Хæлардзинады хидтæ

0
254

 

Ирон адæм дунейы мидæг бирæ цæмæйдæрты хъуыстгонд сты — наукæйы, аивады, литературæйы… Фæлæ уыцы хæрзты æхсæн ис иу хæзна — хæлардзинад. Хæлардзинад тауын нын фæдзæхст у рагфыдæлтæй.

Уыцы фæдзæхст æххæстгонд цæуы абон дæр. Ирыстоны кæстæртæ хæлардзинад тауынц канд сæхимæ нæ, фæлæ ма сыхаг республикæты фæсивæды æхсæн дæр. Уый та абон у стыр арфæйаг хъуыддаг.

Ивгъуыд къуырийы кæрон республикон хæрзаудæн фонд «Быть добру»-ы разамонæг, Фæсивæдон парламенты сæрдары хæдивæг Хъуысаты Амырханы хъæппæрисæй Ирыстонмæ ссыдысты Дагестаны республикæйы Адæмон æмбырды цур фæсивæдон парламенты сæрдар Сергей Никитин, йæ хæдивæг Эльвирæ Гюльмагомедова, æхсæнадон архайджытæ Сабият Гаджибагомедова, Карим Шехсаидов, Исрапил Гаджибагомедов, Анжеликæ Меджиева, Махач Муслимов, Джабраил Изиев.

Уазджытæ Ирыстонмæ куы схæццæ сты, уæд сæ фыццаг куырдиат уыд, 2004 азы Беслæны фыццæгæм скъолайы фыдбæллæхы цы сабитæ фæмард, уыдоны уæлмæрд бабæрæг кæнын, цæмæй дзы иу уысм сæркъулæй алæууой. Уый фæстæ та бабæрæг кодтой фыццæгæм скъола.

«Сымах, ирон адæм, æцæгæй дæр стут хъæбатыр адæм, уымæн æмæ уæ бон бацис ахæм фыдсахаты рæстæг кæрæдзийы фарсмæ балæууын, кæрæдзийæн ныфсы хос фестын, цæмæй цард дарддæр цæуа. Нæ бауагътат уæ хотæ æмæ уе ‘фсымæрты зын рæстæг фæцудын. Хъуамæ бирæтæн уат дæнцæг! Фидæны сымах дæр æмæ æппæт дунейы дæр Хуыцау ахæм цаутæй бахизæд. Уый та нын бантысдзæн æрмæстдæр уæд, æмæ не ‘хсæн хæлардзинады тæгтæ фидар куы уой», — загъта Сергей Никитин.

Беслæны фæстæ нæ уазджытæ бабæрæг кодтой республикон спецализацигонд «Сабийы хæдзар» («Дом ребенка»), ам сывæллæттæн радтой, семæ цы зæрдылдарæн лæвæрттæ сластой, уыдон.

Дыккаг бон уазджытæн нæ республикæйы Хицауады хæдзары æмбырдтæ аразæн залы уыд цæлхæмбырд.

Æхсæнадон архайджытæй уæлдай ма семæ фембæлдысты нæ республикæйы пысылмæтты удварнон управленийы муфти Гуæцæлты Хадзымурат, горæт Дзæуджыхъæуы бынæттон хиуынаффæйады администрацийы спорты управленийы разамонæг Баситы Марат, газет «Рæстдзинад»-ы уацхæссæг Гасанты Валери, хуынд адæм.

Цæлхæмбырды размæ уазджытæн, куыд хистæр кары минæвар, афтæ æгасцуай загъта Гуæцæлты Хадзымурат:

— Фыццаджыдæр, стыр бузныг фысымтæн, ардæм мæ кæй æрбахуыдтой, уый тыххæй. Абон сымах цы фæрныг хъуыддагыл кусут, цы рæстаг хабæрттæ кæнут, уыдон Дагестан æмæ Ирыстоны æхсæн раджы байтыдтой нæ хистæртæ. Фæлæ рæстæджы змæлд афтæ рауад, æмæ кæцыдæр афон кæрæдзийæ адард стæм. Æмæ та мæнæ абон мæхи цæстытæй уынын, нæ кæстæртæ кæрæдзийы кæй бацагуырдтой, ногæй та кæй тауынц се ‘хсæн хæлардзинад. Æмæ Хуыцау зæгъæд, цæмæй уæ хæлардзинад æфсымæрдзинадмæ рахиза. Хистæр амондджын йæ кæстæртæй вæййы. Æз сымах фæрцы мæхи хонын амондджын. Æгас цæут Ирыстонмæ!, — загъта муфти.

Дарддæр уазджытæ æмæ фысымтæ рахызтысты, цæлхæмбырды фæлгæты сæ размæ цы нысантæ сæвæрдтой, уыдонмæ. Биноныгæй æрныхас кодтой ахсджиаг фарстытыл.

Кæронбæттæны уазджыты делегацийы сæргълæууæг Сергей Никитин фысымтæн арфæ ракодта: — Абон цы фембæлд рауад, уымæн бындур сæвæрдтат сымах, нæ ирон хотæ æмæ æфсымæртæ. Хæрз чысыл рæстæджы размæ бабæрæг кодтат Дагестан. Уæд уæ фембæлды рæстæг сымах загътат, цæмæй уæм мах дæр, æнæмæнг, ссæуæм. Æмæ мæнæ абон уæ куырдиат сæххæст кодтам. Бузныг уын, афтæ зæрдæрайгæйæ ныл кæй сæмбæлдыстут, уый тыххæй. Махæн уæ алы ахаст дæр у æхцон. Нæ зæрдæ дардзыстæм, не ‘хсæн нæ фыдæлтæ цы хид самадтой, уый кæрæдзийы фæрцы фидарæй-фидардæр кæй кæндзæн, ууыл. Хæлардзинад кæм уа, уым хæрамдзинадæн бынат нæй!

Кæронбæттæны уазджытæ æмæ фысымтæ кæрæдзийæн скодтой зæрдылдарæн лæвæрттæ æмæ дзырд радтой, сæрды кæй уыдзæн сæ радон фембæлд.

КАСАТЫ Аслæнбег

ОСТАВЬТЕ ОТВЕТ

Please enter your comment!
Please enter your name here