Европæйы чемпионат боксæй: спорты бæрæгбон фæрæстмæ

0
59

 

Республикæ Цæгат Ирыстон-Аланийы Сæргълæууæг БИТАРТЫ Вячеславæн фембæлд уыд республикæйы Боксы федерацийы президент ДЗГОЙТЫ Константинимæ.

Ныхасы архайдтой Цæгат Ирыстоны Хицауады Сæрдары хæдивæг Иринæ АЗИМОВА æмæ республикæйы физикон культурæ æмæ спорты министр ГÆБУЛТЫ Владимир.

Республикæйы Сæргълæууæг спортивон федерацийы президентæн бузныг загъта, боксæй Европæйы чемпионаты мадзæлттæ бæрзонд æмвæзадыл æххæстгонд кæй æрцыдысты, стæй Дзгойы-фырт спорты рæзтмæ стыр æвæрæн кæй хæссы, уый тыххæй.

— Ивгъуыд хуыцаубоны уыд боксæй Европæйы чемпионаты кæронбæттæн бон. Абон та сæ хæдзæрттæм афæндараст кодтам, ахæм стыр спортивон мадзалы чи архайдта, уыцы делегациты минæвæртты. Боксæй ахæм егъау дунеон турнир Цæгат Ирыстоны цыд фыццаг хатт. Æмæ ныр зæгъæн ис, ерыстæм цæттæ кæнгæйæ, нæ размæ цы бирæ организацион фарстытæ лæууыд, уыдон æнтыстджынæй кæй сæххæст кодтам, уый. Хъуыддаг кæй фæрæстмæ, ууыл зæрдиагæй бакуыстой республикæйы Хицауад, Цæгат Ирыстоны боксы федераци æмæ барадхъахъхъæнæг оргæнтæ, — фæнысан кодта Битарты Вячеслав.

Европæйы чемпионат бацæттæ кæныны хъуыддагмæ стыр бавæрæны тыххæй республикæйы Сæргълæууæг арфæ ракодта Уæрæсейы Спорты министрады разамынд, стæй спонсортæн дæр. Уыдоны нымæцы — Гуыриаты Владимир æмæ Дзгойты Тамерлан.

Битарты Вячеслав йæ раныхасы куыд бафиппайдта, ахæм æмвæзады ерыстæ аразыны хъуыддаг хорзæрдæм фæзындзæн республикæйы кадыл, йæ ном уæрæхдæр айхъуысдзæн, куыд спортивон æмæ уазæгуарзаг регион, афтæ. «Чемпионаты мадзæлттæм стыр æргом раздæхтой нæ фæсивæд. Уыцы цымыдисдзинад нæ рæзгæ фæлтæры фидæны уæлахизтæн ахъаз кæй уыдзæн, ууыл дызæрдыг нæ кæнын», — загъта республикæйы разамонæг.

Боксæй Европæйы чемпионат бацæттæ кæныны куысты зæрдиагæй кæй архайдта, уый тыххæй Дзгойты Константинæн лæвæрд æрцыд РЦИ-Аланийы Сæргълæууæджы Арфæйы фыстæг.

РЦИ-Аланийы Сæргълæууæджы æмæ РЦИ-Аланийы Хицауады пресс-службæ

 

ОСТАВЬТЕ ОТВЕТ

Please enter your comment!
Please enter your name here