Ивддзинæдтæ ис

0
104

 

Уалдзæджы райдайæнмæ нырма бирæ хъæуы. Зымæг барвæндонæй йæ гæрзтæ æрæвæра, ахæм каст нæ кæны. Мит ма цасфæнды дæр рауарæд, Змейкæйы сæйраг уынг хæрзæфснайдæй йæ урс хъæццулы бын куы фæкæна, уый диссаг нæу. Атайдзæн, æмæ та сыхтæ уыцы аивæй разындзысты.

Фæлгонцадыл Ленины уынджы адæм æмхуызонæй архайынц. Алчидæр йæ къæсæр, йæ дуар, йæ хæдзарæй рауайæнты сыгъдæгдзинадыл кусы. Бæлæсты æхсæдæнтæ судзынц. Нæлгоймæгтæ хырх æмæ фæрæттæй æвналынц, сылгоймæгтæ — уисæйттæй. Зиууæттæн сæ фылдæр фæсивæд кæй сты, уымæй зæрдæ райы.

Хъæубæстæ ахсджиаг хъуыддæгтыл æмхуызонæй кусынц. Нысантæ сæм бирæ ис. Сæ хъæппæристæ бындурон сты. Кировы районы разамонджытæ Нæкуысаты Барис æмæ Батиаты Хъазыбеджы æххуысæй сæ царды рауадзынмæ сарæхсдзысты. Ацы цæрæнбынаты равзæрды 170 азы юбилейыл аккаг хуызы сæмбæлдзысты Хъæубæстæгты хорз хъуыддæгтæ фехъусынæй сæ фенын — хуыздæр. Бынæттон хиуынаффæйады администрацийы сæргълæууæг Дзуццаты Эльбрус мæ сæйраг уынджы йæ машинæйы фæласы. Фæйнæрдæм кæсын æмæ йын йæ ныхасмæ лæмбынæг хъусын. Цы радзура, уый йæм ис.

— Эльбрус, уæ бæрæгбонмæ уæм цавæр нысантæ ис?

— Сæйраг уынджы тротуармæ базилдзыстæм. Кæрæй-кæронмæ дæр лæгъз æмæ уæрæх уыдзæн къахвæндаг. Йæ фæйнæфарс — æрбадæн бынæттæ. Бирæ бæлæстæ дзы нæ станицæйы æмкар æмæ йæ историон цаутæн æвдисæнтæ сты. Сæ бахъахъхъæнын — нæ сæйрагдæр хæстæй иу. Уый нæ, фæлæ уынгты уавæрмæ дæр æркæсдзыстæм. Рухс — ахсджиаг хъуыддаг. Канд Ленины уынджы нæ, фæлæ нæ зæрды æппæт сыхты дæр цырæгътæ бакæнын ис.

Нæ станицæйы равзæрды юбилейон мадзæлттæ райдайдзысты 21 сентябры. Уæдмæ ма нæм æндæр нысантæ дæр ис. Зæгъæм, хъæуы администрацийы бæстыхаймæ бацæуæны Хетæгкаты Къостайæн сæвæрдзыстæм бюст. Уастырджийы кувæндоны лæггадгæджытæ Пагæты Альберт, Хынцæгты Къола, Дыгъуызты Микъала æмæ Хуыбецты Юрийы хъæппæрис у уый.

Ам уый зæгъын хъæуы, æмæ ацы кувæндонæн бæрнон адæймæгтæ материалон æгъдауæй бирæ рынчынтæн бацыдысты хæрзты.

Ныртæккæ та бынæттон амбулаторийы кувæндоны лæггадгæнджытæ аразынц «УЗИ»-йы кабинет. Уый фæдыл цæттæ сты сæ нысантæ. Агурынц курдиатджын медицинон специалисты. Арвитдзысты йæ Бетъырбухмæ сæрмагонд ахуыртæм. Кусын куы райдайа, уæд стыр удæнцойдзинад ратдзæн Ираны, Ставд-Дурты æмæ Змейкæйы цæрджытæн. Рынчын адæймаджы фæндаг тынг тыхсын кæны. Къæсæрæй дуармæ уыцы лæггад удæнцой уыдзæн адæмæн. Змейкæйы 15 адæмыхатты цæры. Уыдон хъæуы мидæг тынг æнгом сты. Зиан уа, цин уа — кæрæдзимæ цæуынц. Бынæттон адæмæн сæ тых бирæ у. Хæлар ахастдзинæдты сты, æмæ сæ хъомысæн кæрон нæй. Уый хорз æмбары Дзуццы-фырт. Иумæйаг арфæйаг хъуыддагыл, йæхи загъдау, æмхуызонæй куы нæ архайой, уæд царды уавæртæ рогдæр нæ фæуыдзысты.

Хъæуы цæрджыты æхсæн иудзинады тæгтæ сфидар кæныныл тынг кусынц Минæвæртты æмбырды депутаттæ. Уыдон сты 11 адæймаджы. Алчидæр дзы йе ‘взарджыты раз бæрнондзинад æнкъары. Алкæмæн дæр йæ пайдайаг архайдæй бирæ хорз дæнцæгтæ æрхæссæн ис. Юбилейон мадзæлттæм цæттæгæнæн куыстыты бæлвырд сты йæ хæстæ.

Нæ хъæуы æхсæнадон æгъдау фидар у. Барад нæм хæлд рагæй нал цæуы. Нæ бæрæгбоны мадзæлттæ рæсугъдæй кæй арвитдзыстæм, уымæй нæ ныфс канд пъæлицæйы фидар архайдæй нæй фæлæ бынæттон хъазахъхъæй дæр ис. Йæ атаман у Дзуццаты Батрадз, йæ хæдивæг — Михаил Кезенов. Æгъдау кæмæ ис æмæ, æгъдау чи бадома, ахæм раздзæуджытæ.

Юбилеймæ хъуамæ сцæттæ уа нæ спортивон зал. Ам бынæттон богæлттæн фадат уыдзæн хъæбысæй хæцынæн, æндæр спортивон секцитæм цæуынæн. Хъæуы цы дыууæ рæвдауæндоны ис, уым байгом кæндзыстæм ног бынæттæ фæйнæ 25 æмæ 30 сабийæн. Проекттыл ныридæгæн бакуыстой. Ацы уæлæмхасæн бæстыхæйтты арæзтадмæ тагъд бавналдзысты, — дзырдта мын Эльбрус.

Хъæуы администрацийы дарддæры нысантæ: Ленины уынджы ног скъолайы арæзтад. Фæстæдæр та Культурæйы хæдзар аразынмæ бавналдзысты. Федералон программæмæ хаст æрцыдысты ацы объекттæ. Се ‘мгъуыдтæ — 2020 æмæ 2024 азтæ. Боны фæткы — цæрджыты нуазыны донæй æфсадыны фарста. Уынгты хæтæлтæ куы ауагътой, ууыл ныр бирæ рæстæг рацыд. Иу азы фæстæ ног хызæг аразынмæ бавналдзысты, 180 милуан сомы йын бахъæудзæн. Паддзахадон бюджетæй змейкæйæгтæн уыцы фæрæзтæ радих кæндзысты. Хъæу йæ фæлгонц ивы æмæ ноджыдæр ивдзæн.

Змейкæйы хъæуыхицау нырма ацы бæрнон бынаты 6 мæйы йеддæмæ нæма кусы. Фæлæ йæ ног хъуыддаджы, Кировы районы кæй бафæзма, ахæм разамонджытæ ис. Зæгъæм, Елхоты администрацийы сæргълæууæг Гуытъиаты Эльбрус. Ныридæгæн дзы стыр æххуыстæ зоны. Транспорт зиууæтты бахъуыдис, зæгъгæ, йæм æрмæстдæр баулæф. Æмгары уæхсчы хуызæн ын у бирæ æндæр хъуыддæгты дæр.

Цыбыр ныхасæй, змейкæйæгтæн цæстуарзонæй чи лæггад кæны, уыцы бæрнон адæмæй иу у Дзуццы-фырт. Æххуысгæнджытæ дæр ын — бирæ. Уæдæ сæ хъуыддæгтæй исты рауайдзæн, уый станицæйы цæрджыты фидарæй уырны.

ДЗУЦЦАТЫ Къоста

 

ОСТАВЬТЕ ОТВЕТ

Please enter your comment!
Please enter your name here