Культурæйы бон — Ирыстоны

0
68

 

Культурæйы кусæджы боны кадæн нæ республикæйы æппæт районты дæр конд æрцыдысты кадджын мадзæлттæ. Фæлæ, сæйрагдæр уыд, Вахтанговы номыл Уырыссаг академион театры цы бæрæгбоны программæ равдыстой, уый. Амыдтой йæ НАЛДЫХЪУАТЫ Зæлинæ æмæ ЛАЛЫТЫ Хъазыбег. Культурæйы кусæджы бæрæгбон райдыдта, нæ республикæйы адæмон артист Дзытиаты Лактемыры рухс ном ссарынæй. Уый фæстæ УФ-йы адæмон артист Гæздæнты Булаты национ инструментты оркестр йæ аив цагъдæй байгом кодта бæрæгбон.

Нæ республикæйы культурæйы къабазы кусджытæм зæрдиаг арфæтимæ æрбацыдысты РЦИ-Аланийы Сæргълæууæг Битарты Вячеслав, Парламенты Сæрдар Алексей Мачнев, культурæйы министры хæстæ рæстæгмæ æххæстгæнæг Къубалты Эльбрус.

Битарты Вячеслав куыд радзырдта, афтæмæй алыхуызон проектты бындурыл нæ республикæйы культурæйы къабазы хорзæрдæм бирæ ивддзинæдтæ цæуы. — Ивгъуыд азты арæзт æрцыд культурæйы 14 объекты: хъæууон клубтæ, галуантæ. 2019 азы байгом кæндзыстæм адæмон промыслæты аивадон центр дæр. Фæлæ æрмæст ацы хъуыддæгтыл нæ куыст культурæйы къабазы рæзтыл нæ фæуыдзæн. Цы нысантæ нæм ис фидæнмæ, уыдоныл бæстон æмæ бæрнонæй архайдзыстæм, — загъта Битары-фырт.

РЦИ-Аланийы Парламенты Сæрдар Алексей Мачнев та бæрæгбоны архайджыты зæрдыл æрлæууын кодта, Ирыстоны культурæ нæ бæстæйæн цы зындгонд курдиатджын артистты схъомыл кодта, уыцы адæймæгты нæмттæ.

— Нæ республикæйы культурон цард рагæйæрæгмæ дæр бæрзонд æмвæзадыл лæуд у æмæ хуымæтæджы Дзæуджыхъæу Уæрæсейы Хуссайраг регионы сæйраг культурон центрыл нымад нæу. Аивады бæрзæндты, стъалытау, æрттивынц æмæ цæхæр калынц Уататы Бибо, Адырхаты Светланæ, Сохиты Тугъан, Гергиты Валери, Хъантемыраты мыггаджы хъуыстгонд бинонтæ æмæ æндæртæ. Уыдоны схъомыл кодта хъæууон скъолаты аивадон къордты æмæ клубты культурæ. Уыдоны фæрцы рæзыд æмæ фидарæйфидардæр кодта Ирыстоны культурон цард, — загъта Алексей Мачнев.

Кадджын изæры рохуаты нæ ныууагътой, ирон аивады сценæйы бирæ азты дæргъы намысджын фæллой чи кодта, адæмы зæрдæтæм абон дæр сыгъдæг уды фарн чи хæссы, уыцы артисттæ: Гæздæнты Булат, Бекъойты Розæ æмæ Тлаттаты Бексолтаны. Тыхджын къухæмдзæгъдæй залы адæм бузныг загътой аивады ветерантæн. Æмæ, кæй зæгъын æй хъæуы, паддзахадон хæрзиуджытæй нæ республикæйы разамынд схорзæхджын кодта, хъæуты, районты æмæ Дзæуджыхъæуы культурæйы къабазы æппæты хуыздæр кусджыты. Майдан «Ирыстоны намысæн» лæвæрд æрцыд Дзанайты Ольгæ æмæ Татьянæ Лысенкойæн.

РЦИ-Аланийы «Культурæйы сгуыхт» кусæджы ном райстой: Гуырдзыбеты Зитæ, Валентинæ Зима, Кадиты Тамарæ, Кочиты Георги, Найфонты Батрадз, Сохъуырты Валери, Дзоблаты Альбинæ æмæ Роберт Хачатрян.

РЦИ-Аланийы «Кады гæххæтт» та саккаг кодтой: Багаты Эльмирæ, Бердиты Роберт, Татьянæ Вайс, Евгения Метелкина, Гæбуты Людмилæ, Гуцъунаты Ацæмæз, Джиоты Витали, Дудайты Давид, Остъаты Давид, Ларисæ Смагина, Хъæвдынты Вячеслав æмæ Ходы Олегæн. РЦИ-Аланийы Парламенты Кады гæххæтт радтой: Джиоты Хасан, Габеты Алан, Людмилæ Паук æмæ Сæлбиты Заремæйæн.

Бигъаты Уырызмæг, Дзыгасты Анжелæ, Мæдинæ Зайналова, Дриаты Джульетæ, Плиты Эдуард, Сугъараты Верæ æмæ Таматы Тазретæн та — Парламенты Арфæйы гæххæтт.

САУТÆТЫ Тамилæ

 

ОСТАВЬТЕ ОТВЕТ

Please enter your comment!
Please enter your name here