Æвзонг самбистты ерыстæ

0
97

 

«Динамо»-йы спортивон комплексы ивгъуыд хуыцаубоны 3-аг хатт цыдысты самбо æмæ дзюдойæ ССР-ы Цæдисы спорты мастер Аветис КИРАКОСЯНЫ номарæн турниры ерыстæ.

Ерысты архайдтой 12-13- аздзыд 90 самбисты Цæгат æмæ Хуссар Ирыстонæй, Кæсæг-Балхъары республикæйæ æмæ Стъараполы крайæ. Æвзонг самбисттæ бацархайдтой, куыд гæнæн ис, афтæ зæрдæмæдзæугæ хæст ракæныныл. Самбоуарзджытæй «Динамо»-йы хъæбысхæсты залмæ чи æрбацыди, уыдон нæ фæфыдæнхъæл сты. Æнæмæнг, нæ æрыгон фæлтæры архайд сæ зæрдæтæм фæцыди.

Самбисттæ тырныдтой сæ уарзон спорты хуызы, цымыдисагдæрæй цы ис, уый равдисынмæ. Кæй зæгъын æй хъæуы, ацы кары æппæт фæндæттæ сæххæст кæнын алкæй къухы не ‘фты, фæлæ лæппутæ уæндонæй тырныдтой, кæм æвиппайды сæ ныхмæлæуджыты сæ сæрты аппарыныл, кæнæ йæ риссаг æлхъывдмæ æрцахсын æмæ афтæмæй сыгъдæгæй фæуæлахиз уæвынмæ.

Кæронбæттæны дæс фембæлды фыццаг бынат бацахсыныл ерыс чи кодта, уыдонæй аст уыдысты Кæсæг-Балхъары минæвæрттæ. Сæ тренер Мурад Тшенашев уый тыххæй загъта: «Мах Ирыстонмæ кæдфæнды дæр æхсызгонæй фæцæуæм. Нæ хъомылгæнинæгтæ кæрæдзимæ цас арæхдæр цæуой, уый дыууæтæн дæр пайдадæр у. Сæ арæхстдзинад ахæм ерысты рæвдздæр рæзы. Стыр бузныг нæ хорз фысымтæн, ахæм хъæугæ турнир кæй сарæзтой, уый тыххæй». Ахæм хъуыдытæ уыди Хуссар Ирыстоны командæйы тренер Хъоцыты Тамерлан æмæ Стъараполы крайы самбистты тренер Георгий Аветисовмæ дæр.

Кæронбæттæны тохтæ рауадысты тынг цымыдисаг. Æппæты рогдæр уæзы (35 кг онг) Кæсæг-Балхъары минæвар Тамерлан Висланеев æмæ ирыстойнаг лæппу Гæбæраты Тамерланы фембæлд ахицæн Висланеевы пайдайæн.

38 кг онг уæзы фыццаг бынат бацахсыныл кæронбæттæны ерыс кодтой Кæсæг-Балхъары горæт Баксаны минæвæрттæ Борис Лулунов æмæ Идар Сонов. Сæ тох ахицæн Идар Соновы пайдайæн.

42 кг онг уæзы дæр кæронбæттæны турниры уæлахиздзау суæвыныл ерыс кодтой баксайнаг дыууæ самбисты Тамерлан Камбиев æмæ Тамерлан Качесоков. Уæлахиздзау ссис Тамерлан Камбиев.

46 кг онг уæзы ирыстойнаг лæппутæ Рубен Калтухчан æмæ Зураты Зауырæн сæ фембæлд ахицæн 2:1 хыгъдæй Рубен Калтухчаны пайдайæн.

Тынг хъазуатон рауад 50 кг онг уæзы Хуыгаты Олег æмæ Абудин Бековы (КБР) фембæлд. Суанг кæронмæ дæр зын сбæрæг кæнæн уыд ацы тохы уæлахиздзауы. Æппынфæстаг тæрхонгæнджытæ уæлахиздзауыл банымадтой Хуыгаты Оледжы, куыд фæстаг балл райсæджы. Уæлахиздзау зын сбæрæг кæнын уыд Абайты Эрик æмæ Алан Герговы (54 кг онг уæз) фембæлды дæр.Чысыл сæрæндæр разынд Алан Гергов æмæ ссис турниры уæлахиздзау.

59 кг онг уæзы Хъыбызты Рустам тынг сæрæнæй йæхи равдыста æппæт турниры дæр. Кæронбæттæны фембæлды йæ ныхмæлæууæг уыди Кæсæг-Балхъары республикæйы минæвар Тамерлан Хумсергенов. Хъыбызы-фырт ацы тохы фæуæлахиз æмгъуыдæй раздæр æмæ ссис Аветис Киракосяны номарæн турниры уæлахиздзау.

65 кг онг уæзы турниры уæлахиздзау ссис Кантемир Кочесоков (КБР). Уый кæронбæттæны очкотæм гæсгæ рамбылдта Гаджиты Станиславæй.

71 кг онг уæзы фыццаг бынатыл кæронбæттæны тохы бацыдысты Болататы Георги æмæ Джиоты Давид (Хуссар Ирыстон). Сæ ныхмæлæуд ахицæн Болататы Георгийы пайдайæн 2:0 хыгъдæй. Ацы кары самбистты уæззау уæзы (+ 71 кг) уæлахиздзау ссис Гæззаты Давид, 2-аг бынат та бацахста Артур Таов (КБР).

Уæлахиздзаутæ æмæ призон бынæттæн хæрзиуджытæ, грамотæтæ æмæ сæрмагонд лæвæрттæ (самбойы къурткæтæ) чи саккаг кодта, уыдонимæ уыд Аветис Киракосяны фырт Роберт Киракосян æмæ загъта: «Мæнмæ гæсгæ, турнир хорз арæзт æрцыд. Æрыгон самбисттæ сæ архайдæй спортуарзджыты зæрдæтæ барухс кодтой. Æз стыр бузныг зæгъын, нæ фарсмæ чи æрбалæууыд, уыцы адæймæгтæн. Бузныг спортивон æхсæнад «Динамо»-йы кусджытæн, Адвокатон палатæйæн, нæ республикæйы Физикон культурæ æмæ спорты министрадæн. Мах архайдзыстæм, цæмæй ацы турнир азæйазмæ хуыздæргæнгæ цæуа, ууыл».

Ерысты сæйраг тæрхонгæнæг Илья Циклаури ма Роберт Киракосяны ныхæстæм бафтыдта: «Турнир цыди 3-аг хатт æмæ, азæй-азмæ хуызджындæр æмæ цымыдисагдæр кæй кæны, уый уынæм. Самбисттæн сæ цæттæдзинад зынгæ рæзы, иннæ ахæмæй та дзы архайджытæ дæр фылдæр кæны. Ноджы ма нæм ацы хатт нæ сыхаг Кæсæг-Балхъарæй, Стъараполы крайæ æмæ Хуссар Ирыстонæй дæр самбистты командæтæ кæй æрцыди, уый йын йæ ахадындзинад ноджы бæрзонддæр кæны. Фидæнмæ нæ зæрды ис ноджыдæр ма æндæр республикæтæй дæр æрбахонын уазджытæ. Турнирæн йæ амидингæнæг уыдысты Аветис Киракосяны бинонтæ æмæ йын уыдон сæ бон цы у, уымæй æххуыс кæнынц. Æнæмæнг нæ ацы кары самбисттæн турнир у тынг хъæугæ æмæ йæм «Динамо»-йы спортивон æхсæнад дарддæр дæр йæ цæст дардзæн.

 

Футбол. Леонид Саблины номарæн турнир

Леонид Саблины æрвылазон номарæн турниры ивгъуыд сабат æмæ хуыцаубоны сбæрæг сты, æрдæгкæронбæттæны цы цыппар командæйы хъаздзысты, уыдон.

Сабаты,16 февралы, стадион «Металлурджы» фæзмæ фыццаг рацыдысты Дзæуджыхъæуы дыууæ командæйы «Ирыстоны уарт» æмæ «СКГМИ». Ацы фембæлды 6:0 хыгъдæй фæуæлахиз «Щит Осетии» æмæ рацыд æрдæгкæронбæттæнмæ.

Ерысты сæйраг тæрхонгæнæг Беджызаты Эдуард куыд зæгъы, афтæмæй «Ирыстоны уарт» ахæм стыр хыгъдæй кæй фæуæлахиз, уый диссаг нæу, уымæн æмæ ацы командæйы хъазынц цалдæр фæлтæрдджын футболисты. «Уыдон къордæй хъазыдысты профессионалон командæты æмæ, кæй зæгъын æй хъæуы, сæ ныхмæлæуджытæй фæлтæрдджындæр æмæ цæттæдæр сты», — загъта Беджызаты Эдуард. Дыккаг хъазты фембæлдысты дзæуджыхъæуккаг иннæ командæ «Синдикат» æмæ Октябрыхъæуы «Аланыстон». Хъазт рауад тынг хъазуатон. Дыууæ командæйы дæр тынг къæрцхъусæй хъахъхъæдтой сæ кулдуæрттæм бацæуæнтæ æмæ хъазты хъысмæт лыггонд æрцыд октябрыхъæуккæгтæн цы иу пурти бантыст «Синдикат»-ы кулдуары бакъуырын, уый фæрцы.

17 февралы Беслæны стадионы сбæрæг сты æрдæгкæронбæттæны чи хъаздзæн, уыцы иннæ дыууæ командæйы. Беслæны «Пищевик» æмæ Æрыдоны «Стройинвест»-ы фембæлды беслæйнæгтæн цы иу пурти бантыст æрыдойнæгты хызы бакъуырын, уый сын æрхаста уæлахиз. Уыцы уæлахизы фæстæ «Пищевик” рацыд æрдæгкæронбæттæнмæ æмæ 23 февралы фембæлдзæн Октябрыхъæуы «Алани»-имæ.

Ноджы хъазуатондæр рауад, Беслæны стадионы цы дыккаг хъазт цыди, уый.

Олгинскæйы командæ «Ног фæлтæр» æмæ «Æрыдон»-æн сæ фембæлд ахицæн 1:1 хыгъдæй. Турниры фæткмæ гæсгæ хъазты хъысмæт лыггонд цыд 11-метрон цæфтæй. Ацы фæлварæны рæстдзæвиндæр разындысты олгинскæйаг футболисттæ æмæ рамбылдтой 3:1 хыгъдæй. Ныр 23 февралы «Ног фæлтæр» турниры æрдæгкæронбæттæны фембæлдзæн «Ирыстоны уарт»-имæ.

23 февралы хъæзтыты чи фæуæлахиз уа, уыдон 24 февралы турниры кæронбæттæны фембæлды сбæрæг кæндзысты Леонид Саблины 41-æм номарæн турниры уæлахиздзау æмæ 2-аг бынат бацахсæджы.

Ацы хъазты размæ та уыцы бон фембæлдзысты æрдæгкæронбæттæны фæхæрдуæвæг командæтæ æмæ сбæрæг кæндзысты 3-аг бынат бацахсæджы.

БАСКАТЫ Уырызмæг

 

ОСТАВЬТЕ ОТВЕТ

Please enter your comment!
Please enter your name here