Бокс. Уæрæсейæгтæ авдæй хæцдзысты ерысты æрдæгкæронбæттæны

0
53

Дзæуджыхъæуы 13 мартъийы сбæрæг сты, фæсивæды ‘хсæн Европæйы чемпионаты æрдæгкæронбæттæнмæ чи рацыд, уыцы боксертæ. Уый тыххæй ерысты алы уæзы дæр цыдысты ахъаззаг тохтæ. Ацы ран чи рамбылдтаид, уый хъуамæ æппынкъаддæр суыдаид чемпионаты бронзæ майданæй хорзæхджынгонд.

Уæрæсейы командæйæ ерысты 1/4 хаймæ цы фараст боксеры рацыд, уыдонæй иу у Плиты Роберт æмæ Джиоты Хъазыбеджы хъомылгæнинаг Абайты Алан. Уый размæ Алан фæуæлахиз болгайраг боксер Белсан Киркоров æмæ словакаг Михаил Такачыл. Ныр йæ ныхмæлæууæг уыд Испанийы минæвар Адреан Тиам Креус. Алан рингмæ куы рацыд, уæд трибунæйы бадæг спортуарзджытæ ныццæлхъ кодтой ирон зарæг. Уый цыма Абайы-фыртæн ныфсы хос фæци, афтæ уæндонæй райдыдта йæ тох. Йæ ныхмæлæууæг дæр сæ лæмæгътæй кæй нæ уыд, уый зындис йæ архайдæй. Креус асæй бæрзонддæр уæвгæйæ, архайдта Абайы-фырты йæхимæ хæстæг нæ уадзын æмæ уыцы рæстæг цырд ныббырстытæ аразыныл. Алан йæ ныхмæлæууæджы фæндтæ фехæлдта йæ æрхъуыдыджын архайдæй. Алы раунды дæр ын бантыст Адреан Креусæн къорд хатты дæсны цæфтæ ныккæнын, йæхиуыл та цæфтæ хæрз гыццыл æруадзын. Афтæмæй æртæ раунды фæстæ тæрхонгæнджытæ æмхъæлæсæй уæлахиздзауыл банымадтой Абайы-фырты.

Ныр Алан тырны уæлдæр бынатмæ æмæ йæ уый тыххæй 15 мартъийы фембæлын бахъæудзæн молдаваг боксер Александр Параскивимæ. Ацы тохы чи рамбула, уымæн фадат уыдзæн 17 мартъийы кæронбæттæны фембæлды Европæйы чемпионы ном рамбулынæн!

Уæрæсейаг боксертæй æрдæгкæронбæттæнмæ рацыдысты: Володя Мнацаканян (49 кг), Сергей Ярулин (56 кг), Беслан Хамзаев (60 кг), Абайты Алан (64 кг), Вахид Аббасов (69 кг), Алексей Смыкин (75 кг) æмæ Владислав Иванов (91 кг).

Æхсызгон у, Дзæуджыхъæумæ Европæйы алы рæттæй цы спортсментæ æмæ уазджытæ æрбацыд, уыдонæн сæ зæрдæмæ, ерыстæ куыд æмæ цы уавæрты цæуынц, уыцы хабар кæй фæцыд, уый. Уæдæ Уæрæсейы номæй ерысты цы лæппутæ архайынц, уыдон та уæлдай бузныг сты, спортуарзджытæ сыл куыд цин кæнынц, уымæй.

«Дзæуджыхъæу мæ зæрдæмæ тынг фæцыд. Уæдæ иннæ ахæм спортуарзджытæ. Рингмæ куы рацæйцæуæм, уæд нын трибунæтæ сæ æмдзæгъд æмæ разæнгардгæнæн сидтытæй нæ ныфсыл ныфс æфтауынц, æмæ уый бирæйы аргъ у. Мах нæхиуыл нæ ауæрдгæйæ бацархайдзыстæм спортуарзджыты зæрдæтæ нæ архайдæй тынгдæр барухс кæныныл», — загъта Сергей Ярулин.

Абон Хъуылаты Бадзийы номыл спортивон галуанмæ чи æрбацæуа, уыдон, æнæмæнг, æвдисæн уыдзысты æвæджиауы рæсугъд æмæ цымыдисаг ерыстæн.

БАСКАТЫ Уырызмæг

 

ОСТАВЬТЕ ОТВЕТ

Please enter your comment!
Please enter your name here