Телерадиокомпани «Ир»-ы бæрæгбон

0
26

 

Хуссар Ирыстоны паддзахадон телерадиокомпани 20 мартъийы сбæрæг кодта йæ 25 азы юбилей.

Хуссар Ирыстоныл 1990- æм азты цы зын рæстæг скодта Гуырдзыстоны националистты азарæй, уыцы уавæрты тынг хъуыд амы хабæртты æцæгдзинад дунейæн цæстуынгæйæ æвдисын. Иннæмæй та хи телеуынынад хъуыдис республикæйы цæрджыты уæды æмтъеры рæстæджы æрбангом кæнынæн, ныфс сын дæттынæн, рæдыдтытæй сæ бахизынæн. Уæды уавæрты хи паддзахадон телерадиокомпани кæд тынг зын саразæн уыди, уæддæр Республикæйы Хуссар Ирыстоны фыццаг Президент Цыбырты Людвиг йæ фарсмæ æрбалæууæг æххуысгæнджытимæ зæрдиагæй бавнæлдтой ацы хъæугæ фарст алыг кæнынмæ. Æхцайы фæрæзтæй кадавар уæвгæйæ, уыдон фæсидтысты се ‘мбæстæгтæм æмæ уыдоны æххуысæй сæ къухы бафтыд телеуынынады хъæугæ аппаратурæ цадæггай самал кæнын.

Се ‘ххуысы хай бахастой Цæгат Ирыстоны Паддзахадон телеуынынады кусджытæ дæр æмæ 1994 азы 16 мартъийы Хуссар Ирыстоны Паддзахадон телерадиокомпани «Ир»-ы хъæлæс фыццаг хатт азæлыд республикæйы горæттæ æмæ хъæуты.

Уæдæй фæстæмæ телерадиокомпани «Ир» азæйазмæ рæзыд, куыд сфæлдыстадон, афтæ техникон æгъдауæй дæр. Æнæмæнг «Ир»-ы журналисттæ, оператортæ, техникон кусджытæ фондз æмæ сæдз азы дæргъы схызтысты хорз профессионалон бæрзæндтæм. Кæд сæ бирæ хæттыты уæззау уавæрты кусын бахъуыд, уæлдайдæр та Хуссар Ирыстоны цы хæстытæ æрцыд, уыцы рæстæг, уæддæр никуы аивтой сæ зæрдæ равзæрст фæндагыл æмæ сæ профессионалон хæстæ æххæст кодтой æнтыстджынæй.

Æппæт уыдæтты тыххæй йæ арфæйы ныхасы радзырдта Республикæ Хуссар Ирыстоны Президент Бибылты Анатоли, 20 мартъийы кинотеатр «Чермен»- ы цы юбилеон изæр арæзт æрцыд, уым. Бибылы-фырт зæрдиаг арфæ ракодта телерадиокомпани «Ир»-ы бындурæвæрджытæ: Æлборты Владимир, Гаглойты Васили, Хъуылымбегты Роберт, Челæхсаты Георги, Цгъойты Алинæ æмæ иннæтæн. Республикæйы Президент йæ раныхасы банысан кодта, телерадиокомпани «Ир»-ы сырæзтæн Цæгат Ирыстоны паддзахадон телерадиокомпани «Алани»-йы ‘рдыгæй цы æххуыс цыди, уый.

Юбилейон изæры Бибылты Анатоли паддзахадон хæрзиуджытæй схорзæхджын кодта Хуссар Ирыстоны телеуынынад æмæ радиойы рæзтмæ зынгæ æвæрæнтæ чи бахаста, уыцы кусджыты къорды.

«Хæлардзинады» орденæй хорзæхджын æрцыдысты Уанеты Ямзе æмæ Габайты Владимир. Сæ дыууæ дæр телерадиокомпани «Ир»-ы равдыстыты автортæ æмæ амонджытæ.

Майдан «Хуссар Ирыстоны 25 азы кадæн»-æй хорзæхджын æрцыдысты телерадиокомпанийы авд кусæджы. «Республикæ Хуссар Ирыстоны сгуыхт журналист»-ы ном лæвæрд æрцыд Лохты Дзамболатæн. «Республикæ Хуссар Ирыстоны культурæйы сгуыхт кусæг» — систы æхсæз адæймаджы.

Майдан «Хуссар Ирыстоны адæмы Фыдыбæстæйы хæсты уæлахизы 10-азы кадæн»-æй хорзæхджын цы иуæндæс адæймаджы æрцыдысты, уыдоны ‘хсæн сты, Цæгат Ирыстоны паддзахадон телерадиокомпани «Алании»-йы директор Хъуысаты Тимур, йæ раздæры кусджытæ видеооператор Битарты Руслан æмæ Баскаты Уырызмæг. Ахæм хæрзиуæгæй хорзæхджын систы абхазаг тележурналисттæ Гурам Амкуаб æмæ Роберт Ломия дæр. Телекомпани «Ир»-ы директор Челæхсаты Георги Кады грамотæйæ схорзæхджын кодта дзæуджыхъæуккаг хуызисæг Тебиаты Златæйы.

Изæрмæ бацæттæ кодтой æмæ экраныл равдыстой, телерадиокомпани «Ир»-ы 25-азы дæргъы цы зынгæ хабæрттæ æрцыд æмæ дзы уыцы рæстæг зæрдиагæй чи фæкуыста, уыдæттыл дзурæг равдыст. Юбилеон изæр сæ аивадæй барæсугъд кодтой бынæттон зарæггæнджытæ.

Иу ныхасæй, бæрæгбон рауад тынг зæрдæмæдзæугæ æмæ мидисджын.

Нæ уацхæссæг

 

ОСТАВЬТЕ ОТВЕТ

Please enter your comment!
Please enter your name here