Хæххон территориты райрæзты программæ

0
31

 

Зындгонд куыд у, афтæмæй Цæгат Ирыстоны министрадтæ æмæ ведомствæтæ бацæттæ кодтой «Хæххон территориты рæзт»-ы сæрмагонд фыццаградон программæ. Уыцы программæйы ахадындзинад рагагъоммæ сбæлвырд кæныны нысанимæ документы проекттæ æххæст кæнын райдайын хъæуы хæххон цæрæн бынæттæй иуы. Ахæм амынддзинад РЦИ-Аланийы Сæргълæууæг БИТАРТЫ Вячеслав радта Хицауады уæнгтæн Республикон проектон офисы радон æмбырды.

Ацы хатт æмбырды архайджытæ хæххон территориты райрæзты фарстытæй уæлдай комкоммæ æркастысты хъæууон хæдзарады къабазы архайд фæхъомысджындæр кæнынмæ. Æмбырды архайджытæ куыд фæбæрæг кодтой, афтæмæй агропромышленнон комплексы фарстытæ сæрмагонд бынат бацахстой 2030 азмæ Цæгат Ирыстоны социалон-экономикон райрæзты стратегийы.

Куыд зонæм, афтæмæй фидаргонд æрцыд «Хæххон территориты статусы тыххæй» республикон закъон. Уыцы æууæл хынцгæйæ, хицаудзинады æххæстгæнæг оргæнты бæлвырд мадзæлттæ саразын хъæуы закъоны уагæвæрдтæ царды рауадзыны сæраппонд.

Закъоны бындурыл республикæйы 71 цæрæн бынатæн лæвæрд æрцæудзæн хæххон территориты уагæвæрд. Закъон æххæст кæныныл дзургæйæ, Битарты Вячеслав куыд фæнысан кодта, афтæмæй хæххон хъæуты цæрджытæ хъуамæ банкъарой сæ царды хуыздæрæрдæм ивддзинæдтæ.

— Ныртæккæ сæ тыхы сты хъæууон цæрджытæн паддзахадон æххуысы программæтæ (уыдоныл кусы Хъæууон хæдзарад æмæ хойраджы министрад). Паддзахадон æххуыс фыццаджы-фыццагдæр лæвæрд цæудзæн, хæхты чи цæры æмæ фосдарынад, маргъдарынад æмæ мыддарынады куыст чи кæны, уыцы адæмæн. Уыимæ, фарста хъуамæ лыггонд цæуа æппæтвæрсыг æгъдауæй. Ацы хъуыддæгтыл кусгæйæ, сæйрагдæр нысан хъуамæ уа адæймаджы цардæн хуыздæр уавæртæ саразын. Хæххон хъæутæм фæндæгтæ аразынæй уæлдай, уыцы бынæтты хъуамæ уой фелсыронакушерон пункттæ, скъолатæ, дуканитæ, культурæйы хæдзæрттæ æмæ æндæр инфраструктурон объекттæ, — æмбырдæн хатдзæгтæ кæнгæйæ, бафиппайдта Битарты Вячеслав. — Æппæт уыцы фарстытæ лыг кæнын райдайæм иу хъæуы дæнцæгыл.

Ныхасы архайдтой Хицауады Сæрдар Тускъаты Таймураз, йæ хæдивджытæ Сæбæтхъуаты Æхсарбег, Икъаты Русланбег, Иринæ Азимова, профилон министртæ Уазиты Хъазыбег æмæ Томайты Хъазыбег, РЦИАланийы Рæзты агентады разамонæг Павел Игнатьев.

РЦИ-Аланийы Сæргълæууæджы æмæ РЦИ-Аланийы Хицауады пресс-службæ

ОСТАВЬТЕ ОТВЕТ

Please enter your comment!
Please enter your name here