Медикты куыст бæрæг кæнынц

0
97

 

Фарон æнæниздзинад хъахъхъæнынады къабазы закъонтæ æххæстгонд куыд цыдысты, Цæгат Ирыстоны Прокуратурæ уымæ цæстдарæн архайды бæрæггæнæнтæ бахыгъта.

Æнæниздзинад бахъахъхъæныны фæдыл адæмы барты хъахъхъæнынад нымад у Прокуратурæйы оргæнты раз лæууæг ахсджиагдæр хæслæвæрдтæй иуыл. Æвæстиатæй аиуварс кæнын кæй æмбæлы, закъоны ахæм хæлдтытыл арæх сæмбæлæн кæй ис, къабазмæ цæстдарды бæрæггæнæнтæ ууыл дзурæг сты.

Фарон цæстдарæн архайды фæрцы раргом сты æнæниздзинад хъахъхъæнынады тыххæй закъонæвæрынады 489 хæлды, 7 барадон акты нымад æрцыдысты закъоны ныхмæ цæуджытыл. Æргомгонд хъæндзинæдты фæдыл кæй скодтой, уыцы 87 хъастмæ гæсгæ 91 хицауиуæггæнæг адæймагæй бадомдтой дисциплинарон бæрнондзинад, тæрхондонмæ барвыстæуыд 4 хъасты, цæстдарæн архайды фæрцы сарæзтæуыд 3 уголовон хъуыддаджы, 74 адæймагæй та бадомдтой административон бæрнондзинад.

Зæгъæм, прокуророн цæстдарды фæрцы куыд рабæрæг, афтæмæй Мæздæджы районы центрон рынчындоны дохтыр кæй рафыста, уыцы мæнг рецепттæм гæсгæ афтечы балхæдæуыд тыхджын ахадæг хостæ. Ацы цауыл Уголовон кодексы 234 статьяйы 1 хаймæ («Ауæй кæнынæн тыхджын ахадæг æмæ маргджын буаргъæдты æнæзакъон зилдух») гæсгæ сарæзтой уголовон хъуыддаг.

Уголовон кодексы 238 статьяйы 1 хайы («æдасдзинады домæнты аккаг чи нæу, ахæм куыстытæ, кæнæ лæггæдтæ бакæнын») амынд фыдракæнд саразынæй кæуыл гуырысхо кæнынц, Горæтгæрон районы центрон рынчындоны уыцы сæйраг дохтырыл сарæзтой уголовон хъуыддаг.

Прокурортæ куыд рабæрæг кодтой, афтæмæй санитарон домæнты аккаг чи нæу, медицинон кусæндон тарниз раргом кæныны фæдыл иртасæн куыст æххæст кодта ахæм уавæрты. Уымæй уæлдай, дзæбæхгæнæндонмæ ацы куыст æххæст кæныны бардæттæг лицензи нæ уыд. Уголовон хъуыддаг куыд æвзарынц, республикæйы Прокуратурæ уымæ цæст дары. Прокуратурæ кæй баххæст кодта, уыцы мадзæлтты фæрцы къорд медицинон кусæндоны разамонджытæ æмæ кусджытæ сæ бынæттæй ист æрцыдысты. Зæгъæм, дæсныдзинады домæнты аккаг чи нæ уыд, Мæздæджы æмæ Горæтгæрон районты рынчындæтты уыцы сæйраг дохтыртæ куыстæй æрвыст æрцыдысты.

Рынчын адæймагæн æмбæлгæ уагæй медицинон æххуыс чи нæ бакодта, Тагъд медицинон æххуысы клиникон рынчындоны уыцы дохтыр-травматологы йæ бынатæй систой.

Фæлывд медицинон кусджыты ныхмæ спайда кодтой æндæр æфхæрæн мадзæлттæй дæр. Рынчындоны мæ схуыссын кæнут, зæгъгæ, рынчын адæймаджы ахæм курдиатæн разыйы дзуапп чи нæ радта, Республикон клиникон рынчындоны уыцы радхæссæг дохтырæй бадомдтой дисциплинарон бæрнондзинад.

Æхцайыл лабораторон иртасынад ацæуынмæ æнæ бындурæй æнхъæлцау сылгоймаджы чи арвыста, Дзæуджыхъæуы 1-æм поликлиникæйы уыцы дохтырæй бадомдтой дисциплинарон бæрнондзинад. Сылгоймагæн йе ‘хца фæстæмæ радтой.

Адæймагæй сахатмæ 840 сомы бæрц фиддон кæй кусджытæ истой, медицинон æххуыс бакæныны тыххæй æхца æнæ бындурæй исыны цаутæ рабæрæг сты уыцы паддзахадон кусæндон «Территориальный центр медицины катастроф»-ы дæр (закъонæвæрынадмæ гæсгæ, паддзахадон кусæндæтты хæс у адæймагæн тагъд медицинон æххуыс лæвар кæнын). Прокуророн цæстдарды бæрæггæнæнтæм гæсгæ, медицинон кусæндоны сæйраг бухгалтерæн бауайдзæф кодтой, тагъд медицинон æххуыс бакæныны тыххæй аргъ та прейскурантæй фæиппæрд кодтой.

Адæм хъæугæ хостæй афоныл ифтонггонд цæуынц æви нæ, фарон республикæйы Прокуратурæйы оргæнтæ уымæ хицæнæй æргом здæхтой. Бындур кæмæн уыд, алы уыцы хъасты фæдыл дæр мадзæлттæ арæзт æрцыдысты. Зæгъæм, цардæн тæссаг низæй чи сæйы, зынаргъ хостæй ахæм сахъат адæймаджы цæмæй ифтонг кæной, тæрхондоны фæрцы Прокуратурæ ууыл бацархайдта.

Дæндæгты дохтыртæ кæй кæнынц, уыцы лæггæдты заман адæмы æнæниздзинад хъахъхъæнынады тыххæй закъонæвæрынады домæнтæ бирæ хæттыты хæлд кæй æрцыдысты, республикæйы Прокуратурæ уый рабæрæг кодта. Æрмæст æртæ медицинон кусæндоны рабæрæг, 60 хъæндзинады, сæ аиуварс кæнынæн арæзт æрцыдысты административон хъуыддæгтæ (ныхас сыл цæуы).

Æнæ лицензитæй дæндæгтæ дзæбæх кæныны куыст чи æххæст кодта, Рахизфарсы районы прокуратурæ раргом кодта дыууæ ахæм кусæнуаты. Прокуроры уынаффæтæм гæсгæ аххосджын адæймæгтæй бадомдтой административон бæрнондзинад.

Æнæниздзинад хъахъхъæнынады тыххæй закъонæвæрынады домæнтæ æххæстгонд цæуынц æви нæ, Цæгат Ирыстоны Прокуратурæ уымæ сæрмагондæй цæст дары.

 

ОСТАВЬТЕ ОТВЕТ

Please enter your comment!
Please enter your name here