Хæхты у тæссаг — уæхи хъахъхъæнут!

0
13

 

Цæгат Кавказы гидрометеорологийы æмæ алфамбылай алыварсмæ иудадзыг цæстдарды управленийы бæрæггæнæнтæм гæсгæ, Цæгат Ирыстоны хæхбæсты тæссаг у зæйтæ рацæуынæй. Уавæр афтæ у, æмæ Уæрæсейы Хуссар хай Фæскавказимæ чи бæтты, уыцы фæндаджы 24 километры дæргъæн дæрддзæджы ис 234 зæйцæуæн бынаты. Адонæй 172 сты, уæлдай тæссагдæр кæмæй у, ахæмтæ, æмæ сæ бон вæййы автомобилон фæндаг зынгæ дæрддзæджыты æрæхгæнын. Зæгъæм, зæйцæуæн рæстæджы райдайæнæй фæстæмæ — 218 азы ноябрæй нырмæ хæхты сæртæ æмæ къæдзæхты фæхстæй рацыд 237 зæйы. Адонæй 89 уагъд æрцыдысты сармадзантæй митджындæр бынæттæ фехсыны руаджы, æмæ ирвæзынгæнджыты, фæндагыл кусджыты, зæйтæ уадзджыты хъæддых архайды руаджы бæлццæттæй хъыгдард ничи баййæфта.

Уавæр афтæ у, æмæ республикæйы территорийы быдырон хайы ацы зымæг фылдæр хатт кæд къæвда фæуары, уæд Уæлладжыры комы фæндагыл та Хæйрæджыты хидæй суанг Ручъы тъунелы цæгатаг порталы онг алы митæруард дæр бирæ куыст скæны фæндагыл кусджытæн. Ивгъуыд къуырийы ам æртæ суткæйы мит фæуарыд æмæ фылдæр рæтты йæ бæрзæнд 1,5 метрæй фæуæлдæр, развæндаг та къахдзæфмæ дæр дзæбæх нæ зынд, цъæх-цъæхид мигъ комы кæй ныббадт, уый тыххæй.

Фæлæ боныхъæд куы раирд, уæд фæндаггон техникæ скуыста, ком базмæлыд: грейдертæ, бульдозертæ, уæзæгтæ æвгæнджытæ миты уацарæй чысылгай исын райдыдтой фæндаджы хицæн хæйтты, рæстæгæйрæстæгмæ та-иу райхъуыстысты зæйуадзджыты сармадзанты тыхджын гуыппытæ.

Ахæм куысты фæстæ миты мингай тоннæтæй сыгъдæг кæнын хъуыд фæндаг. Фыццагдæр та Хуссар Ирыстонæй цæуæг машинæты митзæйтæ кæй æрцахстой, уый тыххæй рæстæгмæ фæндæгтæ арæзт цыдысты хицæн бынæтты, цæмæй дыууæрдæм ласт цæуой алыхуызон уæзæгтæ, уæлдайдæр хойраджы продукттæ, медикаменттæ æмæ, кæй зæгъын æй хъæуы, бæлццæттæ дæр.

Ацы тæссаг уавæр хынцгæйæ, РЦИ-Аланийы Сæрмагонд уавæрты министрады Сæйраг управлени фæндаджы змæлды архайджытæн фæдзæхсы, цæмæй хъуыды кæной боныхъæды бæрæггæнæнтыл, æвзæр куы уой, уæд хыздæр у сæ балц æндæр рæстæгмæ аргъæвын. Хæхтæм цæуæн нæй митуарынты, стæй боныхъæд æвзæр куы уа, уæд! Къæрцхъусдæр ут зæйцæуæн бынæтты. Уыдон арæхдæр æрцæуынц, хæхты фæхсты уырдыг 30 градусæй уæлдæр куы вæййы, уæд. Кæд хохы фахс æнæ къудзитæ æмæ бæлæстæй уа, уæд та 20 градусæй уæлæмæ уырдыджы. 45 градусæй уæлæмæ уырдыджы та зæйтæ æрцæуынц алы митæруарды фæстæ дæр, æмæ уый дæр ма рох кæнут.

Хуыцау бахизæд, фæлæ дæ зæй æрцахста, зæгъгæ, уæд фындз æмæ дзых æрæхгæнын хъæуы æрмкъухтæй, хъуырбæттæнæй, æфцæгготæй. Зæйы уæвгæйæ, къухтæй ленк кæныны, змæлдтытæ кæнгæйæ, архайут, цæмæй уат зæйы уæллаг хайы æмæ хъавут йæ кæронмæ рацæуыныл, уым йæ цыд сабырдæр кæй вæййы, уый тыххæй.

Иугæр зæй ныллæууыд, уæд бацархайут уæ цæсгомы æмæ риуы раз тыгъдад саразыныл. Цæмæй уын уый феххуыс уа улæфынæн. Кæд гæнæн фæуа, уæд архайут уæлæмæ схизыныл. Зæйы мидæг куы уат, уæд та хъæр ма кæнут, митæй кæй нæ фехъуысдзæн, уый тыххæй. Хъæртæ, æнæрхъуыды змæлдтытæ сымах æрмæстдæр фæцух кæндзысты тыхтæ, туаггуыр æмæ хъармæй.

Уымæй уæлдай, ма фесафут уæхи æнкъарындзинад, стæй архайут, цæмæй ма бафынæй уат. Уыдис ахæм цаутæ дæр, æмæ адæмы куы аирвæзын кодтой суанг æртындæсæймаг суткæйы дæр! Дæхи хъарутæй кæнæ ирвæзынгæнджыты æххуысæй митæй куы рахизай, уæд æркæсут уæхимæ, гæнæн æмæ амалæй дæхицæн баххуыс кæн. Æввахсдæр цæрæн бынатмæ куы бахæццæ уай, уæд фехъусын кæн бынæттон администрацийæн, цы ‘рцыд, уый тыххæй. Уæдæ ма ферох кæн дохтырмæ бацæуын дæр, цыфæнды дзæбæх куы уай, уæддæр. Дарддæр та архайын хъæуы дохтыры кæнæ ирвæзынгæнæг къорды разамонæджы амынддзинæдтæм гæсгæ. Ахсджиаг у дæ уавæры тыххæй хиуæттæн æмæ къабæзтæн фехъусын кæнын дæр. РЦИ-Аланийы Сæрмагонд уавæрты министрады Сæйраг управлени уымæй уæлдай уæ зæрдыл лæууын кæны: кæд бахаудыстут æнæнхъæлæджы цауы æмæ уæ æххуыс хъæуы зынгсирвæзт хуыссынгæнджытæй кæнæ ирвæзынгæнджытæй, уæд æвæстиатæй фæдзурут ахæм телефонтæй: 01 — стационаронтæй, 101 æмæ 112 — чырæгджын телефонтæй.

РЦИ-Аланийы Сæрмагонд уавæрты министрады Сæйраг управлени

ОСТАВЬТЕ ОТВЕТ

Please enter your comment!
Please enter your name here