Æхсæнадон уагæвæрд. Зынаргъ дуртæ æмæ æфсæйнæгты зилдухад. Патриотон хъомылад

0
68

 

Уынгты, фæлладуадзæн паркты, спортивон фæзты, транспорты, æндæр æхсæнадон бынæтты нозтджын адæймаг куы фæзыны, уæд уымæй тæссаг вæййы, кæуыл æмбæлы, уыдонæн. Ахæм хъуыддæгтæ халынц æхсæнадон уагæвæрд. Закъонмæ гæсгæ уыцы адæймæгтæ баййафынц административон æфхæрд — бафидынц ивар. Цард куыд æвдисы, афтæмæй фылдæр хатт сæхи фæиуварс кæнынц ивар бафидынæй. Æрмæст Самарæйы облæсты 2017 азы мидхъуыддæгты оргæнты кусджытæ нозтджын, æхсæнадон уагæвæрдхалæг адæймæгтæн рафыстой ивар 2766933 сомæн, уыдон бафыстой æрмæстдæр 1794230 сомы. Ахæм дæнцæгтæ ма ис æрхæссæн. Уымæ гæсгæ Уæрæсейы Федерацийы Административон бархæлдтыты тыххæй кодексы 20.21 статьямæ хаст æрцæудзæн ивддзинæдтæ.

 

Ацы æмæ æндæр ахсджиаг закъоны проекттæ Парламенты советы æмбырдмæ рахаста закъонæвæрынад, закъонад æмæ бынæттон хиуынаффæйады комитеты сæрдар Ортабайты Тимур.

Советы æмбырд амыдта Парламенты Сæрдар Алексей Мачнев.

Ортабайы-фырт куыд бамбарын кодта, афтæмæй, æхсæнадон уагæвæрд чи халы, уыцы адæймæгтæ хъуамæ иварæй уæлдай кæной æнæмæнг æххæстгæнинаг куыстытæ. Уымæй æфхæрæн мадзæлттæ карздæр кæнынц, нозтмæ æмхиц чи у, уыдонæн дæр у цавæрдæр хъомыладон фæрæз. Æфхæрæн мадзæлттæ дыууæ дæр уыдзысты сæ тыхы.

Ахсджиагыл банымайгæ уыд, зынаргъ æфсæйнæгтæ æмæ зынаргъ дуртæ кусыны, пайда сæ кæныны æмæ сæ зилдухы къабазы административон бæрнондзинад фæкарздæр кæнынимæ баст закъоны проект дæр. Комитеты сæрдар куыд бацамыдта, афтæмæй, кæд ныр дæр ахæм бархæлдтытæн ис æфхæрæн мадзæлттæ, уæддæр уыйас ахадгæ не сты. Цард куыд æвдисы, афтæмæй æнæзакъонæй нæ бæстæйы конд кæнæ, фæсарæнтæй кæй æрбаласынц, уыцы зынаргъ ювелирон дзаумæтты базарады сæвзæрд тæссаг криминогенон уавæр. Ацы къабазы цы фыдракæндтæ æрцæуы, уыдон, бæрæггæнæнтæм гæсгæ, хæццæ кæнынц 80 процентмæ. Æрмæст 2017- 2018 азты зынаргъ ювелирон дзаумæттæн сæ хæрзхъæддзинад иртасæг палатæ административон бархæлдтыты тыххæй скодта 997 документы.

Рæстæмбис ивары бæрц у 26 мин сомы, закъон чи халы, уый йæ æнцонæй бафиддзæн, фæлæ йæ архайд барадон бындурмæ нæ аивдзæн. Уымæ гæсгæ Уæрæсейы Федерацийы Административон бархæлдтыты тыххæй кодексы 19.14 статьямæ хаст цæуынц ивддзинæдтæ. Уыдоны фæрцы зынгæ фæкарздæр уыдзæн бæрнондзинад, зынаргъ дуртæ æмæ æфсæйнæгтимæ æнæзакъонæй чи архайы, уыдоны ныхмæ.

Бюджеты, хъалонты, исбонад æмæ кредитон организациты комитеты сæрдар Баликъоты Валери куыд бамбарын кодта, афтæмæй Адыгейы Республикæйы Паддзахадон Совет сæ куырдиат æрвитынц бæстæйы Федералон Æмбырды Сæрдар Валентинæ Матвиенко æмæ Паддзахадон Думæйы Сæрдар Владислав Володинмæ. Курынц, цæмæй ивддзинæдтæ хаст æрцæуа «Уæрæсейы Федерацийы стратегион пълантæ кæныны тыххæй» федералон закъонмæ. Куыд æмбарын кæнынц, афтæмæй, ахæм хуызы документтæ, уыдонимæ — муниципалон скондты социалон-экономикон рæзты стратегитæ, хаст æрцæуынц æхсæнадон байхъуыстытæм федералон закъонты домæнтæм гæсгæ.

Уыцы-иу рæстæг æндæр федералон закъон, уыцы куыст домгæйæ, бынæттон хиуынаффæйады оргæнтæн æвæры æндæр æмгъуыдтæ æмæ фадæттæ дзыллон байхъуыстыты тыххæй. Цæмæй уыцы ныхмæлæудтытæ иуварсгонд æрцæуой, уый тыххæй адыгаг депутаттæ курынц закъонæвæрынадон ивддзинæдтæ.

Иннæ закъонæвæрынадон хъæппæрис дæр рацыд Адыгейы Республикæйы Паддзахадон Советы депутаттæй. Æрныхас ыл кодта наукæ, ахуырад, культурæ æмæ информацион политикæйы комитеты сæрдар Еленæ Князева. Куыд бамбарын кодта, афтæмæй уыдон федералон Ахуырад æмæ наукæйы министрады разамындæй курынц, цæмæй, æвзонг æфсæддонты къордты, хæстон-патриотон клубты æмæ сгарджыты иугæндты æнтыстджынæй чи архайы, уыцы фæсивæдæн, уæлдæр ахуыргæнæндæттæм цæугæйæ, фæзына цавæрдæр æнцойдзинæдтæ. Ома, институттæ æмæ университеттæ абитуриенты иумæйаг баллтæм æфтауой уæлæмхасæн баллтæ, хæстон-патриотон архайды рауагъдонмæ цы æнтыстдзинæдтæ уыдис, уыдоны тыххæй.

Национ политикæ æмæ фæсивæды хъуыддæгты комитет цы фарстытæ бацæттæ кодта, уыдонимæ уыдис Чувашты Республикæйы Паддзахадон Советы сидт Паддзахадон Думæйы Сæрдар Владислав Володинмæ. Депутаттæ курынц, цæмæй рæвдздæр сфидар кæной «Уæрæсейы Федерацийы патриотон хъомылады тыххæй» федералон закъоны проект. Куыд æмбарын кæнынц, афтæмæй патриотон хъомылады паддзахадон политикæ цас фидардæр уа, уыйас фылдæр фадæттæ фæзындзæн бæстæйы хъысмæтыл бæрнондæр уæвынæн, национ æдасдзинады фарстытæ лыг кæнын бæрзонддæр æмвæзадмæ сисынæн, Фыдыбæстæ æмæ йæ бинонты чи уарзы, ахæм гражданин схъомыл кæнынæн.

Кæд æмæ алы регионы дæр ис патриотон хъомыладимæ баст хи бынæттон закъонтæ æмæ барадон акттæ, уæддæр федералон закъонæвæрынад хъуамæ уа нывылдæр. Советы уæнгтæ лæмбынæг байхъуыстой ацы æмæ иннæ ахсджиаг закъоны проектты мидисмæ, равзæрстой сæ æмæ сæ сфидар кодтой. Фæбæрæг ма кодтой Парламенты радон æмбырды боны фæткы фарстытæ.

БУТАТЫ Эльзæ

ОСТАВЬТЕ ОТВЕТ

Please enter your comment!
Please enter your name here