Адæмон фронт: æмгуыстады фæрцы

0
59

 

«Мæ цæстæй акæсгæйæ, Æппæтуæрæсеон адæмон фронты архайд у ахадгæ, хицаудзинадимæ йын цы æмгуыстад ис, уый хорзæрдæм фæзынд. Хицауады кусын куы райдыдтон, уæд уайтагъд сæмбæлдтæн фронты цæгатирыстойнаг хайады уæнгтимæ, кæрæдзи бамбæрстам. Ныр ахæм ахсджиаг æмбырд нæ вæййы, æмæ дзы фронты уæнгтæ ма архайой. Иумæйагæй кусæм республикæйы цæрджыты цард фæхуыздæр кæныныл. Уырны мæ, уæ конференцимæ цы фарстытæ рахастат, уыдон æнтыстджынæй кæй равзардзыстут, уый».

Знон ахæм хъуыдыимæ РЦИ-Аланийы Сæргълæууæг Битарты Вячеслав раныхас кодта Æппæтуæрæсеон адæмон фронты Цæгат Ирыстоны регионалон хайады конференцийы.

Æппæтуæрæсеон адæмон фронты цæгатирыстойнаг хайады уæнгтæ æрæмбырд сты сæ дзуапдæттæн конференцимæ.

Фембæлды нысан ахсджиаг кæй у, ууыл дзурæг уыд, фронты федералон æххæсткомы разамонæг Михаил Развожаев конференцийы кæй архайдта, уый. Конференци амыдта регионалон хайады æххæсткомы разамонæг Туаты Теминæ. Михаил Развожаев цыбыр раныхасæй фæбæрæг кодта, Æппæтуæрæсеон адæмон фронты размæ цы хæстæ лæууы, куыд сыл бакусын хъæудзæн, уыдæттæ.

«Бирæ хъуыддæгтæ конд æрцыдис, фæлæ нæ размæ ныртæккæ цы нысантæ лæууы, уыдоны ахадындзинад дæр у бæрзонд, æмæ сæм бæрнонæй акæсын хъæудзæн. Мæн уырны, ацы конференцийы цы уынаффæтæ рахæссат, уыдон фæхъомысджындæр кæндзысты фронты куыст. Мах хицауады бартæ нæхимæ нæ исæм, фæнды нæ, адæм цы хъуыддæгтыл тыхсынц, дæргъвæтин рæстæг лыггонд чи нæ цæуы, уыдонмæ разамонджыты æргом аздахын æмæ сыл иумæ бакусын. Нæ бæстæйы Президент Владимир Путин цы 12 национ проекты сфидар кодта, уыдонæн радих кæндзысты тынг бирæ æхца, хъуамæ адæмон фронты уæнгтæ сæ хъус æрдарой, куыд хардзгонд цæудзысты, уыдæттæм», — загъта Михаил Развожаев.

Дарддæр конференцийы архайджытæ байхъуыстой, цæгатирыстойнаг хайады уæнгтæ фондз азмæ цы хъуыддæгтыл бакуыстой, уыдæтты тыххæй раныхæстæм. Скодтой сæ хатдзæгтæ, уымæй дарддæр æрныхас кодтой боны фæткы иннæ фарстытыл, рахастой æмбæлгæ уынаффæтæ.

Нæ уацхæссæг Къам систа ЦÆГÆРАТЫ Дауыт

 

ОСТАВЬТЕ ОТВЕТ

Please enter your comment!
Please enter your name here