Æрыгон ахуыргæндты скъола

0
53

Знон Хетæгкаты Къостайы номыл паддзахадон университеты ахуыргæндты советы залы йæ куыст райдыдта æппæтдунеон конференци «Кавказ в его прошлом и настоящем: история, археология, культура». Арæзт æрцыд Цæгат Ирыстоны Абайты Васойы номыл гуманитарон æмæ социалон иртасæнты институты æмæ ацы университеты хъæппæрисæй. Конференцийы пленарон æмбырд цыбыр раныхасæй байгом кодта Цæгат Ирыстоны Абайты Васойы номыл гуманитарон æмæ социалон иртасæнты институты директор, историон наукæты доктор, профессор ХЪАНЫХЪУАТЫ Зæлинæ.

— Фæстаг рæстæг Уæрæсейы Хицауад се ‘ргом фылдæр аздæхтой наукæйы рæзтмæ. Фылдæр та архайынц ууыл, цæмæй дзы архайой æрыгон фæсивæд. Сæ зонындзинæдтæ æвдисой йæ алы къабæзты. Уымæ гæсгæ ис национ проекттæ дæр. Абон нæ бæстæйы бæрæг кæнынц Уæрæсейы наукæйы бон æмæ ацы конференци дæр арæзт цæуы уыцы кадджын боны фæдыл, — загъта Хъаныхъуаты Зæлинæ. Уый фæстæ конференцийы архайджытæн: æрыгон ахуыргæндтæн, аспиранттæн, магистранттæн арфæ ракодта ЦИПУ-йы ректор Огъуаты Алан.

— Æхсызгон у, наукæйы фæсивæд кæй архайынц, уый нысан кæны, Ирыстоны кæй ис зондджын, курдиатджын кæстæртæ. Мах хæс та у, уыдонæн фадæттæ æмæ гæнæнтæ аразын, цæмæй рæза сæ наукон куысты ахадындзинад.

Уый фæстæ конференцийы архайджытæн сæрмагондæй дæсныйад æвдисæн ахуыртæ сарæзтой зындгонд ахуыргæндтæ: Цæгат Ирыстоны Абайты Васойы номыл гуманитарон æмæ социалон иртасæнты институты археологийы хайады сæргълæууæг, историон наукæты доктор Туаллæгты Алан. Уый æрыгон наукон кусджытæн радзырдта археологион хæзнатæ æмæ ирон адæмы Нарты кадджытæ, стæй Царциаты таурæгътæн цы бастдзинад ис, уый тыххæй. Историон наукæты доктор Айларты Светланæ бакаст сæрмагонд доклад Ирыстоны рухстауджыты царды æмæ архайды тыххæй.

Дарддæр конференцийы архайджытæ докладтæ кастысты сæрмагонд секциты. Уыдон та баст сты Уæрæсейы, Цæгат Кавказы истори, этнографи, политологи, культурологиимæ. Конференци йæ куыст фæуыдзæн абон.

ГАСАНТЫ Валери Къамтæ систа КЪÆБЫСТЫ Харитон

 

ОСТАВЬТЕ ОТВЕТ

Please enter your comment!
Please enter your name here