Бахрам Османов Ирон театры сценæйы æвæры «Хъæздыг сылгоймаг»

0
95

 

Цæгат Ирыстоны Тæбæхсæуты Балойы номыл паддзахадон Ирон академион театры сценæйы Азербайджаны паддзахадон театры сæйраг режиссер, Азербайджан æмæ Хъалмыхъы аивæдты сгуыхт архайæг Бахрам ОСМАНОВ æвæры зындгонд азербайджайнаг драматург Али АМИРЛИЙЫ комеди «Хъæздыг сылгоймаг». Бафиппайын хъæуы, ахæм сфæлдыстадон бастдзинæдтæ Ирыстон æмæ Азербайджаны театрты ‘хсæн фыццаг хатт кæй сты, уый. Хæлардзинады хидæн бындур сæвæрдта Ирон театры аивадон разамонæг КОЛЫТЫ Владислав æмæ куыд загъта, афтæмæй фидæны Ирон театры режиссертæй дæр исчи ацæудзæн Азербайджанмæ, рагацау кæй равзардзысты, уыцы ирон пьесæ сценæйы æвæрынмæ. Æрбацæуæг режиссеримæ иу сценæйыл бакусын, æмхуызон пайда у театры артисттæн æмæ режиссертæн дæр. Уымæн æмæ кæрæдзи хайджын кæнынц сæ зонындзинæдтæ æмæ фæлтæрддзинадæй. Бахрам Ирыстонмæ æрбацыд фыццаг хатт. Нæ фембæлды рæстæг радзырдта, йæ куыст Ирон театры артисттимæ куыд цæуы æмæ йæм цы æнкъарæнтæ сæвзæрд, уыдон

— Фыццаг хатт азербайджайнаг режиссер Ирон театры æвæры спектакль. Уый у историон цау дыууæ театры азфысты дæр. Ирыстон æмæ Азербайджаны театрты иуæй-иу артисттæ æмæ режиссертæ кæд кæрæдзи рагæй зыдтой, уæддæр сфæлдыстадон æгъдауæй баст нæ уыдысты. Нæ цыдысты кæрæдзимæ гастролты, нæ æрвыстой кæрæдзимæ режиссерты спектаклтæ æвæрынмæ. Иууылдæр зонæм зындгонд драматург æмæ режиссер Хуыгаты Георы сфæлдыстад, куыд бирæ æндæр театртæ, афтæ Азербайджаны театртæ дæр кæй æвæрдтой йæ мидисджын пьесæтæ. Нæ адæм рагæй дæр цæрынц æнгомæй, æмæ махæн дæр нæ хæс у уыцы бастдзинæдтæ фидардæр кæнын.

«Хъæздыг сылгоймаг» кæд комеди у, уæддæр у цардæй ист æнкъард истори, кæцы нæ æфтауы арф хъуыдытыл. Æнæмæнг, фæцæудзæн театрдзауы зæрдæмæ. Кæддæр Достоевский загъта: “Дуне рæсугъддзинад кæй фервæзын кæндзæн”. Мæнмæ гæсгæ та, дуне фервæзын кæндзæн ирони. Ам дæр царды риссагдæр фарстатæм автор акаст мидбылхудгæйæ æмæ афтæмæй æмбарын кæны театрдзауæн рæстдзинад. Хъыгагæн, глобализаци ныцъист кодта адæймагдзинады миниуджытæ. Ацы спектакл кæд ссæдз азы размæ ныффыста автор, уæддæр дзы цы хъуыды æвæрд ис, уый абон дæр у актуалон. Адæймаджы материалон æмæ монон хæрзтæй иу равзарын куы бахъæуы, уæд арæхдæр рæдыдæй равзары хъæздыгдзинад. Ис дзы арф æнкъарæнтæ, ирдæй æвдыст цæуынц бинонты ‘хсæн ахастдзинæдтæ. «Хъæздыг сылгоймаг» æвæрд æрцыд бирæ республикæты æмæ алы ран дæр ссис адæмæн уарзон спектакль. Ис нæхи театры репертуары дæр.

— Спектаклы премьерæ уыдзæн 1 мартъийы. Баззад хæрз цыбыр рæстæг. Куыд цæуы куыст артисттимæ?

— Æхсызгон мын у, Ирон театры ахæм хъомысджын артистты къорд кæй ис, уый. Ам æртæ фæлтæры кæрæдзийæн аргъ кæнгæйæ, æмгуыст кæнынц аивады бæрзæндтæм цæугæйæ. Фыццаг къуыри мын зын уыд, уымæн æмæ хуыздæр базонын хъуыд ирон æвзаг, пьесæйы тæлмац банкъарын. Бытъæты Роберт æй тынг хорз ратæлмац кодта. Артисттæ зæрдиагæй кæй архайынц, уымæ гæсгæ мæнæн дæр æнцон у семæ кусын, ног аивадон ахорæнтæ агурын. Нæ нысан у, цæмæй спектакл фидæны канд Ирон театры сценæйыл нæ, фæлæ хъæутæм æмæ ма суанг фестивалты архайынмæ дæр куыд ласой, ууыл бацархайын. Кæй зæгъын æй хъæуы, нæхимидæг тыхсæм премьерæйы размæ, фæлæ мæ уырны, спектакль кæй фæцæудзæн адæмы зæрдæмæ æмæ бирæ рæстæг кæй нæ фæцух уыдзæн Ирон театры репертуарæй.

— Бахрам, ирон æвзаг нæ зонгæйæ, спектакл ирон æвзагыл кæй æвæрыс, уый йæхæдæг хицæн æнтыст у.

— Ацы уавæр нын нæ куыст æппындæр нæ къуылымпы кæны. Пьесæ мын у тынг зындгонд, иу æмæ йæ дыууæ хатты нæ сæвæрдтон. Æвзаг нæ зонгæйæ, уæ артисттимæ кæрæдзи æмбаргæйæ кæй кусæм, уый та, фыццаджыдæр, у Ирон театры артистты профессионалондзинадыл дзурæг. Æвзаг нæ зонгæйæ, аивадон æвзагæй кæрæдзи æмбарын, æнтыстæн йæ ратæдзæн у. Æз сын сæ алы фезмæлдæй дæр æнкъарын, ныртæккæ цы æмæ куыд хъуамæ зæгъой, уый. Мæ иннæ нысан у артистты кæцыдæр штамптæй фæхицæн кæнын.

Удæнцойæ кусын спектаклы сæйраг хъайтартæ: Æлбегаты Алан, Битарты Алыксандр æмæ иннæтимæ. Иннæ ахæм, театрдзау æхсызгонæй сæмбæлдзæн дæргъвæтин рæстæджы фæстæ артисткæ Цæрикъаты Римæйы рацыдыл сценæмæ. Уый уыдзæн йæ бенефис. Ацы спектаклы цы характерон сурæт сараздзæн, уымæй раргом уыдзæн йæ бирæвæрсыг курдиат.

 — Цавæр уыд дæ фæндаг режиссеры дæсныйадмæ?

— Профессионалон театры кусын 30 азæй фылдæр. Уыцы рæстæгмæ сæвæрдтон куыд фæсарæйнаг авторты пьесæтæ, афтæ уырыссаг классикты æмæ алы адæмыхæттыты национ уацмыстæ дæр. Каст фæдæн Бакуйы театралон институт. Мæ дипломон куыст Тинес Уильямсы пьесæ «Стеклянный зверинец» куы бахъахъхъæдтон, уæд мæ уайтагъд айстой Азербайджаны паддзахадон национ театрмæ режиссерæй. Уæд мыл цыдис æрмæст 26 азы, æмæ абоны онг Азербайджаны æрыгондæр режиссер нырма нæма уыд. Уый, кæй зæгъын æй хъæуы, уыд хъысмæты лæвар. Дзæвгар дзы бакусгæйæ, уырдыгæй ацыдтæн æмæ куыстон алы адæмыхæттыты театрты хуынд режиссерæй. Ныр æхсæз азы разамынд дæттын Азербайджаны рæзгæ фæлтæры паддзахадон театрæн. Фæлæ уыцы-иу рæстæг æмгуыст кæнын алы республикæты театртимæ дæр. Аст азы кусын Бакуйы Культурæйы паддзахадон институты режиссеры дæсныйады кафедрæйы, дæн уыцы институты профессор. Ис мæм хи театралон лаборатори. Азербайджаны рæзгæ фæлтæры театр Уæрæсейы зындгонд у йæ хъæздыг репертуарæй, уымæн æмæ арæх фæархайæм фестивалты.

— Цал спектаклы сæвæрут афæдзмæ?

— Афæдзмæ бацæттæ кæнæм 8-10 спектаклы. Уыдонæй 3-4 сæвæрæм сывæллæттæн. Иннæтæ та — хистæр кары театрдзаутæн. Майрæмбон, сабат æмæ хуыцаубоны спектаклтæ февдисæм хистæртæн, сабат æмæ хуыцаубоны та — кæстæртæн. Нæ артисттæ архайынц куыд хистæртæн, афтæ кæстæртæн æвæрд спектаклты дæр. Рæстмæ цы спектаклтæ нæ фæвæййынц, уыдон уайтагъд айсæм нæ репертуарæй.

Азербайджаны цы ссæдз драмон театры ис, уыдонæй æппæты фылдæр артисттæ ис нæ театры — 94 артисты. Уый та уымæн, æмæ оптимизацийы фæлгæты Камерон театр, Фæсивæдон театр æмæ Сабиты театр баиу кодтой. Æмæ æртæ театрæй рауад иу, абон æз разамынд кæмæн дæттын, уый. Уымæй уæлдай нæм ис 26 паддзахадон театры. Уыдонæй 2 сты музыкалон, 5 — куклаты театртæ, 20 — драмон театртæ. Уыдон иууылдæр Президенты уынаффæйæ цалцæггонд æрцыдысты æмæ ифтонггонд сты нырыккон техникæйæ. Нæхи институт нын цæттæ кæны режиссертæ æмæ артисттæ дæр. Бирæтæ ахуырад райсынц Уæрæсейы институтты дæр

— Ирыстоны фыццаджыдæр дæ цæст цæуыл æрæвæрдтай?

— Дзæуджыхъæу у сыгъдæг æмæ райдзаст горæт. Бацин кодтон, рæстæджы ивддзинæдтæм нæ кæсгæйæ, центры зæронд хæдзæртты архитектурон хуыз кæй бахъахъхъæдтат, ууыл. Цæры дзы зæрдæхæлар адæм.

 — Азербайджан æмæ Ирыстоны ‘хсæн бастдзинæдтæн ис арф уидæгтæ. Суанг ма Тугъанты Алыксандр бындур сæвæрдта уæ паддзахадон театрæн дæр.

— Уый тыххæй мæн хицæнæй зæгъын фæнды. Тугъанты Алыксандры фырт Алыксандры ном Азербайджаны зындгонд у алы сфæлдыстадон адæймаг æмæ интеллигенцийы минæвæрттæн дæр. Уый революцийы фæстæ бындур сæвæрдта Азербайджаны национ академион театрæн. Разамынд ын лæвæрдта 1936 азмæ. Алыксандры руаджы нæм фæзынд театралон техникум. Азербайджайнаг æвзаг зыдта æви нæ, уый бæлвырд нæ зонын, фæлæ уыцы рæстæг сæвæрдта нæ национ драматургты уацмыстæй дзæвгар. Мах ын йæ лæггæдтæн кæнæм стыр кад, йæ ном рох нæу.

Ирыстоны театрдзауты хонын спектаклы премьерæмæ, цæмæй уæ зæрдæйы дзæбæхæн аивады артдзæсты уæ фæллад суадзат æмæ зæгъат уæ хъуыдытæ «Хъæздыг сылгоймаджы» тыххæй.

ХЕТÆГКАТЫ Оксанæ Авторы ист къам

 

ОСТАВЬТЕ ОТВЕТ

Please enter your comment!
Please enter your name here