Республикон конкурсы уæлахиздзаутæ сбæрæг сты

0
47

 

Ацы бонты хыгъд æрцыдысты уæлæмхасæн ахуырады педагогты профессионалон дæсныдзинады XVI республикон конкурсы бæрæггæнæнтæ. Хуыздæр специалистты сбæрæг кæныны фæдыл æрвылазон конкурс «Мæ зæрдæ дæттын сывæллæттæн» арæзт цæуы Цæгат Ирыстоны Ахуырад æмæ наукæйы министрады хъæппæрисæй.

Кæй зæгъын æй хъæуы, уæлæмхасæн ахуырады специалисттæ стыр æргом аздахынц ацы конкурсмæ, равдисынц дзы сæ дæсныдзинад, стæй базонгæ вæййынц кæрæдзи фæлтæрддзинадимæ дæр.

Куыд иннæ азты, афтæ ныр дæр конкурсы уæлахиздзаутæ æмæ призертæ æвзæрст цыдысты цалдæр номинацийы («аивадон», «техникон», «туристон-бæстæзонæн» , «социалон-педагогон» æмæ афтæ дарддæр).

Афтæмæй сбæрæг сты 6 номинацийы уæлахиздзаутæ. Уыдон сты: Горæтгæрон районы Сывæллæтты сфæлдыстады хæдзары ахуыргæнæг Дзукъаты Зураб, Горæтгæрон районы Æвзонг натуралистты станцæйы ахуыргæнæг Нартыхъты Лаурæ, Сывæллæтты сфæлдыстады республикон галуаны ахуыргæнæг Берозты Артур, Сывæллæттæ æмæ фæсивæды туризмы республикон центры ахуыргæнæг Элеонорæ Махитарьян, Сывæллæтты республикон спортивон скъолайы ахуыргæнæг Батырты Альберт æмæ Хуымæллæджы скъолайы ахуыргæнæг Гиоты Янæ.

Конкурсы архайджыты кадæн æмбырд арæзт æрцыд Сывæллæтты сфæлдыстады республикон галуаны. Сфæлдыстадон ерысы уæлахиздзаутæ æмæ призертæн арфæ ракодта республикæйы ахуырад æмæ наукæйы министры хæдивæг Алыккаты Алан. «Уе ‘нтыстджын архайды тыххæй уын бузныг зæгъын! Уæ куыстæй алкæддæр райгонд куыд уат, уый уын мæ зæрдæ зæгъы», — фæнысан кодта министры хæдивæг.

Зæгъын хъæуы, республикон къæпхæны алы номинациты уæлахиздзаутæ сæ профессионалон дæсныдзинад конкурсы æппæтуæрæсеон финалы кæй æвдисдзысты, уый дæр.

ГÆЛÆУТЫ Наталья

 

ОСТАВЬТЕ ОТВЕТ

Please enter your comment!
Please enter your name here