Æнтыстджын архайдæн — фидар бындур

0
29

 

Канд нæ республикæйы нæ, фæлæ æнæхъæн Уæрæсейы дæр зындгонд у нæ Культурæйы колледж. Кæддæр ацы бæстыхайы уыдис интернат. Ахуыр дзы кодтой æппæты курдиатджындæр фæсивæд, абон зæрдиагæй кæй сфæлдыстад уарзæм, уыцы адæймæгтæ; МАГКОТЫ Ацæмæз, КЪÆБОЙТЫ Никъала æмæ иннæтæ. Бирæ азты дæргъы дзы директоры хæстæ æххæст кæны, культурæйы цардмæ зынгæ æвæрæн чи хæссы, æмæ нæ республикæйы йæ ном зындгонд кæмæн у, ахæм сылгоймаг — ЦЕХЪОТЫ Ларисæ. Уый иудадзыг архайы колледжимæ нæ бæстæйы культурæйы университеттæ æмæ институттимæ бастдзинæдтæ, йæ бæрны чи ис, уыцы педагогон коллектив æмæ студенттæн нырыккон хъæугæ уавæртæ аразыныл. Цехъоты Ларисæ нын бæлвырд радзырдта культурæйы колледжы ахуыр æмæ æхсæнадон царды фæдыл бæрæг хабæрттæ.

— Колледжыл 54-æм аз цæуы. 1994 азæй фæстæмæ у хицæн статус лæвæрд кæмæн æрцыд, ахæм бæстыхай — «Культурæйы колледж». Кусынц дзы алы фæлтæрты ахуыргæнджытæ. Ис нæм бирæ æрыгон фæсивæд. Æппæт фæлтæртæ дæр сты нæ рауагъдонтæ. Алкæмæ дæр дзы ис дыгайæртыгай дипломтæ. Чи йæ рæстæджы музыкалон скъола каст фæци, уый фæстæ — культурæйы колледж, стæй та культурæйы университет. Ис нын æнгом бастдзинæдтæ æмæ æмгуыст кæнæм Краснодары, Мæскуыйы æмæ Цæгат Кавказы культурæйы университеттимæ. Сæрыстыр стæм, абоны ГИТИС-ы нæ рауагъдонтæй цыппар кæй ахуыр кæны, уымæй. Юбилей нын куы уыдис, уæд уыцы студенттæй тынг раппæлыд, Мæскуыйы Культурæйы университеты профессор, хореографийы кафедрæйы сæргълæууæг Юрий Деревягин. Куыд загъта, афтæмæй ирыстойнаг студентты уæздан æмæ коммæгæсдзинады миниуджытæ се ‘ппæтмæ кæй нæй, æмæ уыцы миниуджытæ адæймаджы бæрзонд культурæ æвдисæг кæй сты. Уæрæсейы зындгонд культуролог Дмитрий Лихачев афтæ загъта: «Æнæ культурæ нæй фæткæвæрдад дæр». Æмæ раст хъуыды у. Æнæ культурæйæ нæй уæвæн нæдæр социалон, нæдæр экологион, нæдæр политикон закъæттæн

Мах не студенттимæ алывæрсыг куыст кæнæм. Ис нæм ахуырдзаутæ Кæсæг-Балхъарæй, Стъараполæй æмæ Эфиопийæ дæр. Зонгæ сæ кæнæм ирон культурæ, ирон æгъдæуттимæ. Алы студентæн дæр æмбарын кæнæм, уырыссаг уа, ирон æви сомихаг, фыццаджыдæр де ‘взаг зон, зон дæ адæмы æгъдæуттæ æмæ культурæ. Æмæ нын ацы хъомыладон куыст дæтты раст фæндагыл æвæрд фæлтæртæ, уый фæстæ сæрыстыр кæмæй вæййæм, ахæм кусджыты. Нæ рауагъдонтæ кусынц библиотекæты, сты культурæйы галуанты методисттæ, директортæ æмæ культурæйы управлениты сæргълæуджытæ. Уæлдæр цы университетты кой скодтон, æнæ уыдоны профессортæй мах фæлварæнтæ дæр нæ кæнæм. Æрцæуынц æмæ сæхæдæг сбæлвырд кæнынц æппæты курдиатджындæрты, цæмæй сæ дарддæр ахуырмæ айсой — уый тыххæй дзырдта директор Цехъоты Ларисæ.

Культурæйы колледжы ис: инструменталон, хореографион, театралон æмæ библиотекæйы куысты фæдыл хайæдтæ. Æдæппæт студентты нымæц у 35 адæймаджы. Кусы сæм, фæлтæрдджын ахуыргæнджытæ: педагогон наукæты кандидат Хуыбылты Маринæ, ахуыры хайады сæргълæууæджы хæдивæг Будайты Анжелæ, Наталья Цамаладзе, Гутнаты Зарæ, Каринæ Ардуян, Абайты Фатимæ, Багаты Розæ. Канд профессионалон дæсныйадыл сæ нæ ахуыр кæнынц, фæлæ, райдай адæймаджы уынд æмæ бакастæй, суанг хи дарыны æгъдауы онг.

Колледжы кафт æмæ зарды ансамбль «Амонд» у алыхуызон конкурсты уæлахиздзау. Зæгъын хъæуы уый дæр, æмæ Культурæйы колледж æмгуыст кæны бæрзонд æмвæзадыл чи ис, ахæм специалисттимæ. Уыдонæй иу у, Вильнюсы театры режиссер — хореограф, зындгонд Анжеликæ Холина. Гастролты къордимæ Ирыстоны куы уыд, уæд æй Цехъоты Ларисæ колледжмæ æрбахуыдта. Ам Холина студенттимæ бакуыста спектакль «Кармен»-ыл. Колледжы раззагдæр ахуыргæнæг Суанты Валерийы та фæхуыдта Вильнюсмæ кусынмæ. Æмæ уый чысыл кад нæу нæ республикæйæн. Колледж сæрыстыр у нæ республикæйы ахуыргæнджытæ æмæ студентты иунæг иумæйаг оркестрæй. Кафты дæсныйад сын амоны Хъаныхъуаты Тамерлан, сæйраг хореограф та дзы у Бæззаты Жаннæ.

САУТÆТЫ Тамилæ

 

ОСТАВЬТЕ ОТВЕТ

Please enter your comment!
Please enter your name here