Футбол. Сбæрæг ис Леонид Саблины номарæн турниры уæлахиздзау

0
56

 

Футболон скъола «Æвзонгад»-ы стадионы ивгъуыд сабат æмæ хуыцаубоны сбæрæг сты Леонид Саблины 41-æм номарæн турниры уæлахиздзаутæ æмæ призон бынæттæ бацахсæг командæтæ.

Мæйы дæргъы турниры цы 17 командæйы архайдта, уыдонæй цыппар рацыдысты æрдæгкæронбæттæнмæ. Уыдоны ‘хсæн ерысы сбæрæг сты, кæронбæттæны 1-аг бынат бацахсыныл цы дыууæ командæйы хъаздзысты, уыдон.

Фыццаг уал фæзмæ рацыдысты дзæуджыхъæуккаг командæ «Ирыстоны уарт» æмæ Олгинскæйы командæ «Ног фæлтæр». Ацы дыууæ командæйы амæй размæйы хъæзтыты дæр сæхи хъомысджынæй кæй равдыстой, уый та сæ кæрæдзиимæ фембæлды дæр ирдæй разынд. Дыууæ командæйæн дæр сæ футболистты архайд уыди цырд æмæ зæрдæмæдзæугæ. Ныббырстытæ хæххон доны уылæнтау абухтой дыууæрдæм. Къорд хæттыты дыууæ командæйы дæр хæстæг уыдысты пурти кæрæдзи кулдуары фæмидæг кæнынмæ, фæлæ та-иу кæм дуаргæстæ кæнæ хъахъхъæнджытæ фæцырд сты сæ арæнтæ бахъахъхъæнынмæ, кæм та-иу пурти йæ цæвæгмæ нал байхъуыста.

Хъазты хъысмæт лыг æрцыд 11-метрон иварон цæфы фæрцы. Олгинскæйаг футболисттæ сæ иварон фæзы сæ ныхмæлæуджыты размæбырсæджы кæй афæлдæхтой, уый тыххæй сæ тæрхонгæнæг фæивар кодта, æмæ пурти Гаглойты Алыксандры цæфы фæстæ сæ хызы фæмидæг ис.

Олгинскæйаг футболисттæ ма уый фæстæ сæ архайд бæргæ фæрæвдздæр кодтой, цалдæр хатты хæстæг уыдысты хыгъд сæмхуызон кæнынмæ дæр, фæлæ дзæуджыхъæуккæгтæн бантыст хъазты кæронмæ сæ кулдуары пурти ма бауадзын.

«Ирыстоны уарт» рацыд кæронбæттæнмæ, «Ног фæлтæр»-æн та ма фадат уыд 3-аг бынат бацахсыныл ерыс кæнынæн. Ацы дыууæ командæйы кæимæ хъаздзысты, уый сбæрæг Беслæны «Пищевик» æмæ Октябрыхъæуы «Алани»- йы фембæлды фæстæ. Фембæлд рауад тынг хъазуатон. Дыууæ командæйы хъазджытæ дæр архайдтой тынг хъазуатонæй, цы размæ бырсгæйæ, цы сæ фидæрттæ хъахъхъæнгæйæ. Пурти хызыл сæмбæлын кæнын дыууæ ныхмæлæууæгæй хъазты кæронмæ никæмæн бантыст, æмæ фембæлды хъысмæт лыггонд æрцыд 11-метрон цæфты руаджы. Ацы фæлварæны амондджындæр разындысты октябрыхъæуккæгтæ æмæ рамбылдтой 4:3 хыгъдæй.

Хуыцаубоны (24 февралы) 3-аг бынат бацахсыныл ерысы фембæлдысты «Пищевик» æмæ «Ног фæлтæр». Рахизфарсы районы дыууæ командæйы хъазт рауад зæрдæмæдзæугæ. Уæлдай зæрдæмæдзæугæдæр архайдтой «Ног фæлтæр»-ы хъазджытæ. Олгинскæйæгтæ Дулаты Ахтемыр, Дзгойты Алан, Тедеты Хетæг æмæ Хайманты Артур цы фондз пуртийы бакъуырдтой беслæйнæгты кулдуары, уыдонæн «Пищевик» дзуапп радта иу пуртийæ. Йæ бакъуырæг та уыд Айларты Барис. 5:1 — ахæм хыгъдæй фæуæлахиз «Ног фæлтæр» æмæ ссис Леонид Саблины номарæн турниры 3-аг бынат бацахсæг.

Тынг хъазуатон рауад 1-аг бынатыл фембæлд «Ирыстоны уарт» æмæ «Алани»-йы ‘хсæн. Дыууæ командæйы дæр тырныдтой уæлахизмæ. Турниры уагæвæрдмæ гæсгæ, æртæ хатты фæдфæдыл 1-аг бынат цы командæ бацахса, уымæн хъуамæ мыггагмæ баззайа турниры сæйраг Кубок. Амæй размæ дыууæ хатты (2017 æмæ 2018 азты) Кубок рамбулæг уыди Октябрыхъæуы «Алани», æмæ ныр уымæн фадат фæци ацы хæрзиуæг йæхимæ ныууадзынæн. Кæй зæгъын æй хъæуы, октябрыхъæуккæгтæ тырныдтой ахæм уæлахизмæ, фæлæ сæ ныхмæлæуджытæ дæр ацы хæрзиуæг рамбулынмæ къаддæр нæ тырныдтой.

Хъазт рауад тынг цымыдисаг. Дыууæ командæйы дæр хъазуатонæй бырстой размæ æмæ сарæзтой къорд уавæры пурти сæ кæрæдзи кулдуары бакъуырынæн, фæлæ тынг къæрцхъус уыдысты хъахъхъæнджытæ æмæ дуаргæстæ.

Фыццаг пурти бакъуырдтой «Ирыстоны уарт»-йы футболисттæ. «Алани»-йы хъахъхъæнджытæ сæ иварон фæзы афæлдæхтой сæ ныхмæлæууæджы хъазæджы, æмæ сæ тæрхонгæнæг Тыбылаты Таймураз фæивар кодта 11-метрон цæфæй. Фæлтæрдджын футболист Гаглойты Алыксандр ахæм фадатæй спайда кодта иттæг хорз, æмæ хыгъд байгом «Ирыстоны уарт»-йы пайдайæн 1:0.

Хъазты дыккаг æмбисæн ма йæ кæронмæ фондз минуты куы баззад, уæд та ногæй «Алани»-йы иварон фæзы дзæуджыхъæуккæгты хъазæг ахауд, æмæ тæрхонгæнæг дыккаг хатт бацамыдта 11-метрон стъæлфмæ. Гаглойты Алыксандр дыккаг хатт дæр нæ фæрæдыд, æмæ йæ цæфы фæстæ хыгъд ссис 2:0 — «Ирыстоны уарт»-йы пайдайæн. «Алани» уый фæстæ дæр йæ къамтæ не ‘рæвæрдта, фæлæ хъазуатонæй размæ алæгæрста. Дыууæ минуты фæстæ «Алани»- йы размæбырсæг Джиголаты Чермены цæфы фæстæ хыгъд ссис 2:1. «Алани» ма, хъазты кæронмæ цы рæстæг баззад, уым атындзыдта хыгъд сæмхуызон кæнынмæ. Суанг ма сæ дуаргæс Персаты Хетæг дæр азгъордта йе ‘мбæлттæн æххуыс кæнынмæ дзæуджыхъæуккæгты иварон фæзмæ. Ацы уавæрæй спайда кодтой «Ирыстоны уарт»-йы хъазджытæ, æмæ сæ æвиппайды ныббырсты фæстæ хыгъд ссис 3:1. Афтæмæй тренер Хъантемыраты Арум æмæ йæ командæ «Щит Осетии» фыццаг хатт систы Леонид Саблины номарæн турниры уæлахиздзаутæ. Дыккаг бынат ацы хатт бацахста Октябрыхъæуы «Алани» (тренер Гæбæраты Петр), æртыккаг бынатмæ та рацыди Олгинскæйы командæ «Ног фæлтæр» (тренер Кокайты Арам). Уæлахиздзаутæ æмæ призон бынæттæ бацахсæг командæтæ хорзæхджын æрцыдысты кубоктæй, майдантæ æмæ дипломтæй. Фыццаг бынат бацахсæг командæ «Ирыстоны уарт»-йæн ма лæвæрд æрцыд турниры сæйраг Кубок.

Уымæй уæлдай, сæрмагонд призтæй хорзæхджын систы: Гуырцъыты Эльбрус («Ирыстоны уарт») — «Хуыздæр дуаргæс», Хъуылымбегты Владимир — «Хуыздæр хъахъхъæнæг» («Ног фæлтæр»), Таутиаты Алан — «Хуыздæр æрдæгхъахъхъæнæг» («Алани»), Гаглойты Алыксандр —»Хуыздæр размæбырсæг» («Щит Осетии»), Тедеты Хетæг — «Хуыздæр хъазæг» («Ног фæлтæр»), Хайманты Артур — «Æппæты рæстдзæвиндæр» («Ног фæлтæр»).

Турнир аразджыты номæй ерысты сæйраг тæрхонгæнæг Беджызаты Эдуард зæрдæбын арфæ ракодта се ‘ххуысгæнджытæн: «Мах зæрдиаг арфæ кæнæм, нæ фарсмæ чи æрбалæууыд, уыцы æххуысгæнджытæн. Бузныг зæгъæм спортивон хæринæгты дукани «Амрита»- йы директор Бигъуылаты Зæринæйæн æмæ командæ «Ирыстоны уарт»-йы сæргълæууæг Церекаты Таймуразæн. Уыдон сæрмагонд лæвæрттæ скодтой командæтæ æмæ хицæн футболисттæн. Нæ арфæтæ, турниры хъæзтытæ цы стадионты цыдысты — Æрыдоны, Беслæны, «Металлурджы» æмæ «Æвзонгад»-ы кусджытæн. Уыдон иууылдæр зæрдиагæй суазæг кодтой ерысты архайджыты, æмæ нæ турнир йæ райдайæнæй йæ кæронмæ ацыд æнæкъуылымпыйæ».

Эдуарды ныхæстæм ма бафтауæн ис, футболисттæ цы зæрдиаг хъазт кодтой, уый спортуарзджытæн уæлдай æхсызгондзинад кæй æрхаста. Арфæйы аккаг сты тæрхонгæнджытæ дæр. Уыдон иууылдæр зæрдиагæй бацархайдтой, куыд гæнæн ис, афтæ къаддæр рæдыдтытæ æруадзыныл. Хуыздæртыл та нымад æрцыдысты Тыбылаты Таймураз æмæ йе ‘ххуысгæнджытæ Кокайты Таймураз æмæ Хетæгкаты Тамерлан.

БАСКАТЫ Уырызмæг Къам систа Андрей ПОПОВ

ОСТАВЬТЕ ОТВЕТ

Please enter your comment!
Please enter your name here