Хъæд зынгсирвæзтæй бахъахъхъæнæм

0
69

 

Мит Цæгат Ирыстоны фылдæр æрдзон бынæтты йæхи кæй систа, æмæ уалдзыгон хъарм бонтæ кæй ралæууыдысты, уымæ гæсгæ зынгсирвæзтæй тæссаг рæстæг гом æрцыд республикæйы территорийы. Йæ байгом кæныныл бацархайдта РЦИ-Аланийы æрдзон фæрæзтæ æмæ экологийы министр Мамиаты Чермен. Ацы аз 3 мартъийы уый бардзырд бафыста, æмæ уымæ гæсгæ амынд æрцыдысты, хъæды зынгсирвæзтытæй тæссаг рæстæг цы мадзæлттæй пайда кæнын хъæуы, уыдон

Фыццаджыдæр, республикæйы Æрдзы министрады паддзахадон инспектортæ иудадзыг цæст дардзысты, хъæды зынгсирвæзт не ‘руадзыны тыххæй рагагъоммæ цы профилактикон мадзæлттæ нысангонд æрцыд, уыдон куыд æххæстгонд цæуынц, уымæ. Барадхъахъхъæнæг оргæнтæ, районты бынæттон хиуынаффæйады администрациты кусджытæ æмæ хъазахъхъаг æхсæнæдты уæнгтимæ уыдон бæрæг кæндзысты, хъæды зынгсирвæзт кæй аххосæй æрцыд, уыцы адæймæгты.

Уавæр афтæ у, æмæ уалдзыгон хъæды зынгсирвæзтытæ арæхдæр æрцæуынц хус кæрдæгыл æндзарыны тыххæй хъæууонхæдзарадон нысаниуæджы зæххыты, дачæтæ æмæ æндæр рæтты. Уымæ гæсгæ хус кæрдæг хæдбарæй судзыны тыххæй аххосджынтæ æфхæрд цæудзысты Уæрæсейы Федерацийы Административон кодексы 20.4 статьяйы бындурыл. Уымæ гæсгæ, зынгсирвæзт кæй аххо- сæй æрцæуа, уыцы граждæнтæ иваргонд цæудзысты мин сомæй — мин æмæ æрдæг сомы онг. Бæрнон адæймæгты ивар фидын бахъæудзæн æхсæз минæй фынддæс мин сомы онг, юридикон адæймæгтæ та иваргонд цæудзысты сæдæ фæндзай мин сомæй дыууæсæдæ мин сомы онг.

Уымæй уæлдай зынгсирвæзты ныхмæ сæрмагонд уаг- æвæрды рæстæг зынгсирвæзты æдасдзинады æгъдæуттæ фехалыны тыххæй граждæнтæ административон æгъда- уæй иваргонд цæуынц дыууæ мин сомæй цыппар мин сомы онг; бæрнон адæймæгтæ фынддæс мин сомæй æртын мин сомы онг; юридикон адæймæгтæ цыппарсæдæ мин сомæй — фондзсæдæ мин сомы онг.

Ай-гъай, нæ алфамбылай хъæдтæ мах карз мадзæлттæй нæ бахъахъхъæндзыстæм. Хъуамæ алы адæймаг дæр зона, хъæды зынгсирвæзт не ‘руадзыны тыххæй йæ размæ цы бæрнон хæстæ лæууы, уый. Уымæ гæсгæ Æрдзы министрад фæдзæхсы: уæ хорзæхæй, арæхсгæ архайут артимæ хъæды æмæ уымæ æввахс фæзуæтты. Хъæды зынгсирвæзт куы бафиппайат, уæд та æвæстиатæй фæдзурут регионалон диспетчерон службæмæ (8-86738-358-97) кæнæ та Хъæд хъахъхъæныны комкоммæ телефонæй ахæм номырæй: 8-800-100-94-00 (дзæнгæрæг у лæвар).

ДЗЫНЫХТЫ Аленæ, РЦИ-Аланийы Æрдзон фæрæзтæ æмæ экологийы министрады пресс-службæ

 

ОСТАВЬТЕ ОТВЕТ

Please enter your comment!
Please enter your name here