзхъæддзинад бæлвырд кæнæм. Хорз куыстæн нæм ис уавæртæ, — загъта Тотраты Олег.

Фæстæдæр хицæнæй бæстон æрныхас кодта быдыртæн, фидæны тыллæгæн, стæй адæмы æнæниздзинадæн знаггадхæсджыты тыххæй. Куыд загъта, афтæмæй æрмæст иумæйаг хъарутæй ис сæ ныхмæ тох кæнæн. Æнгом æмгуыстад хъæуы районты бынæттон администрацитимæ. Уый руаджы арæх саразынц фембæлдтытæ адæмимæ. Минералон хъацæнты хицæн системæ бацæттæ кæнынц. Куыстуаты фарсмæ байгом кодтой информацион-консультативон центр. Йæ ахадындзинад ын сæхиуыл банкъардтой бирæ адæм, зонындзинæдтæ райсынæй уæлдай ма дзы асламдæр аргъæй балхæнæн ис, дызæрдыггаг чи нæу, ахæм химион æмæ биологон препараттæ æмæ æхсынæгты ныхмæ бынаты конд æндæр хостæ, хъацæнтæ, цæхæрадоны, дыргъдоны кусæн ифтонггæрзтæ æмæ æндæртæ. Филиалы разамонæг куыд загъта, афтæмæй республикæйы бюджетмæ æфтиæгтæ бахастой 7,5 милуан сомы, кусджыты мыздыл дæр бафтыдис.

Фидæны пъланыл дзургæйæ, Тотраты Олег фæнысан кодта, ацы аз сæ лæггæдтæ кæй фæпарахатдæр уыдзысты. Зæгъæм, сæхи тракторæй хуым кæндзысты адæмы цæхæрадæттæ. Ныридæгæн æппæт хъæугæ æрмæг балхæдтой æмæ тагъд рæстæг скусын кæндзысты, халсартæ, бæлæстæ æмæ къудзиты талатæ, дидинджыты хуызтæ кæм зайын кæндзысты, уыцы хъæрмуат. Йæ фæзуат у 250 гектары.

— Тынг ахсджиаг æмæ вазыгджын у нæ архайд, хорз уаид, байтауыны размæ алчидæр мыггæгты хæрзхъæддзинад куы сбæлвырд кæнид, цæмæй мæрмæ мыггæгты æфсон бырон ма бахæссой, æмæ сæ фыдæбонæй зæрдæрухс уой, мах та кæддæриддæр адæмы фарсмæ æрбалæудзыстæм, — загъта Тотраты Олег.

ГУГКАТЫ Жаннæ Къам систа КЪÆБЫСТЫ Харитон

 

ОСТАВЬТЕ ОТВЕТ

Please enter your comment!
Please enter your name here