Инвестицион проекттæ æнтысынц

0
46

 

Зындгонд куыд у, афтæмæй Цæгат Ирыстоны кусæг балцы уыдис Цæгат Кавказы хъуыддæгты тыххæй министр Сергей ЧЕБОТАРЕВ. Цæгат Кавказы республикæты ахсджиаг фарстытыл æрныхас кæныны фæстæ федералон министр инвестицион проекттæ царды куыд æххæстгонд цæуынц, уый базоныны охыл бабæрæг кодта цалдæр хæдзарады

Дыргъыкуыст рапарахат кæнынимæ баст проекттæй иу æххæстгонд цæуы Алагиры районы Црауы хъæуы зæххытыл. Сергей Чеботаревимæ уырдæм ацыдысты республикæйы Хицауады Сæрдар Тускъаты Таймураз, экономикон рæзты министр Томайты Хъазыбег, Алагиры районы сæргълæууæг Бутаты Арсен. Проекты хицау Владимир Печеный уазджыты базонгæ кодта хæдзарадимæ, цы дыргъæфснайæн сæм арæзт цæуы, уыимæ, радзырдта, азы кæронмæ ног дыргъцæхæрадæтты иумæйаг фæзуат 122 гектармæ кæй схæццæ уыдзæн. Уыдæттæ, раздæр цы амалхъомады пълан бацæттæ кодта, уымæ гæсгæ.

Фарон азы кæрон бавнæлдтой дыргъæфснайæны арæзтадмæ, æфснайæн дзы уыдзæн 5 мин тоннæйы бæрц, куыддæриу фыццаг тыллæг райсой, афтæ-иу сæ уым бафснайдзысты. Сергей Чеботарев лæмбынæг бафарста, тагъдрæзгæ дыргъцæхæрадæтты технологон хъуыддаг куыд арæзт у, уымæй, куыд бафиппайдта, афтæмæй сæйрагдæр у фæткъуытæ, иннæ дыргътæ бахъахъхъæнын. Владимир Печеный куыд радзырдта, афтæмæй хъуыддагмæ бавналыны агъоммæ базыдта, иннæ бæстæты раззагдæр фæлтæрддзинад æмæ спайда кодта сæ ахадгæдæр технологитæй. Ныридæгæн сын ис бастдзинæдтæ италиаг фирмæимæ, уыдон дыргътæ куыд æфснайынц, уый у æнаипп. Дыргъæфснайæны цы ифтонггæрзтæ æвæрд æрцæудзæн, уыдоны фæрцы фæткъуытæ суанг фараст мæйы фæстæ дæр уыдзысты хæрзад.

Сергей Чеботаревæн æхсызгон уыдис, хæстæгдæр рæстæг кæрдойы бæлæстæ садзынмæ кæй бавналдзысты, уый. Алагиры район рагæй дæр зындгонд цы кæрдойæ уыдис, уый та хъуамæ сног уа. Федералон министры ныхасмæ гæсгæ, ахæм хорз хъуыддæгтæн хъæуы æххуыс кæнын.

Ацы хæдзарадæй уæлдай ма Сергей Чеботарев бабæрæг кодта агрохолдинг «Березка» дæр, федта йын йæ фадæттæ, базонгæ, цы продукцийы хуызтæ уадзы, уыдонимæ. Уымæй уæлдай йын радзырдтой, дарддæры рæзтæн сæм цы нысантæ ис, уыдæттæ. Федералон министры хатдзæгмæ гæсгæ, Цæгат Ирыстоны цы инвестицион проекттыл кусынц, уыдон æнтысынц.

РЦИ-Аланийы Сæргълæууæджы æмæ РЦИ-Аланийы Хицауады пресс-службæ

ОСТАВЬТЕ ОТВЕТ

Please enter your comment!
Please enter your name here