Нæ фæндтæ иумæйаг сты

0
57

 

Ивгъуыд цыппæрæмы республикæйы Сæргълæууæг БИТАРТЫ Вячеслав фембæлд Нартыхъæуы, Фыййаджыбылы æмæ Рассветы хъæуты цæрджытимæ.

Фыййаджыбылы клубы æмбырдтæ аразæн залы къух бакæнæн нал уыд. Адæм сæ хъаст, сæ курдиæттимæ æрбацыдысты, цæмæй сæ фехъусын кæной Битары-фыртæн. Фембæлды архайдтой Æрыдоны районы сæргълæууæг Тотраты Владислав, министртæ, комитетты разамонджытæ. Алкæмæн дæр фадат уыд микрофонмæ рацæуын æмæ йæ зæгъинаг фехъусын кæнын.

Рассветаг сылгоймаг Тыбылты Галинæ куыд загъта, афтæмæй сæ хъæуы нæй афтек, хостæ æлхæнынмæ цæуынц Æрхонкæмæ кæнæ Мичуринмæ. Иннæмæй та, «тагъд æххуысы» машинæ æрæгмæ цæуы, бинонты хистæры та арæх бахъæуы медицинон æххуыс. Ацæргæ сылгоймаг иу сом дæр нæ дары газы къанторæй, йæ пенсийæ сæ бафиды, уæддæр сæ æфхæрд æййафы.

Фыййаджыбылæй Фæрниаты Виталийы сагъæс у, фæсивæдæн хъæуы хиирхæфсæн бынæттæ, спортивон фæз кæй нæй, уый. Цæуынц æндæр рæттæм, æхца фидынц, цæмæн? — уыд йæ фарст.

Æппæт Нартыхъæуы цæрджыты номæй Дулаты Саукуыдз загъта, æвæстиатæй ивинаг кæй сты доны хæтæлтæ. 60-æм азты райдайæны кæй скодтой, уыцы доны системæ базæронд, хæдзæрттæм нуазыны дон парахатæй нæ цæуы. Скæнынц проект, бавналынц куыстытæм, фæлæ сын кæрон нæй. — Уый не стыр курдиат у, æмæ нын баххуыс кæнут, — загъта буц хистæр.

— Фыдыбæстæйы Стыр хæсты рæстæг Рассветы хъæу хъахъхъæнгæйæ чи фæмард, уыцы æфсæддонтæн хъæумæ бацæуæны ис æфсымæрон ингæн. Зилынц æм фæсивæд, фæлæ курæм, цæмæй Уæлахизы бонмæ цалцæггонд æрцæуа, — загъта Гаппуаты Чермен æмæ ма йæ ныхасмæ бафтыдта: «Ростовы облæсты куыстон æмæ уырдæм дæр æнæкъуылымпыйæ истон нæхи «Рæстдзинад» æмæ «Северная Осетия». Ныр та нæ дыууæ хъæумæ посты кусджытæ газеттæ бонцухæй хæссынц, ома, бирæ нæ рафыстат, зæгъгæ. Мах та газетмæ æрвылбон æнхъæлмæ кæсæм.

«Цы хъæуы скъола нал уа, уыцы хъæу сæфтмæ цæуы. Не скъолайы сывæллæтты ахуырмæ ласынц æндæр рæттæм. Иу кæрты уыдис скъола æмæ рæвдауæндон, ныр дарддæр куыд уыдзыстæм, уый æмбæрстгонд нæу, æмæ нæ стыр сагъæсы æфтауы», — Рассветы цæрæг Хуытъинаты Виктор ацы фарста сæвæрдта республикæйы Сæргълæууæджы раз.

Нартыхъæуы фæзилæнæй хъæумæ цы фæндаг цæуы, дыууæ километры бæрц, уый аразинаг у, кæддæры хуызæн дзы скæнын хъæуы къахвæндаг, стæй электрон рухс. Уый, фыццаджыдæр, адæмы удæнцойдзинад æмæ æдасдзинадæн. Хорз уаид, фæндаджы ацы хай республикæйы Фæндæгты хæдзарады комитеты бæрны куы бакæниккой, уæд, — ахæм курдиат ис нартыхъæуккаг Ализаты Черменмæ.

Ныхас ма цыд цæугæдоны былгæрæттæ сфидар кæныныл, рæзгæ фæлтæрæн спортивон арæзтæдтæ, хъазæн фæзтæ саразыныл, хъæууон культурæйы артдзæстытæм æргом раздахыныл, автобусон-транспортон бастдзинадыл æмæ бирæ æндæр ахсджиаг фарстатыл.

Районы сæргълæууæг Тотраты Владислав æргом ныхасы фехъусын кодта, алы хъуыддагыл дæр куыст кæй цæуы æмæ цæудзæн дарддæр. 2019 азы Нартыхъæуы фæзындзæн гом спортивон фæз, Культурæйы хæдзары райдайдзысты цалцæггæнæн куыстытæ.

Цæугæдон Фыййагдоны сæрты ног хиды арæзтады фæдыл хъæугæ проектонсметон документаци район бацæттæ кодта. Фæндæгтæ цалцæггонд цæудзысты, рохуаты не сты фæсивæды фарстатæ, араздзыстæм спортивон залтæ æмæ фæзтæ, районы бюджетæй, республикæ дæр нæм фæкæсдзæн, — загъта Тотрайы-фырт.

Бирæ арфæйы ныхæстæ фехъуыста Битарты Вячеслав æртæ сыхаг хъæуы цæрджытæй.

— Æхсызгон мын у, не ‘хсæн ахæм æргом ныхас кæй рауад, уый. Кæддæриддæр уыдзынæн уæ фарсмæ. Æрцыдтæн Хицауады уæнгтимæ, бирæтæ дзы нырма ног кусджытæ сты. Зонынц æй, сæ сæйраг нысан адæмæн лæггад кæнын кæй у, йæхи пайдайыл кусын нæ, фæлæ. Ис телефонæй комкоммæ бастдзинад, хъусын кæнут уæ фиппаинæгтæ, уайдзæфтæ, курдиæттæ, æнæрхъуыдыйæ ничи баззайдзæн, — загъта Битарты Вячеслав.

— Фидаргонд цæудзысты цæугæдæтты былгæрæттæ, уый тыххæй балхæдтам ног техникæ. Хъуамæ алы хъæуы дæр уа спортивон зал, хорз клуб, цæмæй фæсивæд пайдаджынæй сæ рæстæг æрвитой сæхи хъæуы, æвзæр митæй хызт уой. Доны фарста нырма бирæ хъæуты у ахæм зын уавæры, иумæйаг программæ араздзыстæм, цæмæй алы хæдзармæ дæр дон парахатæй цæуа.

Скъолатæй иу дæр хъуамæ æхгæд ма æрцæуа, — уый уын фидарæй зæгъын. Нæ алы хъуыддаджы дæр хъуамæ иумæйаг фæндмæ æрцæуæм, — ныфс бавæрдта хъæуы цæрджытæн Битары-фырт.

 

ГУГКАТЫ Жаннæ

ОСТАВЬТЕ ОТВЕТ

Please enter your comment!
Please enter your name here