Арæзтадон къабаз: ивгъуыд азы бæрæггæнæнтæ æмæ фидæны нысантæ

0
56

 

Цæгат Ирыстоны арæзтадон къабазы 2018 азы куысты бæрæггæнæнтæ æмæ дарддæры райрæзты нысантæ — ууыл РЦИАланийы Сæргълæууæг БИТАРТЫ Вячеслав æрныхас кодта Хицауады бæрнон кусджытимæ. Фембæлды архайдтой Хицауады Сæрдары хæдивæг ИКЪАТЫ Русланбег, арæзтад æмæ архитектурæйы министр КАСАТЫ Таймураз æмæ республикæйы Сæргълæууæджы æххуысгæнæг ДЗАНАЙТЫ Хетæг

Уый тыххæй фехъусын кодта республикæйы Сæргълæууæджы прессслужбæ. Касаты Таймураз республикæйы Сæргълæууæгæн бæстон радзырдта, 2018 азы арæзтадон къабазы куыстуæтты къухы цы бæрæггæнæнтæ бафтыд, стæй хæстæгдæр рæстæг цавæр объекттыл куыст цæудзæн, уыдæтты тыххæй. Уыимæ, сæрмагонд æргом аздæхтæуыд, ивгъуыд азы кæронмæ саразын цы объекттæ нæ бафтыд къухы, уыдоны номхыгъдмæ.

— Ныртæккæ куыстытæ кæм цæуынц, уыдоны арæзтад хъуамæ цыбырдæр æмгъуыдтæм кæронмæ ахæццæ уа. Уыимæ, арæзтадон технологиты домæнтæ æнаиппæй æххæстгæнинаг сты. Курæг уæ дæн, цæмæй пъланон æмгъуыдтæ фæстæдæрмæ æргъæвд ма цæуой, — ахæм амынддзинад Цæгат Ирыстоны Сæргълæууæг радта Хицауады уæнгтæн.

Ныхасы архайджытæ æрдзырдтой, 2020 азы арæзтадон пълантæм цы ахсджиаг социалон объекттæ бахæсдзысты, уыдоны номхыгъдыл дæр. Битарты Вячеслав куыд фæнысан кодта, афтæмæй, уыцы номхыгъд цæттæ кæнгæйæ, уæлдай æргом аздахын хъæуы, уыцы объекттæ кæм æрбынæттон уыдзысты, уыцы горæттæ æмæ хъæуты цæрджыты фиппаинæгтæ æмæ фæндæттæм.

Боны фæткы уыд, сæ раздæры цæрæнбынæттæ æнæбары чи ныууагъта, уыцы адæмæн хæдзæрттæ дæттыны фарста дæр. Куыд загъдæуыд, афтæмæй уыцы фарстайыл республикæйы разамынд æнгом æмархайд кæны федералон ведомствотимæ. Уыцы куысты фæрцы фылдæр æргом здæхт цæуы адæмы ацы категорийы уавæр фæхуыздæр кæнынмæ. Зæгъæм, 2017 азы ахæм адæмы царды уавæртæ фæхуыздæр кæнынæн федералон бюджет республикæйæн радих кодта 655 милуан сомы (æххуыс аххæссыд 283 бинонтыл), 2018 азы та — 1,2 миллиард сомы (æххуыс фæхæццæ 488 бинонтæм). Куыд нысангонд цæуы, афтæмæй ацы аз та Цæгат Ирыстонæн радих кæндзысты 1,8 миллиард сомы бæрц (уыцы фæрæзты фæрцы 600 бинонты царды уавæртæ хуыздæрæрдæм фæивдзысты).

Фембæлды рæстæг æркастæуыд æндæр ахсджиаг фарстатæм дæр.

Нæ уацхæссæг

 

ОСТАВЬТЕ ОТВЕТ

Please enter your comment!
Please enter your name here