Федералон Æмбырды уынаффæ æххæстгонд цæуы

0
26

 

«Куыд зонут, афтæмæй дыууæ азы размæ нæ бæстæйы Федералон Æмбырды арæзт æрцыдысты Республикæ Цæгат Ирыстон-Аланийы бонтæ. Уыцы хъуыддагыл бацархайдтой Парламенты депутаттæ æмæ республикæйы Хицауады минæвæрттæ. Фембæлдтæ нын фадат радтой сенаторты размæ республикæйы рæзты ахъаззагдæр фарстытæ, зындзинæдтæ цы хъуыддæгты æвзарæм, уыдæттæ рæгъмæ рахæссынæн. Афтæмæй фæзындис Федералон æмбырды Цæгат Ирыстоны социалон-экономикон рæзтæн паддзахадон æххуыс бакæныны сæрмагонд уынаффæ. Ацы бонты Мæскуыйы Федералон Æмбырды Федералон сконды, регионалон политикæ, бынæттон хиуынаффæйад æмæ Цæгаты хъуыддæгты тыххæй комитет æркаст, уыцы уынаффæ æххæстгонд куыд цæуы, уымæ», — знон парламентон советы æмбырды архайгæйæ, Хицауады Сæрдары хæдивæг ФАДЗАЙТЫ Æхсарбег радзырдта, Федералон Æмбырды комитет куыд бакуыста, уый тыххæй.

Советы æмбырд амыдта Парламенты Сæрдар Алексей МАЧНЕВ.

Фадзайты Æхсарбег куыд бацамыдта, афтæмæй ма Федералон Æмбырды комитеты хъуыддаджы ныхасы архайдтой бæстæйы Хицауады уæнгтæ, Цæгат Ирыстоны разамынд. Æмбырды æрныхас кодтой, Цæгат Ирыстонæн паддзахадон æххуыс бакæныны мадзæлттæ куыд æнтысынц, ууыл. Фадзайы-фырт йæхæдæг дæр архайдта æмбырды, кæрæй-кæронмæ ранымадта, хъуыддæгтæ куыд арæзт цæуынц, уый. Бюджеты уавæр банывыл кæныны охыл нын 2018 азы радих кодтой 787,7 милуан сомы. Уыналы æмæ Фыййагдоны æппарæццæгтæ æфснайæнты зианхæссæг фæстиуджытæ аиуварс кæныны охыл дыууæ бынаты дæр хаст æрцыдысты сæрмагонд программæмæ. Ацы аз сыл кусын райдайдзыстæм, кæронмæ сæ сæххæст кæндзыстæм 2020 азы.

Рагæй дæр нын стыр зындзинæдтæ æвзарын кодта, æнæбары сæ цæрæн бынæттæ чи ныууагъта, уыцы адæмы цæрæнуæтты фарст. Федералон центр нын фарон уыцы нысанæн радих кодта æхца æмæ 485 бинонтæн радтам сертификаттæ. Ацы аз дæр 700 бинонтæ суыдзысты сертификатты хицæуттæ, хъуыддаг лыггонд æрцæудзæн 2020 азы, 586 бинонтæ дæр райсдзысты уыцы сертификат. Зруджы аргъуан бындуронæй рацаразыны тыххæй документтæ æвзæрста Уæрæсейы Культурæйы министрад, уыдон цавæрдæр аххосæгты тыххæй не сразы сты объектæн æхца радих кæныныл. Сенатортæ бадомдтой, цæмæй ведомствæ ногæй хъуыддаг равзара æмæ йæ хорзæрдæм алыг кæна. Национ музейы рацарæзты куыстытæ кæронмæ ахæццæ кæныны тыххæй ын 2019 азы радих кодтой 454 милуан сомы.

Фадзайты Æхсарбег ранымадта иннæ социалон объекттæ дæр — Республикон сывæллæтты рынчындон, Мæздæджы поликлиникæ æмæ арæндоны арæзтад, сывæллæтты поликлиникæтæ, культурæйы артдзæстытæ саразын æмæ сцалцæг кæнын, бындуронæй сæм базилын, — æппæт хъуыддæгтыл дæр архайынц. Федералон Æмбырды уынаффæ Уæрæсейы Федерацийы Хицауадæн у æнæмæнг æххæстгæнинаг, фæлæ хъуыддæгтæ куыд цæуынц, уымæ та сæ цæст дарынц нæхи хицаудзинад, министрадтæ, ведомствæтæ. Ныхасгæнæг ма фæбæрæг кодта адæмон æрмдæсныты къабазы рæзтæн субсидитæ радих кæныны фарст дæр.

Æдæппæтæй республикæйы ис дæс ахæм куыстуаты, 45 та — хицæнæй уыцы куыст чи кæны, ахæм амалхъомтæ. Куыд рабæрæг, афтæмæй æхцайы æххуыс райсыны охыл конкурс æвæры домæнтæ: хъуамæ амалхъомадон кусæндоны фæллойадон æмгъуыд уа дæс азы. Уыцы барæнтæ æрмæстдæр сæххæст кодта куыстуат «Изольдæ», «Асик» дæр хъуамæ бацархайдтаид, фæлæ цавæрдæр къуылымпыдзинæдтæ бавзæрста. «Мах фарст æвæрдтам ахæм хуызы: цæуылнæ ис архайды фæллойадон æмгъуыд фæкъаддæр кæнæн? Ома, уыцы домæн иуварсгонд куы æрцæуа, уæд фылдæр куыстуæттæ æмæ амалхъомтæ исиккой æххуыс, адæмон æрмдæсныты къабаз та йæхиуыл схæцид. Сенатортæ немæ уыдысты разы, æвæццæгæн, уыцы уагæвæрдмæ æркæсдзысты», — загъта Фадзайы-фырт.

Парламенты депутаттæ, Хицауады кабинеты уæнгтæ иу æмæ дыууæ хатты не ‘взæрстой, коммуналон лæггæдты æдде ма бирæуæладзыгон хæдзæртты цæрджытæн иумæйагхæдзарадон хæрдзтæн цы фиддонтæ равæрынц, уый. Хъуыддаг æрмæст Цæгат Ирыстоны цæрджыты нæ тыхсын кæны, фæлæ иннæ уæрæсейæгты дæр. Дыууæ азы размæ Федералон Æмбырды Цæгат Ирыстоны бонты рæстæг нæ минæвæрттæ рæгъмæ рахастой закъонæвæрынадон хъæппæрис, цæмæй уыцы иумæйагхæдзарадон фиддонтæ бынтондæр иуварсгонд æрцæуой. Цард куыд равдыста, афтæмæй æппæт уыцы фиддонтæ хаст уыдысты тарифтæм, ома фæрæзты аргъмæ. Æваст сæ коммуналон фæрæзтæй кæй фæхицæн кодтой æмæ сæ æндæрхуызон кæй схуыдтой, уымæй дывæр уæз баппæрстой цæрджыты уæхсджытæм.

Фадзайты Æхсарбег куыд загъта, афтæмæй Уæрæсейы Хицауад æмæ Паддзахадон Думæ не сразы сты цæгатирыстойнаг закъонæвæрынадон хъæппæрисимæ. «Мах фарст комитеты æмбырды дæр ногæй сæвæрдтам, æрхастам нæ хатдзæгтæ, барæнтæ, фæлæ Уæрæсейы Хицауадæй уым чи архайдта, уыдоны ‘хсæн нæ уыдис ахæм специалист», — бафиппайдта Хицауады Сæрдары хæдивæг. Уымæй дарддæр Фадзайты Æхсарбег дзуаппытæ радта депутатты фарстытæн.

Алексей Мачневы хатдзæгмæ гæсгæ, Федералон Æмбырд Цæгат Ирыстоны тыххæй цы сæрмагонд уынаффæ рахаста, ууыл куыст цæуы, кæцыдæр хъуыддæгтæ кæронмæ фæхæццæ кæнынц. Ис ма дзы, стыр æргом здахын кæмæ хъæуы, ахæмтæ. Æппæт бæрнон ведомствæтæ хъуамæ сæ архайд федералон хицаудзинадимæ ноджы фæахадгæдæр кæной. Цы закъонæвæрынадон хъæппæрисы кой кодта Фадзайты Æхсарбег, ууыл дарддæр хъæуы бакусын, у тынг ахсджиаг æмæ йæ æппынæдзух æмбæлы уæлдæр Хицауады раз æвæрын.

Советы æмбырдмæ ма рахастæуыд бирæ закъонæвæрынадон акттæ, депутаттæ сæ равзæрстой æмæ сæ сфидар кодтой.

БУТАТЫ Эльзæ

ОСТАВЬТЕ ОТВЕТ

Please enter your comment!
Please enter your name here