Сывæллæтты фæлладуагъд

0
70

 

Скъоладзауты ахуыры азы кæронмæ бирæ нал баззад. Сывæллæттæ сæрдыгон каникулты сæ фæллад кæм æмæ куыд уаддзысты, уый фæдыл РЦИ-Аланийы Хицауады хæдзары бæстон ныхас цыдис ведомствæты æхсæн къамисы æмбырды. Амыдта йæ республикæйы Хицауады Сæрдары хæдивæг Иринæ АЗИМОВА.

Къамисы уæнгтæ хатдзæгтæ скодтой ивгъуыд азы бæрæггæнæнтæн æмæ æрныхас кодтой, ацы азы куыстыл. РЦИАланийы фæллойы æмæ социалон рæзты министр Хуыбиаты Барис куыд радзырдта, афтæмæй 2019 азы нæ республикæйы скъоладзауты фæлладуагъд æмæ хи дзæбæхгæнæн мадзæлтты цæттæгæнæн хъуыддæгты развæлгъау сбæлвырд сты уыцы фарстытыл ныхас цыдис æмбырды.

— Министрад бацæттæ кодта æххæстгæнæг хъуыддæгты пълан æмæ уый фæрцы сывæллæтты фæлладуагъд ацæудзæн хорз уавæрты. Нæ республикæйы ис 11 фæлладуадзæн бынаты, уыдонæй 6, сты афæдзыдæргъы чи кусы, ахæмтæ. Куыд алы аз, афтæ нæ ныр дæр Ирыстоны сывæллæттæн уыдзæн денджызы былгæрæтты 6 санаторийы баулæфыны фадат. Æнæмæнг уыдзæн сывæллæтты хæринагмæ цæст дардзысты специалисттæ.

Æртындæс аукционы расидтыстæм цæмæй бадзырдтæ арæзт æрцæуой нæ министрад æмæ фæлладуадзæн организациты ‘хсæн, — загъта министр.

Æмбырды сæйрагдæрыл нымад уыдис æдасдзинады фарст. Иринæ Азимова, куыд загъта, афтæмæй нæ республикæйы фæлладуадзæн æмæ хи дзæбæхгæнæн кусæндæтты ‘хсæн ис, зынгсирвæзты ныхмæ мадзæлттæ кæронмæ æххæстгонд кæм не сты, ахæмтæ. Уыцы фарсты фæдыл бæлвырд дзуапп радта, УФ-йы Æнæнхъæлæджы уавæрты министрады цæгатирыстойнаг управленийы цæстдарæн архайды æмæ профилактикон куысты сæйраг специалист Хъæрæцаты Георги.

— Апрелы райдайдзыстæм бæрæг кæнын республикæйы æппæт фæлладуадзæн æмæ санаторон-курортон бынæттæ. Ис нæм лагертæ, абоны онг дæр æдасдзинады фарст лыггонд кæм не ‘рцыд, ахæмтæ æмæ уыцы лагерты кусдзыстæм биноныгдæр, — бафиппайдта уый.

Нæ републикæйы фæсивæды хъуыддæгты фæдыл комитеты сæрдар Джусойты Руслан ма радзырдта, æфсæддонпатриотон хъомылады фарстытыл кæм кусынц, уыцы хи дзæбæхгæнæнты тыххæй.

— Ирыстоны ис, сывæллæттимæ æфсæддон патриотон хъомылады куыст кæм кæнынц, ахæм æртæ лагеры: «Патриот», «Балц» æмæ «Хохаг». Баулæфынæй дарддæр ацы лагерты сывæллæттимæ кусынц психологтæ, æфсæддон хъуыддаджы миниуджытæ сын чи амоны, ахæм специалисттæ. Сывæллæтты кар у 14 азæй 17 азы онг, социалон æгъдауæй æнæххæст бинонтæй чи у æмæ ныридæгæн уæззау хъомыладон уавæрты чи бахауд, ахæмтæ. Ацы ран сын амонынц, æнæнхъæлæджы уавæрты фыццаг медицинон æххуыс куыд бакæнын хъæуы, Фыдыбæстæйы сæрвæлтау адæймаг хъуамæ цавæр сгуыхтдзинæдтæм цæттæ уа æмæ æндæр фарстытæ, — загъта Джусойты Руслан.

Æмбырды кæрон æппæт фарстыты фæдыл Хицауады Сæрдары Хæдивæг Иринæ Азимова радта бæрæг хæслæвæрдтæ, цымæй сывæллæтты фæлладуадзæн мадзæлттæ 2019 азы ацæуой бæрзонд æмвæзадыл, уый тыххæй.

 САУТÆТЫ Тамилæ

ОСТАВЬТЕ ОТВЕТ

Please enter your comment!
Please enter your name here