Курдиатджын фыссæг, поэт, журналист, Æмбалты Цоцкойы номыл премийы лауреат СОТТИТЫ Риммæйыл сæххæст 80 азы

0
108

Дзырдаивады ауæдзыл цæугæйæ

«Алы сфæлдыстадон кусæг дæр равзары бæрæг фæндаг. Мæнæн æппæты зынаргъдæр сты, цы хæдзарвæндаджы схъомыл дæн, уый моралон æмæ этикон принциптæ, уым кæй федтон æмæ фехъуыстон, уыцы адæмон сфæлдыстады цыкуратæ.

Дзырдаивадмæ ме ‘ргом куы аздæхтон, уæд уыдон равзæрстон сфæлдыстадон бындурæн. Уæлдайдæр, цы аив ныхас хъуыстон, уый. Хатгай-иу мæм афтæ дæр кастис, цыма нæ бинонтæ аив дзырды ерысы бацыдысты, цыма-иу кадæгон æмдзæвгæтæ дзурынц, ахæм уыд сæ ныхасы хъæд. Æвæццæгæн, новеллæтæ дæр уымæн райдыдтон фыссын ритмикон прозæйæ…», — ахæм у фыссæг Соттиты Риммæйы хъуыды.

Риммæ райгуырд Цæгат Ирыстоны Уæллаг Мызуры 1939 азы 18 февралы авд лæппуйы фæстæ. 1920 азы Соттиты Нестъоры бинонтæ, мингай хуссайраг ирæттимæ лыгъдон зынвадат фæндæгтыл лыгъдысты гуырдзиаг геноциды азарæй Цæгатмæ. Риммæ фыдыуæзæгыл уымæн нымайы — хуссайраг хъæу Къусджыты дæр, кæд Цæгаты райгуырд, уæддæр.

Нестъор йе ‘фсымæртæ Уасил æмæ Биасимæ уыдысты Ногиры хъæуы бындурæвæрджытæй. Нестъор уыцы рæстæг куыста сауджынæй. Бирæ хæрзты бацыд йе ‘мбæстæгтæн. 1937 азы хабæртты азарæй фæцæйсыгъд, фæлæ йæ хæрзгæнджыты фæрцы лидзæг фæци æмæ æрбынæттон Уæллаг Мызуры Сохиты Дрисы хæдзары. Бæстæ куы æрсабыр, уæд ма Риммæ хæрз чысыл уыд, йæ ныййарджытæ Уæллаг Мызурæй фæстæмæ Ногирмæ куы æрыздæхтысты, уæд.

Ам, æфсæддон полигоны зæххытæ, ног цæрæнбынатæн паддзахад рахицæн кодта лыгъдæттæн. Рахуыдтой йæ Ногир. Нестъор хорз æмбæрста — фидæны царды рухс сæйрагдæр ахуыр кæнын кæй у, æмæ 1920 азы йæхимæ райста бæрнон хæс йæ бинонты æххуысæй скъола саразын. Кæд зæхбын, кауæй быд, æлыгæй сæрст къултимæ арæзт æрцыд ногирæгты фыццаг скъола, уæддæр сæ цин кæуылты уыд! Сывæллæттæ разæнгардæй цыдысты ахуырмæ. Бонæй-бонмæ ахуырмæ тырнджытæн нал фаг кодта сæ бынат.

Нестъор æмæ йе ‘мхъуыдыгæнджытæ Калоты Зауырбег æмæ Аго, Теблойты Тебæ, Санахъоты Мате, Гæджиты Бадила æрхъуыды кодтой ног агъуыст саразын æмæ райдыдтой сæ фыдæбоны бонтæ æмæ тухитæ уый фæдыл. Фæлæ, фыдбон æмæ фыдлæг бирæ нæ хæссынц. Æмхуызонæй февнæлдтой æмæ дур-дурыл æвæргæйæ, агъуыст бонæй-бонмæ рæзти. Ног уæлахиз, ног цины хабар та æрбахæццæ. 1927 азы хъæуы бæстастæу йæ уæрæх дуæрттæ сабитæн байтыгъта агуыридурæй амад дыууæуæладзыгон скъола рухс кълæстимæ, егъау залимæ. Абон дæр ма, раст цыртдзæвæнау, лæууы уæды зын рæстæджы рухстауджытæн. 1941 азы немыцаг фашисттæ нæ бæстæмæ куы æрбабырстой, уæд йæ бахъахъхъæны охыл хæстхъом фæсивæды æмрæнхъ æрлæууыдысты Нестъоры фырттæ дæр: Сергей, Павел, Михал æмæ Чермен. Стыр хъыгагæн, Райгуырæн бæстæйы сæраппонд тохы быдыры æнустæм баззадысты æрыгон хъæбатыртæй.

Нæ хъæуы астæу —

сау дурæй цыртдзæвæн —

Нæ кувæндон, нæ кæуæндон, нæ рис…

Æнусон арт, дæ номхыгъды фæтæны

 Цыппар хæстоны ме ‘фсымæртæй ис…

Рæстæджы рухстауæг, фыдæлты адæмон сфæлдыстад йæ уды бæрц чи уарзта æмæ йæ адæмы ‘хсæн чи парахат кодта, кæсын, фыссын ахсджиаг кæмæн уыд, кæстæр фæлтæры ахуыры фæндагыл чи æвæрдта, уыцы куырыхон адæймаг Нестъорæн йæ цæстыты рухс ахуыссыд æмæ бакуырм. Риммæ куы рахъомыл, уæд-иу арæх кастис, газеттæ æмæ журналты цы фыстой, уыдон йæ мастæфхæрд фыдæн.

Æфсымæртæй ма удæгасæй баззадис Хазби. Уый бирæ азты дæргъы фæкуыста бæрнон бынæтты, фæстагмæ — Стъараполы крайы Госгортехнадзоры хицауæй. Амард 2004 азы.

1945 азы Риммæ бацыд скъоламæ. Ахуыры æмæ æхсæнадон куысты уыд раззагдæртимæ. Æрдзæй курдиатджын æрыгон чызг йæ фыццаг литературон фæлварæнтæ мыхуыр кодта скъолайы къулы газеты. «Уадындз, уадындз, цæй ныззар! Зæрдæтæм фæндаг æссар!» Хихъæппæрисадон къордæн дæр-иу чысыл интермедитæ афыста. Уыдон ын ныфс æмæ разæнгарды хос уыдысты ног уацтæ фыссынмæ, поэзиуарзджыты зæрдæтæм фæндаг ссарынмæ.

Æрыгон чызгæн ирон æвзаг æмæ литературæ бауарзын кодта йæ ахуыргæнæг Джыккайты Закаройы чызг Венерæ. Ахуыргæнæджы дæсныйад дæр уымæ гæсгæ бауарзта. Скъола каст куы фæци, уæд афæдз бакуыста ногдзаутæн хистæр разамонæгæй.

Кæд Нестъоры æнæниздзинадыл уæззау уавæрты цард йæ фæлм æрæвæрдта, уæддæр баззад куырыхон, ахуыргонд æмæ ирон дзырдаивады дæсныйæ. Бинонтæ уыдысты уазæгуарзон. Æнæмæнг-иу сæм сæмбæлд йæ алы æрцыдимæ Нестъоры æрдхорд, зындгонд ахуыргонд Абайты Васо. Ацы фембæлдтытæ царды фарн хастой бинонтæн. Æхсæв-бон сын нæ фаг кодта, афтæ тагъд-иу азгъордта фембæлды рæстæг алы хабæрттæ кæнгæйæ. Уæлдай цымыдисдзинад хастой ахæм фембæлдтытæ бинонты кæстæр — Риммæйæн æмæ йæ разæнгард кодтой ахуырмæ.

Уæлдæр ахуырад райсынмæ бацыд Цæгат Ирыстоны паддзахадон педагогон институты филологон факультетмæ. Фæлварæнты агъоммæ сын ирон æвзаг æмæ литературæйæ консультацитæ кодта филологон наукæты кандидат, доцент Калоты Зауырбеджы фырт Георги. Фæлтæрдджын ахуыргæнæг Риммæйы дзуаппытæм цалдæр хатты куы байхъуыста, уæд ын загъта: «Соттион, фæлварæнтæй сæрибар дæ, мауал æрбацу, дæ фондз цæттæ у».

Институты ахуыры рæстæг программæйæ уæлдай кастис бирæ чингуытæ ирон æмæ уырыссаг æвзæгтыл, фæсарæйнаг фысджыты уацмыстæ. Уæлдай хæстæг ын уыдысты Ф. Куперы, К. Паустовскийы, М. Лермонтовы æмæ ирон дзырды булæмæргъ Гæдиаты Секъайы уацмыстæ. Студенты бонты райдыдта хæрдмæ абухын йе сфæлыстадон суадон. Институты бирæтиражон газет «Педагогическая смена»-йы æмæ студентты къухæй фыст журнал «Молодость»-ы фæрстыл арæх бакæсæн уыд суинаг поэты сфæлдыстадон фæлварæнтæ.

1962 азы Риммæ райста ахуыргæнæджы дæсныйады диплом æмæ кусын райдыдта Æрхонкæйы фыццæгæм скъолайы. Бонæй-бонмæ æрыгон чызджы сфæлдыстадон курдиат тыхджынæй-тыхджындæр кодта, фыста литературон уацмыстæ уырыссаг æмæ ирон æвзæгтыл. Йæ новеллæтæн бакæсæн уыд районы, стæй республикон газеттæ æмæ журналты фæрстыл. 1964 азы Риммæйы ахуыдтой районы газет «Ленинон тырыса»-мæ. Ам райдыдта йæ журналистикæйы фæндаг. Ахуыргæджытæ йын уыдысты редакцийы фæлтæрдджын кусджытæ: Дзуццаты Саукуыдз, Алæгаты Тимофей, Джыккайты Федыр, Валентин Никитин, Чехойты Сæрæби, Юрий Змиев, Иосиф Лифшиц. «Кæд исты æнтыстдзинæдтæ мæ къухы бафтыд журналистикæйы, уæд, æвæццæгæн, уыцы фæрнджын адæмы фæрцы», — мысы Риммæ. Фæстæдæр Соттион куыста газеттæ «Рæстдзинад»-ы, «Социалистическая Осетия»-йы, «Молодой коммунист»-ы, журнал «Ногдзау»-ы редакциты уацхæссæгæй. 1968 азы Соттиты Риммæ йæ цард баиу кодта журналист Бæройты Сафаримæ. Абоны онг зæрдæрухсæй цæрынц Бæройты фæрнджын бинонтæ сæ иунæг чызг Аленæ æмæ сæ хъæбулы хъæбул Максимы цæрайæ. Риммæ дæс азы дæргъы фæкуыста хистæр редакторæй сывæллæтты журнал «Ногдзау»-ы. 1994 азæй фæстæмæ та — ахуыргæнæгæй, пенсимæ рацæуыны онг.

1979, 1986 азты йæ уацмыстæй æмæ æмдзæвгæтæй иу къорд рацыдысты мыхуыры Ирыстоны рауагъдæдты æрыгон фысджыты иумæйаг æмбырдгæндты: «Судз ме стъалы», «Æмзæл зарæг».

Бирæвæрсыгджын у Соттиты Риммæйы сфæлдыстад. Ис æм æмдзæвгæтæ, новеллæтæ, ритмикон прозæ, радзырдтæ, рецензитæ, уацтæ, эссе. «Йæ аивадон уацмысты сæйрагдæр темæтæ сты æрдзы рæсугъддзинад, адæймаджы бæрзонд æмæ сыгъдæг удыхъæд. Ирон æвзаг, фыдæлты фарн, царды гæлир фæзилæнтимæ тох… Æмæ… хæхтæ… нæ диссаджы рæсугъд æрдз… Фыдæлты уæзæг… Уыдон сты йæ уæлтæмæнады суадон».

2004 азы Риммæйæн рацыд чиныг «Удæй удмæ», 2005 азы — «Порог предков» («Фыдæлты къæсæр»). Хуытъиаты Зойæ Риммæйы тыххæй цы методикон бакуыст сарæзта, уым афтæ фыссы: «Рагфыдæлты истори ахуыр кæнын мыггагон уидæгтæн цыт кæныны бæрæггæнæн у. Æмæ алы адæймаг дæр хъуамæ цыт дæтта йæ фыдæлтæн. Мæнæ Соттиты Риммæ йæ фыдæлты къæсæры цы æнæкæрон уарзт кæны æмæ фыдæлты уидæгтæн йæ чиныгæй цы кад скодта, раст афтæ. Риммæ йæ чиныджы сиды фæстагæттæм: «Цас арфдæр зонай дæ мыггагон истори, йæ традицитæ, йæ таурæгътæ, уыйас дæ мыггагон уидæгтæ фидардæр уыдзысты, нæ бахус уыдзысты, дæ фæдонтæн уыдзæн цæрæццаг фидæн, дæхицæн та дын адæм стыр аргъ кæндзысты».

2007 азы рухс федта, Риммæ сывæллæттæн цы æмдзæвгæты æмбырдгонд бацæттæ кодта, уыцы «Магуса Гæдила» аив нывтимæ.

Цъицъи-рицъи, рицъицъи!

Иу цъырцъыраг, дам, уыди.

Райдзаст уыгæрдæнты цард,

Дардмæ хъуысыди йæ зард.

 Цъицъи-рицъи, рицъицъи!

Къахæй тынг цæрдæг уыди.

Раст сардзины бæрц йæ гæпп,

Бон-изæрмæ кодта сæпп…

Ам сабитæ поэтикон рæнхъыты фæрцы базонгæ вæййынц æрдзы фæзындтимæ, афæдзы афонтимæ, хъæддаг сырдтимæ, мæргътимæ, хæдзарон цæрæгойтимæ, быдырон дидинджытимæ… Чиныгкæсæг зæрдæйæ банкъары ацы чингуытæн сæ уацмысты аивдзинад, рæсугъд хъуыдытæ, уды рис æмæ фыдыуæзæгмæ æгæрон уарзт былалгъæй фыст кæй нæ цæуынц, уый. Сæ архайджытæ сты реалон цардæй ист.

Соттиты Риммæ йæ чиныг «Фыдæлты къæсæр»-æй самадта литературон цыртдзæвæн æрмæст йæхицæн нæ, фæлæ йæ мыггагæн. Республикæйы бирæ библиотекæты æмæ скъолаты чиныджы фæзындæн уыд презентацитæ. Уымæн æвдисæн, Дзæуджыхъæуы центрон библиотекæйы йын цы литературон изæртæ арæзт æрцыд, уыдон.

2009 азы та ног æхсызгон фембæлд рауад чиныгкæсджытæн уарзон фыссæгимæ, æцæг, æндæр хуызы — аив фæлгонцгондæй сыл сæмбæлд Соттионы бирæ азты фæллой — чиныг «Æмбалты Цоцко. Удварны хæзнатæ».

Риммæ йæ размæ хæс æрæвæрдта, цæмæй, ирон адæмы аив дзырд йæ удлæууæн кæмæн уыд, нæ адæмы историйы рагон цыртдзæвæн — нæ адæмон сфæлдыстады хæзнатæ бахъахъхъæныл удуæлдайæ чи фæкуыста, уыцы æнæмæлгæ Æмбалты Цоцкойы сфæлдыстад адæмы размæ бæлвырд æмæ æххæст æмбырдгондæй рахæссын. Йæ къухы æфтгæ дæр бакодта. Цоцко йæ цæрæнбонты кæй фембырд æмæ кæуыл фæфыдæбон кодта, уыцы хæзнатæ Риммæ гагагай архивты, музейты æвæрæнты, хицæн адæймæгты сæрмагонд архивты æмæ мысинæгты хуызы фæуыгъта, бабæстон сæ кодта æмæ сæ сарæзта Цоцкойы сфæлдыстадон бынтæн диссаджы аив литературон цыртдзæвæн.

Риммæ чиныджы цъарæн равзæрста Цоцкойы къам, кæцы цæрæнбонты Абайты Васо дардта йæ кусæн стъолы сæрмæ. Йæ амарды фæстæ къам æфснайд æрцыд Цæгат Ирыстоны гуманитарон æмæ социалон иртасæнты институты æвæрæнты. Уый уыди Цоцкойы сæрмагонд лæвар Абайты Васойæн.

1969 азы Риммæ сси УФ-йы Журналистты цæдисы уæнг. 2004 азы та йæ райстой УФ-йы Фысджыты цæдисмæ. 2009 азы Соттионæн саккаг кодтой Æмбалты Цоцкойы преми, 2010 азы та йын лæвæрд æрцыд Æрыдоны горæты администрацийы уынаффæмæ гæсгæ «Æрыдоны горæты кадджын гражданин»-ы ном.

Æрыдоны Цоцко цы хæдзары цард, уый къулыл конд æрцыд мемориалон фæйнæг Æмбалты мыггаджы минæвæртты æмæ Соттионы хъæппæрисæй. Æрыдоны районы сæйраг библиотекæйæн та радтой Цоцкойы кадджын ном. Æрыдоны сæйраг скверы та йын æвæрд æрцыд аив цыртдзæвæн. Йæ саразæг — скульптор Хайты Ибрагим.

Цымæ цал æгъуыссæг æхсæвы арвыста Риммæ, цæмæй уыцы хорз хъуыддæгтæ царды рацæуой?! Чиныджы раздзырд «Мæсыгамайæг» ныффыста Риммæ йæхæдæг æмæ йæ чи бакæса, уый арф банкъардзæн уыцы рыст лæджы сурæт æмæ ирон адæмæн цы хæрзты бацыд.

Чиныг райдайы Нарты таурæгътæй, аргъæуттæй, адæмон кадджытæй. Куыд зонæм, афтæмæй Цоцко хорз зыдта уырыссаг æмæ цалдæр фæсарæйнаг æвзаджы, рæвдз уыд тæлмац кæнынмæ. Чиныгмæ хаст æрцыдысты, Цоцко Андерсенæй, Пушкинæй, Лермонтовæй, Языковæй, Толстойæ, Хирьяковæй, Вересаевæй, Аразийæ, Короленкойæ, Рклицкийæ æмæ Шиллерæй цы уацмыстæ ратæлмац кодта, уыдон.

Сæрмагонд бынæттæ дзы ис уацтæн, рецензитæн, мысинæгтæн, историон цаутæн, адæмон мысинæгты, худæджы ныхæстæн, ирхæфсæнтæн, документтæн, эпистолярон фыстæджытæн.

Чиныджы цы æрмæджытæ ис, уыдонæй бирæтæ, уæлдайдæр тæлмацтæ мыхуыры фыццаг хатт рацыдысты, æмæ уымæй чиныг бирæ фæнуарджындæр, ахадгæдæр.

Джыккайты Шамил Риммæйы тыххæй йæ рæстæджы загъта: «Адæммæ хорз лæгтæ куы вæййы, уæд уыцы адæм фæрныг вæййынц. Æвзæр йæ хорзæй нæ раппæлдзæн. Фæлæ Риммæ хорз адæймаг у, хорз лæджы хъуыддæгтæ адæмы размæ рахаста, æмæ йын стыр бузныг зæгъæм. Риммæ у сæдæ лæджы æмдых æмæ нæм цалынмæ ахæм сæрæнгуырд чызджытæ ис, уæдмæ нын тас нæу сæфынæй…».

Филологон наукæты кандидат Джусойты Клавдия та загъта: «Риммæ йæ фæлмæн арм æмæ æнæнцой зæрдæйы хъармæй бирæ сфæлдыстадон æрмæджытæн фенын кодта царды рухс, фыццаг уым разынд йæ æвæджиауы курдиат æмæ арф зонындзинæдты ирд тæмæн. Йæ æнæкæрон уарзондзинад йæ раттæг адæммæ, йæ нацийы удварны хæзнатæм, Ирыстоны урссæр хæхтæ æмæ къæдзæхтæм Риммæйæн балæвар кодта сфæлдыстадон хъомыс. Уымæн æвдисæн сты йæ бирæ фæллæйттæ алыхуызон литературон жанрты».

Риммæйы сфæлдыстады фæдыл Хуытъиаты Зояйы методикон бакуысты ис ахæм рæнхъытæ, кæцытимæ æз дæн разы: «На мой взгляд, совершенно — то произведение, которое, прочитав, оставляет радость в сердце, а в голове — восторг. И излишне слова! Так с новеллами Риммы Сотиевой. Каждая из них — ода! Ода правде и правдивости, Отечеству и отчему порогу, любви, другим человеческим чувствам: состраданию, человечности, патриотизму».

Риммæ фæстаг цалдæр азы фæкуыста зындгонд рухстауæг, фыссæг, тæлмацгæнæг, ирон адæмæн Цъæйы комы хъæздыгдзинæдтæ чи раргом æмæ сæ йæ адæмæн чи балæвар кодта, уыцы разагъды лæгтæй иу — Зæнджиаты Бæбуйы сфæлдыстадон бынтæ æрæмбырд æмæ сæ мыхуырмæ бацæттæ кæныныл. Æмæ йын æнтысгæ дæр бакодта. Æхсызгонæн, къухфыст абон ис типографийы æмæ тагъд рухс фендзæн. Йæ рецензент, Дзæнæты бадинаг, филологон наукæты доктор, Хетæгкаты Къостайы номыл премийы лауреат Джусойты Нафи. Уый стыр аргъ скодта Риммæйы куыстæн æмæ комкоммæ ацы чиныджы тыххæй йæ хъуыды ахæм у: «Соттионæй ирон литературон æхсæнад хъуамæ иттæг бузныг уа, нæ курдиатджын адæмæн зæрдылдаринаг тæлмацгæнæджы — Зæнджиаты Бæбуйы аивадон бынтæ кæй æрæмбырд кодта æмæ равæрдта иу чиныджы сконды, сæ разæй сын Ардасенты Хадзыбатыры зæрдиаг æмæ уæздан фыст уац кæй бафтуан кодта, уый тыххæй…»

Риммæ у дæсны тæлмацгæнæг. Ног литературон цард балæвар кодта Æгъуызаты Иуанейы «Алгъуызы кадæг», Агънаты Гæстæны «Темыры кæстæр чызг», Джусойты Нафийы «Сырдоны цæссыгтæ», Цгъойты Хазбийы чиныг «Арвы дуар» æмæ ма бирæ поэттæ æмæ фысджыты уацмысты ирон æвзаг æмæ дыгурон диалектæй уырыссаг æвзагмæ кæй ратæлмац кодта, уымæй.

Кæстæр кары курдиатджын фæсивæдыл кæдфæндыдæр ауды, æххуыс сын кæны се сфæлдыстадон фæлварæнты. Дзæуджыхъæуы центрон библиотекæйы литературон къорд «Суадон»-ы райдайгæ поэттæ æмæ фысджытæ Риммæйæ сты бузныг, йæ зонындзинæдтæ сын поэзийы сусæгдзинæдты бацамынды кæй никуы бахæлæг кæны, уый тыххæй.

Соттион йе сфæлдыстадон рындзмæ схызт кад æмæ радимæ, аккаг чызг у Соттиты мыггагæн, Ирыстонæн, Ногиры хъæуæн. Царды мæсыг амайы йæ адæммæ уарзты бындурыл. Ирон литературæйы къæбицмæ цы дзаджджын хуынтæ бахаста, уыдон аккаг бынат æрцахстой æмæ ма æрцахсдзысты ирон аив дзырды хæзнадоны, æмæ ма ноджы фæбæркадджындæр уæнт алы жанрты ног цымыдисаг нуарджын æмæ мидисджын уацмыстæй. Йæ фыст æмдзæвгæтыл арæзт зарджытæ Ирыстоны алы къуымты зарынц нæ зарæггæнджытæ, æмæ фылдæрæй-фылдæр кæнæнт.

Риммæйæн йе сфæлдыстадон куыройы фыдтæ сæ зилынæй сæдæ азмæ ма банцайæд æмæ дзы цы хоры гагатæ ныппары, уыдон Ирыстоны чиныгкæсæгæн арфæйаг зонды хос уæд. Фæрнджын адæймаг у, Ирыстоны цæрайæн цæры æмæ йæ фидæн хуры тынæй хъарм, ныййарæг мады фарнæй фæрнджын æмæ амондджын уæд. Фыдæлтæй абоны фæлтæрмæ цы тын нывæнды, уый кæстæртæн æмæ ирон æвзагæн царды хос уæд.

Цæудзысты азтæ.

Сабитæн фæндаг

Стыр цардмæ ды

амондзынæ алкæд.

Сыгъдæг арвыл

сыгъзæрин хуры цалх

Дæуæн фæуæд хъысмæтамонæг бардуаг.

ДЗУГАТЫ-МУРАСТЫ Риммæ, Дзæуджыхъæуы центрон библиотекæйы бæстæзонæн хайады сæргълæууæг, Цæгат Ирыстоны культурæйы сгуыхт кусæг, газет “Рæстдзинад”-ы æхсæнадон уацхæссæг

ОСТАВЬТЕ ОТВЕТ

Please enter your comment!
Please enter your name here