Цымæ кæдмæ?

0
86

 

Адæймагыл азтæ куы рацæуы, уæд, æвæццæгæн, тынгдæр фенкъары йæ алыварс цытæ цæуы, уыдон. Стæй ахæм кары адæймагæн ис, ныры цард цæимæ абара, уый. Советон дугимæ. Алы райсом мæ куыстмæ цæугæйæ Къостайы проспекты мæ цæст æрæвæрын, хъазуатон куыст цы заводтæ æмæ фабриктæ кодтой , уыдон абон цы заууатмæ æрцыдысты, ууыл.

Лæууынц æдзæрæгæй, мæгуырхуызæй, цыма афтæ зæгъынмæ хъавынц: «Æппын нæ ничи уыны, нæ къултæ згъæлынц, нæ рудзгуытæ нын ныппырх кодтой. Нæ доны хæтæлтæ нал бæззынц æмæ дон алы рæттæй тæдзы, нæ уæлхæдзæртты бæлæстæ зайын райдыдтой. Нæ кусæнгæрзтæ дæр цыдæр фесты… Уæдæ нæм цал æмæ цал профессионалон кусæджы уыд, уæдæ — куысты раззагдæртæ… Канд нæ республикæйы нæ, фæлæ æнæхъæн Советон Цæдисы зындгонд уыдис нæ заводты æмæ фабрикты продукци. Ныр никæйуал хъæуæм æмæ марой кæнæм… Къостайы загъдау: «Искæй зæрдæ уæ дзыназгæ нырризæд , искæмæ бахъарæд адæмы хъыг». Кæд нæ исчи, мыййаг, балхæдта æмæ нын ис хицæуттæ, уæд ма нæм уе ‘ргом раздахут æмæ кусæн бынæттæ скæнут нæ адæмæн.»

«Бином», «Разряд», «Цъындауафæн фабрик», «ОЗАТЭ», «Цырæгътæуадзæн завод», «Кристалл», «Химзавод», «Æхсыры завод», «Грант», «Топаз», “Дзулфыцæн завод” æмæ иннæтæ. Се ‘ппæт ранымайæн дæр нæй, сæ фылдæр æхгæд æрцыдысты. Цал æмæ цал адæймаджы баззадис æнæ куыстæй, цал æмæ цал нæлгоймагæн нал уыд йæ бон йæ бинонты дарын, цал æмæ цал бинонтæн фехæлд сæ цыбыркъух цард! Бирæтæ абон дæр сæ къæхтыл слæууынæн не сты сæ фырмæгуырæй. Мæгуырæй нæ Хуыцау бахизæд, адæймаг æнæниз куы уа, уæд исты амæлттæ кæндзæн цæрынæн. Ирон æмбисонд раст у «Хъæздыг мæгуыры не ‘мбары». Цымæ æз искуы уый æнхъæл уыдтæн, æмæ адæмы дих кæндзысты хъæздгуытæ æмæ мæгуыртыл… Фæлæ цард тæбæгъы донæй уæлдай нæу, кæцырдæм фæкъул уыдзæн, уый ничи зоны…

Мæ ныхас у, уыцы заводтæ æмæ иннæ кусæн бынæттæ чи балхæдта, уыдоныл. Цæуылнæ архайынц, цæмæй сæ исты равдисой æмæ нæм фæзына ног кусæн бынæттæ? Тæригъæд не сты уыцы арæзтæдтæ? Æви кæд ныккæлдзысты, уымæ æнхъæлмæ кæсут. Омæ сымах бонджынтæ стут, æмæ та ног истытæ сæ бæсты сараздзыстут. Æгайтма уæ бон у, фæлæ уыцы хæлддзаг бæстыхæйттæ æвидауц кæнынц нæ рæсугъд Дзæуджыхъæу æмæ ууыл дæр ахъуыды кæнут.

Советон дуджы-иу алы скъола æмæ рæвдауæндоныл дæр исчи йæ арм дардта (шефство), сæ цуры-иу балæууыдысты заводтæ, колхозтæ, организацитæ цалцæггæнæн куыстыты, хуыздæр кусджытæн-иу лæвæрд цыд премитæ, сывæллæтты-иу арвыстой лагертæм æмæ афтæ дарддæр.

Цæуыннæ ис ныртæккæ уыцы фæткмæ раздæхæн? Советон дуджы хорз цы уыд , уыдон цæмæн иуварс кæнæм? Нæ цард нæхицæй аразгæ у, æмæ йыл куынæ архайæм, уæд нæ мидбынаты цоппай кæндзыстæм, размæ нæ ацæудзыстæм.

Æз та уал мæ куыстмæ цæугæйæ зæрдæрисгæйæ кæсдзынæн уыцы æрдæгхæлд арæзтæдтæм… Цымæ кæдмæ?!

СÆЛБИТЫ Иринæ, Дзæуджыхъæуы 13-æм скъолайы директор

ОСТАВЬТЕ ОТВЕТ

Please enter your comment!
Please enter your name here