Мæликк Зæрæмæджы уæзæгæй куыд аздæхт

0
45

 

Ирон адæм æмæ Гуырдзыйы ахаст нæ хуыздæр кодта. Амардис Гуырдзыйæн йæ иу паддзах, дыккаг, рацыд рæстæг, фæлæ быцæудзинад æвзæрæй-æвзæрдæр кодта. Гуырдзы загътой ирон адæмæн, хъалон куы нæ бафидат фæззæгмæ, уæд-иу хъаст ма ракæнут

Ирон адæмæн уыдис Мамысоны æфцæджы хъахъхъæнджытæ сæ арæныл. Иу райсом кæсынц Гуырдзыйы ‘рдæм æмæ ком æфсадæй байдзаг æмæ цæуынц Цæгат Иры ‘рдæм. Хъахъхъæнджытæ бæхтыл абадтысты æмæ фæдис хъæргæнгæ Зæрæмæгмæ æрхæццæ сты, æмæ бамбарын кодтой хъуыддаг Магкаты Зурабæн. Зураб фæдзырдта фæсивæдмæ æмæ сæ фæдис арвыста Дыгургоммæ, Куырттаты коммæ, Нары коммæ, Кæсæгмæ, Гуырдзы нæм ныббырстой æмæ нын феххуыс кæнут, зæгъгæ. Цы бон арвыста, уыцы бон Мæликк Зæрæмæджы уæзæгмæ æрхæццæ фæссихор. Мæличчы размæ рахызтис Магкаты Зураб æмæ йæм дзуры:

— Æгас цу, нæ буц уазæг, ирон зæххыл! Мæликк уыдис стыр лæг, дардта даргъ боцъотæ æмæ рихитæ, Зураб та уыдис рæстæмбис, къæсхуыр лæг. Мæликк Зурабæн афтæ зæгъы:

— Ацы комы дæуæй лæгдæр ничи уыд, мæ размæ чи рахызтаид, уый дзы нæй?

Æмæ йын Зураб дзуапп радта:

— Лæгдæртæ лæгдæрты размæ ацыдысты, чи цы аккаг у, уый йæм рацыд. Мæликк Зурабæн афтæ зæгъы: — Хæйрæг ирон лæг, æз ардæм аргъæуттæ кæнынмæ не ‘рцыдтæн, хъалон цæуылнæ фидут? Хъалон дæр, дам, бафиддзыстæм, фæлæ уал дæ бæхæй æрхиз æмæ нын нæ цæхх, нæ кæрдзынæй саход. Мæликк дзуры:

— Æз ардæм хæрынмæ не ‘рцыдтæн, кæм сты де ‘фсæдтæ, рацæут хæцынмæ.

Зураб æм дзуры, хæцынæй хæрын хуыздæр у æмæ уал дæ фæллад суадз. Ныр тагъд изæр у æмæ ма нын нæ цæфтæ æмæ нæ мæрдтæ чи бафснайдзæн æхсæвыгон.

Уый адыл Мæликк сразы Зурабимæ. Æфсæдтæ æрбынат кодтой Сымиаг фæзы аргъуаны цур, сæ хицæутты та сын акодтой Уæллаг Зæрæмæгмæ. Уым сæм дзæбæх æркастысты ирон арахъхъæй æмæ сæ хъæуыл ныппырх кодтой. Зураб зæрæмæггæгтæн загъта:

— Уæ фос, уæ кæрчытæ, уæ куыйтæ скъæты бакæнут, уæхæдæг дæр иунæг хъæр дæр ма скæнут, уадз æмæ нæ уазджытæ фынæй кæной.

Райсомæй гуырдзы æрæджиау райхъал сты æмæ кæрæдзийы рацагур-бацагур кæнын байдыдтой. Æмбисбонмæ æрæмбырд сты, уæдмæ сын хæринаг скодтой — задынтæ. Хæрыныл куы ‘рбадтысты, уæдмæ фæдисæттæ æмбырд кæнын байдыдтой.

Зураб Мæличчы фæстиат кæны, задын Мæличчы рихитæ æмæ боцъотыл ныххæцыд æмæ дзуры Зурабмæ:

— Ай цавæр хæринаг у, гуыбынмæ дзы куы ницы цæуы, рихитыл æмæ боцъотыл куы ныххæцыд?

— Ахæр, ахæр, Мæликк, боцъотæ æмæ рихитыл куыд хæцы, фарсыл дæр афтæ хæцы.

Хæрды фæстæ сæхи ныхсадтой æмæ рараст сты хæцынмæ. Уæллаг Зæрæмæгæй сæ фæстæ рацыдысты гыццылæй, стырæй. Сæ сылгоймæгтæ фæрæттимæ, æмæ сæ абон дæр Зæрæмæджы сылгоймæгты хонынц фæрæтджынтæ. Зураб Дæллаг Зæрæмæгмæ куы ныххæццæ, уæд Мæликмæ дзуры:

— Акæс-ма уæртæ Хурыскæсæнмæ (ком бæхджын æфсадæй нал зынд). Акæс-ма дæлæ Цæгатмæ (сау мигътæ ком сæхгæдтой).Уалæ, дам, Хуссары сау халонæй байдзаг, уыдон, дам, дæ мардмæ æнхъæлмæ кæсынц.

Мæликк бамбæрста, ирон лæг Магкаты Зураб ыл кæй фæтых зондæй, уый. Зураб загъта Мæликкæн:

— Ацу дæ хæдзармæ дзæбæхæй, кæннод ардыгæй бындз дæр нал атæхдзæн. Мæликк сæргуыбырæй йæ æфсæдтæн скомандæ кодта æмæ ацыдис фæстæмæ сæхимæ Гуырдзымæ.

80-аздзыд СИХЪОТЫ Хадзымуссæйы ныхæстæм гæсгæ йæ къорд азы размæ ныффыста СИХЪОТЫ Валодя

ОСТАВЬТЕ ОТВЕТ

Please enter your comment!
Please enter your name here