Фиддонтæ æмæ санитарон уавæр

0
26

 

Знон РЦИ-Аланийы Сæргълæууæг БИТАРТЫ Вячеслав фембæлд районты разамонджытæ æмæ Хицауады уæнгтимæ. Ныхас цыдис районты æмæ муниципалитетты уавæрыл. Æмбырды архайджытæ æркастысты электрон тых, газы фиддонтимæ, бирæфатерон хæдзæртты бындурон цалцæджы, районты æмæ муниципалон скондты санитарон уавæримæ баст фарстытæм.

Битарты Вячеслав куыд загъта, афтæмæй æппæт районты дæр ис бирæ лыггæнинаг фарстытæ, куыд æххæстгонд цæуынц, уый у æмбырды сæйраг нысан.

— Мæ Æрвыстæджы кæй фæнысан кодтон, уыцы хæслæвæрдтæ арвитдзыстæм районты администрацитæм æмæ сыл бакусын хъæуы бæрнон æмæ æвæстиатæй. Уыцы ахсджиаг хъуыддæгтæ нæ республикæйы цæрджытæ домынц, алы гражданинмæ дæр хауынц æмæ сæ æххæст кæнын хъæуы афоныл. Уыцы куысты фæдыл алы мæй дæр хаддзæгтæм æнхъæлмæ кæсын, — загъта нæ республикæйы Сæргълæууæг.

Акционерон æхсæнад «Цæгаткавказэнерго»-йы директоры хæдивæг Хъодзаты Маринæ æмбырды куыд фехъусын кодта, афтæмæй электрон тыхы хæстæ ацы азы райдианæй нырмæ тынг сырæзыдысты. — Электрон тыхы фиддонтæ æмбæлгæ уагыл æмæ афоныл кæй нæ цæуынц, уый æвдисы районты уавæр. Æрмæст раппæлинаг у Кировы район, иунæг сом дæр электрон тыхæн нæ дарынц, æппæты æвзæрдæр уавæры та Æрæфы район ис, сæ хæс у 12 милуан сомы, — загъта Хъодзаты Маринæ.

Æрæфы районы бынæттон хиуынаффæйады администрацийы минæвар æмбырды архайджытæн радзырдта, районы бюджетмæ ныры онг æхца кæй нæма æрæрвыстой, уый тыххæй. Куыд бафиппайдта, афтæмæй иуæндæс милуан сомы алы мæй дæр радих кæнынц бюджеты къабазы кусджытæн мыздæн. Ацы хæсимæ разы не сты. Ахæм уавæры сты: Мæздæджы, Æрыдоны, Дыгуры æмæ Горæтгæрон районтæ æмæ Дзæуджыхъæу. Битарты Вячеслав ацы уавæры тыххæй дзуапп бадомдта РЦИ-Аланийы финансты министр Бутаты Хъасболатæй. Бутайы-фырт куыд загъта, афтæмæй министрады ‘рдыгæй къуылымпыдзинад нæй, районтæм æхца афоныл æрвитынц. Республикæйы Сæргълæууæг бахæс кодта Хицауады Сæрдары хæдивæг Фадзайты Æхсарбегæн, цæмæй районты æмæ муниципалитетты бюджетты архайдмæ йæ цæст фæдара.

— Къуырийы æмгъуыдмæ æппæт районтæ дæр электрон тых æмæ газы хæстæ хъуамæ бафидой, уыцы дзуапмæ æнхъæлмæ кæсдзынæн, — загъта Битарты Вячеслав. Иумæйаг исбон æмæ бирæуæладзыгон хæдзæртты бындурон цалцæджы фарстыты тыххæй раныхас кодта РЦИАланийы цæрæн-коммуналон хæдзарады артаг æмæ энергетикæйы министр Таматы Майран, муниципалон скондты санитарон уавæрыл та Æрдз хъахъхъæныны æппæтуæрæсеон æхсæнадон организацийы Цæгат Ирыстоны хайады минæвар Майрæнсауты Зауырбег.

САУТÆТЫ Тамилæ

ОСТАВЬТЕ ОТВЕТ

Please enter your comment!
Please enter your name here