Ерыстæ — алы рæтты Ивгъуыд къуыри

0
103

 

Ирыстоны спортсментæ Уæрæсе æмæ æндæр бæстæты цы ерысты архайдтой, уырдыгæй сыздæхтысты къорд хæрзиуæгимæ.

Дзюдойæ Беккуызарты Алик æмæ Цæгæраты Хъазыбеджы хъомылгæнинаг

Хуыбецты Алан Уæрæсейы ном хъахъхъæдта, Парижы цы дунеон турнир «Стыр згъæрхуд», зæгъгæ, цыди, уым. Ацы турнирæн ис стыр ахадындзинад. Суанг ма йæ Дунейы чемпионаты халдих дæр фæхонынц. Уымæ гæсгæ дзы ерысы бацæуынц æппæт дунейы тыхджындæр дзюдоисттæ. Парижы «Стыр згъæр»-ы ерыс кодтой 97 бæстæйы 600 дзюдоисты.

Хуыбецты Алан 81 кг онг уæзы хæцгæйæ, рав- дыста хорз цæттæдзинад. Алан сыгъдæгæй рамбылдта фондз ныхмæлæууæгæй. Фыццаг рамбылдта ливайнаг дзюдоист Азарæй, уый фæстæ æмгъуыдæй раздæр фæуæлахиз Азийы хъæзтыты уæлахиздзау, казахстайнаг дзюдоист Хамзайыл. Йе ‘ртыккаг ныхмæлæууæг уыд венгриаг дзюдоист Унгвари, фæлæ уый бон дæр нæ баци Аланы цырд ныббырстытæн бафæразын æмæ йæ уый йе уæнтыл æрæппæрста. «Иппон»- ахæм бæрæггæнæнæй фæуæлахиз Хуыбецыфырт йе ‘ртыккаг ныхмæлæууæгыл.

Аланы цыппæрæм ныхмæлæууæг уыди уæрæсейаг дзюдоист Халмурзаев. Уæрæсейы командæйы тренерты фæндыдис, цæмæй уый дæр кæронбæттæнмæ рацæуа, уый, æмæ чи зоны, уыдоны фæндмæ гæсгæ ацы фембæлды Хуыбецы-фырт йе ‘ппæт хъарутæй не спайда кодта. Уæлахиз лæвæрд æрцыд Халмурзаевæн, фæлæ уый кæронбæттæны 1/2-æм къæпхæны фæхæрд æмæ уый фæстæ æнæ хæрзиуæгæй баззад.

Хуыбецты Аланæн ма фадат уыди 3-аг бынатыл тох кæнынæн æмæ уыцы хæс иттæг хорзæй сæххæст кодта. Аланы ма бронзæ майдан рамбулынæн бахъуыд дыууæ ныхмæлæууæгимæ фембæлын, æмæ уый сæ дыууæйыл дæр фæуæлахиз æнæдызæрдыгæй. Афтæмæй Хуыбецты Алан ссис «Стыр згъæрхуд»-ы турниры 3-аг бынат бацахсæг. Уый рауад Уæрæсейы командæйы иунæг хæрзиуæг ацы турниры.

Дзюдойыл дзургæйæ ма бацин кæныны аккаг сты, фæсивæд (23 азы онг) Грознайы ацы бонты Цæгат Кавказы федералон зылды чемпионтæ цыппарæй кæй систы, астæй та 2-аг æмæ 3-аг бынæттæ кæй бацахстой, уый дæр. Фыццаг бынæттæ сылгоймæгты ерысы бацахстой Челдыты Светланæ (48 кг) æмæ Гаджиты Алинæ (53 кг).

Нæлгоймæгты ерысты фесгуыхтысты Армен Татевосян (66 кг) æмæ Дыгурты Алан (+ 100 кг). Ирыстойнаг богæлттæ фондз хæрзиуæджы рамбылдтой грекъаг-ромаг хъæбысхæстæй Цæгат Кавказы федералон зылды фыццаг бынат бацахсыныл ерысты фæсивæды (21 азы онг) ‘хсæн. Ерыстæ цыдысты Махачкалайы æмæ сæ нысан уыд, нæ Федералон зылды спортивон кад Уæрæсейы чемпионаты чи хъахъхъæндзæн, уыцы богæлтты нæмттæ сбæрæг кæнын.

Ирыстойнаг лæппутæн Махачкалайы бантыст фондз хæрзиуæджы рамбулын. Сыгъзæрин майданæй хорзæхджынгонд ссис, æрыгæтты ‘хсæн Европæйы фыццаг бынат бацахсæг, Тыбылты Георги. Уый 60 кг онг уæзы хæцгæйæ, фæуæлахиз йæ цыппар ныхмæлæууæгыл æмæ æнæдызæрдыгæй бацахста фыццаг бынат. Сæ уæзты 2-аг бынæттæ бацахстой Хъозиты Азæмæт (72 кг) æмæ Таматы Тимур (82 кг). Ацы æртæ богалы сты тренер.

Цæмæхъуаты Нарты хъомылгæнинæгтæ. Нарты цыппæрæм хъомылгæнинаг Гугкаты Давид 67 кг онг уæзы бацахста 3-аг бынат æмæ хорзæхджынгонд ссис бронзæ майданæй. Бронзæ майдан ма рамбылдта тренер Емзар Карелидзейы хъомылгæнинаг Хуыгаты Аслан (87 кг). Цæмæхъуаты Нарт куыд зæгъы, афтæмæй нæ фондз лæппуйы дæр балцæгтæ райстой Уæрæсейы фыццаг бынат бацахсыныл ерыстæм. «Уыдон цæудзысты 7-10 мартъийы Иркутскы æмæ нæ ныфс ис, нæ фæсивæд уым æнæ хæрзиуæгæй кæй нæ баззайдзысты, уымæй. Цы рæстæг ма нын ис, уымæй хъæуы спайда кæнын æмæ нæ хъомылгæнинæгты Иркутскы ерыстæм, куыд гæнæн ис, афтæ хуыздæр бацæттæ кæнын» — загъта Цæмæхъуаты Нарт.

БАСКАТЫ Уырызмæг

 

ОСТАВЬТЕ ОТВЕТ

Please enter your comment!
Please enter your name here