Зæхх æнæзакъонæй ауæй кодтой

0
46

 

Муниципалон исбонæй пайда кæныны къабазы закъонæвæрынад куыд æххæст кæнынц, уый бæрæг кæнгæйæ, Дзæуджыхъæуы Промышленнон районы прокуратурæ раргом кодта гектарæй фылдæр муниципалон зæххытæ æнæзакъонæй ауæй кæныны цау.

Куыд рабæрæг, афтæмæй Дзæуджыхъæуы Ирыстойнаг уынджы 45 «б» ран чи æрбынæттон æмæ 1,1 гектары кæй иумæйаг фæзуат у, 2014 азы февралы Дзæуджыхъæуы администраци æмæ æнæххæст бæрнондзинады æхсæнад «Старт» сфидар кодтой 23,5 квадратон метры фæзуат æхсæнадон хæлцы куыстуат саразынæн уыцы зæххы хай (Тагъд æххуысы клиникон рынчындоны раз сквер) хаццон радтыны тыххæй бадзырд.

Проекты амынд объекты бæсты ÆБÆ «Старт» сарæзта чысыл бæстыхай (йæ фæзуат — 17 квадратон метры). Бардæттæг гæххæттытæ кæй амонынц, амынд бæстыхай ахæм техникон-экономикон бæрæггæнæнты аккаг кæд нæу, стæй йын йæ архайдæн фадæттæ саразынæн инженерон хызтæ йæм кæд нæ бауагътой, уæддæр Дзæуджыхъæуы администраци радта объект скусын кæныны бардæттæг гæххæттытæ, стæй ÆБÆ «Старт»-имæ сфидар кодта льготон æууæлтимæ зæххы хай ауæй кæныны-балхæныны фæдыл бадзырд. Горæты территорийыл æрбынæттон уæвæг, гектарæй фылдæр зæххы хайы аргъ рауад æрмæст 413 мин сомы, ома, йе ‘цæг базарадон аргъæй бæлвырд асламдæр. Уыимæ æрмæст 17 квадратон метры кæй фæзуат у, ахæм бæстыхайæ пайда кæнынæн 11 мин квадратон метры фæзуат зæххы хай цæмæн бахъуыд, зæгъгæ, ног хицауæн йæ бон ахæм фарстæн дзуапп радтын нæ баци. Прокуророн цæстдарды бæрæггæнæнтæ куыд æвдисынц, афтæмæй бæстыхай сарæзтой зæхх льготон æууæлтимæ балхæнынæн формалон бар райсынæн.

Фæстæдæр æнæзакъонæй ист зæххы хай муниципалон исбонадмæ фæстæмæ радтын æнцон цæмæй ма уа, уый тыххæй ÆБÆ «Старт» зæххы хай ногæй ауæй кодта æнæххæст бæрнондзинады æхсæнад «Союз»-æн (ацы «Союз» йæ саразыны бонæй фæстæмæ ницы куыст кодта, уый нæ, фæлæ ма йæм дзырддаг зæххы хайы хъалон бафидыны тыххæй стыр хæс дæр сæвзæрд). Амынд æууæлтæ нымайгæйæ, Цæгат Ирыстоны Прокуратурæ республикæйы Арбитражон тæрхондонмæ барвыста дзырддаг зæххы хайы фæдыл базарад æнæзакъоныл банымайыны æмæ йæ фæстæмæ муниципалон исбонадмæ радтыны тыххæй курдиат.

Прокуратурæйы курдиатыл æрныхас кæныны бæрæггæнæнтæм гæсгæ, Дзæуджыхъæуы администрацийы æмæ ÆБÆ «Старт»-ы æхсæн фидаргонд балхæды-ауæй кæныны тыххæй бадзырд банымадтой мæнгыл, Ныртæккæ РЦИ-Аланийы Арбитражон тæрхондон ныхас кæны муниципалон зæхх ауæй кæныны тыххæй дыккаг бадзырд мæнгыл банымайыны æмæ ацы зæхх фæстæмæ Дзæуджыхъæуы исбонадмæ радтыны тыххæй фарстайыл.

Уымæй уæлдай, зæххы хай æнæзакъонæй ауæй кæныны цаумæ прокуророн цæстдарды бæрæггæнæнтæм гæсгæ, слестгæнæг оргæнтæ Уголовон кодексы 159 статьяйы 2 хайы («Рагацау бафидаугæйæ, къорд адæймаджы цæстфæлдахæн ми бакодтой») амынд фыдракæнды æууæлтæм гæсгæ сарæзтой уголовон хъуыддаг æмæ йæ æвзарынц.

РЦИ-Аланийы Прокуратурæйы прессслужбæ

ОСТАВЬТЕ ОТВЕТ

Please enter your comment!
Please enter your name here