Æнæниздзинад хъахъхъæнынад: сæйраг æргом — медицинон кусджыты дæсныдзинадмæ

0
58

 

Фæстаг цалдæр азы зынгæ фылдæр фæрæзтæ хардзгонд цæуы æнæниздзинад хъахъхъæнынады къабазы райрæзтыл. Арæзт æмæ цалцæггонд цæуынц медицинæйы кусæндæттæ, æвæрынц сæ нырыккон ифтонггæрзтæ. Фæлæ, æмткæй райсгæйæ, æнæниздзинад хъахъхъæнынады къабазы уавæр нæ ивы, раздæрау, хъыгагæн, сæмбæлæм æххуысхъуаг адæммæ куыдфæндыйы цæстæнгас равдисыны цаутимæ, иуæй-иу дохтырты профессионалон цæттæдзинад сагъæсы æфтауы. Уыцы æууæлтæ хынцгæйæ, фыццаградон программæ «Æнæниздзинад»-ы сæйрагдæр уагæвæрдтæй иу хъуамæ суа медицинон кусджыты цæттæ кæныны, сæ профессионалон дæсныдзинады фарста.

Ахæм хъуыдыимæ Цæгат Ирыстоны Сæргълæууæг Битарты Вячеслав раныхас кодта Республикæйы проектон офисы радон æмбырды.

Фембæлды архайджытæ æркастысты, республикон фыццаградон программæ «Æнæниздзинад» æххæст кæныны фæдыл цы мадзæлттæ арæзт цæуы, уымæ. Уый фæдыл доклад скодта программæйы разамонæг Туаты Ирмæ.

— «Комкоммæ бастдзинад»-ы хæтæлмæ адæм цы хъæстытæ æрбарвитынц, уыдоны нымæц къаддæр нæ кæны. Мах аразæм ног рынчындæттæ, æлхæнæм æппæты нырыккондæр медицинон кусæнгæрзтæ. Фæлæ æппæт уыцы хъуыддæгтæ цæй номыл аразæм? Иу æмæ дыууæ хатты фенæм рынчын адæймаджы уавæрмæ уæлæнгай цæстæй акæсæг дохтырты? Æнæниздзинад хъахъхъæнынады къабазы ахæмтæн бынат хъуамæ ма уа, — йæ раныхасы фæбæрæг кодта Битарты Вячеслав.

Республикæйы разамонæджы ныхасмæ гæсгæ, хицаудзинады æххæстгæнæг оргæнтæ уæлдай бæрнондæрæй хъуамæ æххæст кæной æнæниздзинад хъахъхъæнынады къабазы кадрты политикæ. Ныртæккæ йæ тыхы ис иудадзыгон медицинон ахуырады программæ. Фæлæ, Битарты Вячеславы хъуыдымæ гæсгæ, уый фаг нæу.

— Бæлвырд мадзæлттæ саразын хъæуы, цæмæй æнæниздзинад хъахъхъæнынады республикон системæйы бæрæг дарой æппæты дæсныдæр дохтыртæ. Уыдоны къорд бæрæггонд куы ‘рцæуа, уæд, сæ къæпхæнмæ тырнгæйæ, медицинæйы иннæ специалисттæ дæр зæрдиагдæрæй кусдзысты сæ профессионалон дæсныдзинадыл, — фæнысан кодта Битарты Вячеслав.

Республикæйы разамонæг куыд загъта, афтæмæй дохтыртæ æмæ иннæ специалисттæ цæттæ кæныны хъуыддаджы уæлдай ахсджиаг у ахуырадон кусæндæттæ æмæ рынчындæтты æнгом æмархайд дæр. Ахуырады фыццаг къæпхæнтыл хъуамæ бæрæггонд цæуой æппæты курдиатджындæр фæсивæд, уыимæ, уыдонæн фæстæдæр хъуамæ уа ординатурæмæ фыццаградон æгъдауæй бацæуыны фадат. Уымæй уæлдай, æрыгон специалистты практикæмæ æрвитын хъæуы Уæрæсейы зындгонддæр медицинон клиникæтæм. Æмæ æппæт ацы фарстытæм хъуамæ уа лæмбынæг æмæ бæрнон цæстдард.

Æмбырды архайджытæ боны фæткы фарстытыл сæ хъуыдытæ загътой æмæ бахастой бæлвырд фæндæттæ.

 РЦИ-Аланийы Сæргълæууæджы æмæ РЦИ-Аланийы Хицауады пресс-службæ

ОСТАВЬТЕ ОТВЕТ

Please enter your comment!
Please enter your name here