Дзæуджыхъæуы «Кванториум» — Уæрæсейы хуыздæр технопарктæй иу

0
29
????????????????????????????????????

 

Сывæллæтты технопаркты иугонд «Кванториум»-ы федералон операторы — Ахуырады рæзты ног хуызты фонды генералон директоры хæдивæг Антон ТИМКИН Цæгат Ирыстоны уыд кусæг балцы. Уый нæ республикæйы ахуырад æмæ наукæйы министр Людмилæ БАШАРИНАИМÆ иумæ бабæрæг кодта сывæллæтты технопарк «Кванториум».

Технопарчы ахуыргæнæн кусæнуаттæ æмæ интерактивон музеймæ бацæугæйæ, уазджытæ аныхас кодтой ахуырдзаутæ æмæ ахуыргæнджытимæ. Антон Тимкин дзæуджыхъæуккаг «Кванториум»-æй разыйæ баззад.

— Ныртæккæ Уæрæсейы чи ис, сывæллæтты уыцы 89 технопаркæй дзæуджыхъæуккаг «Кванториум» нымад у хуыздæртæй иуыл. Проект «Кванториум» сарæзтам сывæллæтты хъуыдыкæнынады ног, пайдайаг хуызы сæвзæрдæн ахъаз кæнынæн. 10-15 азы фæстæ «Кванториум»-ы хъомылгæнинæгтæн уыдзæн бæлвырд зонындзинæдтимæ куыстуæттæм кусынмæ бацæуыны фадат. Æртæ азы размæ кæй сарæзтам, сывæллæтты уыцы технопарктæн ис стыр ахадындзинад. Сывæллæтты сфæлдыстадон курдиат раргом кæнынæн чи ахъаз кæндзæн, Дзæуджыхъæуы ис ахæм æвæджиауы «Кванториум». Цæгат Ирыстоны разамынд сывæллæтты технопаркмæ стыр æргом кæй здахы, уый мын æхсызгон у. Хæссæм уын ацы аз уæ «Кванториум»-ы бындурыл сывæллæтты технопаркты ахуыргæнджыты æмæ разамонджыты æппæтуæрæсеон ахуырадон семинар саразыны фæндон. Уадз æмæ бæстæйы иннæ регионты минæвæрттæ уе ‘нтыстдзинæдтимæ базонгæ уой. Национ проект «Ахуырад»-мæ гæсгæ Цæгат Ирыстоны сæххæст кæндзыстæм къорд дзыллон мадзалы. Сараздзыстæм цалдæр инфраструктурон объекты, сывæллæтты технопаркты нымæц фæфылдæр уыдзæн. Фæсхъæуты цæрæг сывæллæттæн нырыккон технологитимæ базонгæ уæвыны фадат кæй фæрцы уыдзæн, ахæм мобилон «Кванториум»-тæ арæзт æрцæудзысты. Ацы аз Цæгат Ирыстоны фæзындзысты ног профессионалон цæттæкæнынады центртæ, — загъта Антон Тимкин.

— Уæ Фонды æххуысы фæрцы Цæгат Ирыстонæн проект «Кванториум» сæххæст кæнын бантыст. Фонды руаджы нæ ахуыргæнджытæ лæвар ахуырад райстой бæстæйы раззаг центрты. Ахуырады рæзты ног хуызты фонды æххуысы фæрцы нæ республикæ национ проект «Ахуырад»-ы пълангонд æппæт мадзæлттæ кæй сæххæст кæндзæн, ууыл зæрдæ дарын, — загъта Людмилæ Башарина.

ОСТАВЬТЕ ОТВЕТ

Please enter your comment!
Please enter your name here