Сфæлдыстадон фембæлд

0
281

 

Цæгат Ирыстоны Театралон архайджыты цæдисы фæндонæй Театры азы фæткмæ гæсгæ арæзт цæудзысты актер, режиссер æмæ продюсер ДЫГЪУЫЗТЫ Аланы сфæлдыстадон фембæлдтытæ. Фыццаг фембæлд ын уыд Дзæуджыхъæуы Аивæдты лицейы ахуырдзаутимæ. Ахæм фембæлдтытæ уыдзæн цалдæр.

Дыгъуызы-фырт у уæрæсейаг кинойы курдиатджындæр актертæй иу. 40 азы дæргъы Цæгат Ирыстоны Тæбæхсæуты Балойы номыл паддзахадон академион Ирон театры чи кусы, нæ республикæйы уыцы адæмон артисткæ Мелыкаты Замирæйы лæппу Алан сабибонтæй фæстæмæ бауарзта аивад. Уый кæд æрыгон актер у, уæддæр ныридæгæн ролтæ ахъазыд кинонывтæ «Мады хъæлæс», «Кармелитæ, Цигайнаг монц», «Бомжихæ», «Асайдзынæ — амæлдзынæ», «Хус зæхх» æмæ æндæрты.

Лицейы ахуыргæнджытæ æмæ ахуырдзаутимæ фембæлд байгом кодта ахуыргæнæндоны директор Ходы Фатимæ. Лицейы коллективимæ йæ зонгæ кæнгæйæ, Фатимæ Дыгъуызы-фыртæн бафæдзæхста йе сфæлдыстадон куысты тыххæй хабæрттæ радзурын. Киноныв равдисыны агъоммæ ахуырдзаутæ уазæгæн радтой музыкалон лæвар.

Алан йе сфæлдыстадон куысты райдайæны тыххæй радзырдта. 15-аздзыдæй Мæскуымæ фыццаг хатт куы ныццыд, уæд уым цы зындзинæдтыл сæмбæлд, уыдонæй иу кæй уыд адæмыхæттыты æхсæн ахастдзинæдты фарста. Ацы темæйыл Алан йæхи сценаримæ гæсгæ систа йæ фыццаг киноныв «Воскресение» (сфæлдыстадон фембæлды рæстæг æй равдыстой). Сценаримæ гæсгæ, дыууæ лæппуйы баисты адæмыхæттыты æхсæн ахастдзинæдты амæттæгтæ.

Сфæлдыстадон пълантыл дзургæйæ, Алан куыд загъта, афтæмæй йæ зæрды ис майы Дзæуджыхъæуы аивадон кинойы дунеон кинофестивал “КиноБарс” саразын.

— Фестивалы сæйраг хæс у республикæйы кинематографион æгъдæуттæ сног кæнын, стæй æнæ стыр бюджетон хæрдзтæй сфæлдыстадон проекттæ баххæст кæнæн куыд ис, æрыгон кинематографисттæн уый бацамонын, — загъта Дыгъуызы-фырт.

Алан кæй сæргъы лæууы æмæ рæхджы 5 азы кæуыл сæххæст уыдзæн, уыцы сфæлдыстадон студи «FARN MOVIE»-йы æртæ кинонывы æнтыстджынæй æвдыст æрцыдысты уæрæсейаг æмæ дунеон кинофестивалты.

Мидисджын фембæлды кæрон Дыгъуызты Алан йæ цалдæр уарзон æмдзæвгæйы æмæ басняйы бакаст лицейы коллективæн.

РЦИ-Аланийы Театралон архайджыты цæдисы пресс-службæ

ОСТАВЬТЕ ОТВЕТ

Please enter your comment!
Please enter your name here